Read idoma AÍJĒ KÚ Ɛ̄GBĀ 76 Bible Online

AÍJĒ KÚ Ɛ̄GBĀ 76 - idoma bible

AÍJĒ KÚ Ɛ̄GBĀ 76

¹É jé Ɔwɔicō ipú Ujúda. Ó le ojīlīmā nɛ̄hi Ísrɛ̄lu.

²Ɔlɛ́ nū yɔ̄ Ujerúsālɛm, ó kē lā ɛyí ɛfú kú Usáyɔn.

³Abɔ́ɔ ā, nɛ̄ ó kpó aɔ́yī kú aólɛlā mɛ́mla ɔkplɛ́fú mɛ́mla ɔkpacaŋgelī mɛ́mla odúúdú aíyɛ́fú kú uwā cē á.

⁴Ɛgahi kú uwɔ nwuné nɛ̄hi, a klla lɛ ojīlīmā kú ɔcɛ́ nɛ̄hi abɔ̄ a yɔ̄ ī wāajɛ ŋmá ɛyí ɛfu, ɛga nāa yá aólɛlā kú uwɔ lé ā.

⁵É kwú aícɔ́ɔja kú uwā nēe lɛ ɔtū fíyɛ́ dúú ā ú tá abɔ̄ áncā ɛɛ́. Odúúdú uwā le pɛ́ gekwú ɛɛ́. Odúúdú ɔfú mɛ́mla íjéeyī kú ɛfú kú uwā kwú pīya áncā.

⁶Eko nɛ̄ Ɔwɔicō nɛ̄ Ujékɔ̄pu ī gbɛ̄ɛ̄gbā ā, dɛ̄gba tū uwā nɛ̄hi ā, aɔ́nya mɛ́mla ācɛ o ce ɔnya ā má gwōnū, le pɛ́ gekwú.

⁷Óndú, odúúdú ācɛ gē yúufi uwɔ, ɔ̄cɛ dúúmā í háyi iyɔ̄bū uwɔ glá ŋ́ eko nɛ̄ ā le cɔ̄nū.

⁸Ɔkpáncō nāa gē hɛ́pɔ̄ kú uwɔ ŋmá ā, eko dúú nɛ̄ ācɛ kú ɛcɛ kē le pó, é bá hímm.

⁹Eko nāa cāŋjɛ lɛ ɛpɔ̄ hɛ́, a le ācɛ nēé gē pīyatū ipú ɛcɛ nyā nyatá.

¹⁰Ícɔ̄nū kú alɛɛcɛ dóódu ā gē yá ká ācɛ kéē cɛ̄tra uwɔ fíyɛ́. Ācɛ nɛ̄ ɛfú í je kpó lé ŋ́ mā, géē gbā uwɔ ɛ̄gbā eko kú aúcɛ kú uwɔ.

¹¹Aá kwú ɔdā nɛ̄ aá cókónū ā ú lɛ Óndú, Ɔwɔicō kú aá eko nɛ̄ aá lɛ unwalu ā ú lɛ ɔ́. Ɔwɔicō géē yá ācɛ kéē yúufi nū. Aéwo nēe kwu ajaajɛ ā, aá bī ɛhi gē lɛ anú, nɛ̄ ɔ̄cɛ cíkā ō yúúfi nū ā.

¹²Ó í tū aɔ́cɛ́ nēe bá gē yɔ́bɔ́ɔ̄cɛ wāajɛ, klla géē tū aɔ́cɛ́ nɛ̄hi ufi.