Read idoma AÍJĒ KÚ Ɛ̄GBĀ 78 Bible Online

AÍJĒ KÚ Ɛ̄GBĀ 78 - idoma bible

AÍJĒ KÚ Ɛ̄GBĀ 78

¹Aá jāhɔ̄ lɛ ɔdā nɛ̄ n gē nwū ā, ācɛ ɔlɛ́ um. Aá jāhɔ̄ kú aá pó ɛlā nɛ̄ n gáā ka ā.

²N gáā kwu ita lɛ aá, n klla í ka ɛyí ita kú íkée ā.

³Ɔdā nɛ̄ alɔ pó klla jé ā, mɛ́mla ɔdā nɛ̄ aádáádā alɔ ka lɛ alɔ ā.

⁴Alɔ í gáā je uwá tayínū ŋmá ɛgiyí ayí alɔ ŋ́. Alɔ géē ka lɛ aípɔ́ɔma kú alɔ nōo gboce alɔ ā lɛyíkwu ɔfú mɛ́mla úklɔ́ nɛ̄hi kú Óndú mɛ́mla ɔdā idáagó dóódu nɛ̄ ó yá ā.

⁵Ó je íne lɛ ācɛ kú Ísrɛ̄lu, ó je ɔ́da lɛ ayááyí kú Ujékɔ̄pu. Ó da aádáádā alɔ kéē lɛ íne nyā nwū ayí uwā.

⁶Cɛ́ɛ́ kú aípɔ́ɔma nēe gboce uwá ā kéē jé ɔ̄, nēé klla í nwū ayí uwā dúú.

⁷Ɔwɛ nyā, é géē kpɔ́tūce Ɔwɔicō dúú. É klla gáā mlanyī ɔdā nɛ̄ Ɔwɔicō yá ā ŋ́. Amáŋ é géē lɛyítáajɛ lɛ íne kú nū dóódu ā.

⁸É gáā yíkpɛ̄yí olɔfú bɛ̄ɛka aádáádā uwā, nēé lɔtūcē Ɔwɔicō lɔfú ŋ́, nēé klla yɛce ɔ́ kpaakpa ŋ́ mā ŋ́.

⁹Aícɔ́ɔja kú Ɛ́frem nēe bī aɔ́tā mɛ́mla ɔyī ā, le inya kwu ŋmá iyɔ̄bū aólɛlā kú uwā ɔgbɛ́fú.

¹⁰É lɛ okónu nēé ce mla Ɔwɔicō ā tū ŋ́. É tá ō lɛyí táajɛ lɛ íne kú Ɔwɔicō.

¹¹É kwú mlanyī ɔdā nɛ̄ Ɔwɔicō yá ā, mɛ́mla odúúdú úklɔ́ idáagó nɛ̄ ó yá, nēé má ā.

¹²Ipéyī aádáádā uwā, Ɔwɔicō yúklɔ́ idáagó ɔpɛ́ kú Usóyan, ipú ajɛ kú Íjīpiti ā.

¹³Ó lɛ ɔwɛ hɛ́ bū ipú ísu, lɛ uwá kpó bū ipú nū, ó yá kú éŋkpɔ̄ ā kóō háyi bɛ̄ɛka ɔdɔ ā abɔ̄ ɛplɛ́ɛpa kú uwā.

¹⁴Ó lɛ ojuja klá uwā ɛyí ɔlɛ́ɛnɔ, gē bī uwā jé ɔwɛ, ó je ɔ́kpa kú ɔlá ofíyajɛ lɛ uwá otú cɛ́ɛ́ kóō bī uwā jé ɔwɛ otú.

¹⁵Ó lɛ ápátɛ́cɔ̄ hɛ́bū ipú ígbíli le éŋkpɔ̄ je lɛ uwá gwá ŋmá ipú nū.

¹⁶Ó yá kú ɔkpá kóō le cēenyi ŋmá ipú ɛcɔ̄ ā wɛ̄ɛcɛ. Ó klla yá kú éŋkpɔ̄ kóō pɛ́ bɛ̄ɛka ísu ā.

¹⁷Nááná, é bá yɔ̄ ī bīya íne kú Ɔwɔicō kpɔ́. É kē yíikpɛ̄yí olɔfú tá Ɔwɔicō ipú ígbíli ā.

¹⁸É jégēdē le Ɔwɔicō jámá oŋmá lɛ ō dɔɔ̄kā ɔdōlé nōo ŋmó uwā unwū ā.

¹⁹É ka iŋini tá Ɔwɔicō kahíníī, “Ɔwɔicō je ɔdōlé lɛ alɔ ipú ígbíli nyā glá āa?

²⁰Ó wɛ ɔkwɛ̄yí koó le ɔ́kpa gbō ɛcɔ̄ nɛ̄ éŋkpɔ̄ pɛ́ wɛ̄ɛcɛ ŋmá anú. Amáŋ ó lɔfú je igbō mɛ́mla ɛbɛ́ lɛ ācɛ ɔlɛ́ nū glá āā?”

²¹Eko nōo le iŋini kú uwá nyā pó ā, anɔ́ɔ Ɔwɔicō kwú cɔ̄nū mla uwá á. Ó le ɔlá tū wāajɛ klá uwá, klla kwú cɔ̄nū tōōtɔ̄ɔ̄ lɛyíkwu uwá.

²²Ohígbū ka é kpɔ́tūce ɔ́ ŋ́, é klla cɛ̄ ka ɔ́ɔ nya aá tá glá ŋ́.

²³Amáŋ ó kē le ɔ́da je lɛ ɔkpáncō, anɔ́ɔ ɔkpáncō kē kwú nwūla bɛ̄ɛka ɔdūngwɔɔwɛ á.

²⁴ Ó je īkpɔ̄dā nōo lɛbɛ̄ɛka ánplā, nēé hī ka umaná ā lɛ uwá ŋmá ɔkpáncō kéē lé.

²⁵É le ɔdōlé kú alelékwū otɛ̄hɔ̄ lé. Ɔwɔicō kē le ɔdōlé je lɛ uwá cabácabá fíyɛ́ ɛ́gɛ́nɛ̄ é tíne ā.

²⁶Ó yá ká owu kóō tá ŋmá ɛ̄nɔ̄ɔ̄cī wā ɛyí aáklɔ̄kpɛ kú uwā.

²⁷Óŋmá lɛ ɔfú kú nū, ó yá ká owu kóō tá ŋmá ɛháajɛ, anɔ́ɔ ó lɛ aígbáanɔ nēe lɛbɛ̄ɛka ɛwá ā, kpó gé lɛ ācɛ ɔlɛ́ nū kéē kwú lé á.

²⁸Aígbáanɔ ā le pɛ́ wā í bá ajɛ, ipú uwā ɛga nēé ce áklɔ̄kpɛ ā.

²⁹Ācɛ ā lé klla le ipú nū. Ɔwɔicō le ɔdā nōo wɛ ɛgbá kú uwá je le uwá.

³⁰Amáŋ gbɔbū ɛ́ɛ́ kéē nīipú ɔdā nēé yúnwūnū ā, abɔ̄ é yɔ̄ ī lé kpɔ́ ā,

³¹Ɔwɔicō kwú cɔ̄nū mla uwá. Ó le aɛ́nɛ́nɛ̄ ayípōklóbīya olɔfú fíyɛ́ dúú kú ípɔ́ɔnū kú Ísrɛ̄lu kpó ŋmó.

³²Nááná nɛ̄ ɔdā nyā le yá ā, ācɛ ā bá gē bīyíne kpɔ́. É kpɔtūce Ɔwɔicō ŋ́ kpɔ́, nááná nɛ̄ ó le aɔ́dā idáagó nɛ̄hi yá lɛ uwá ā.

³³Ohígbū ɔ́ɔmā, ó le uwá kpó ŋmó igbledū, klla kwú oyēeyī kú uwā ú ŋmɛ̄yí icííci.

³⁴Eko dúúmā nɛ̄ ó le ācɛ ōhī kú uwá ŋmó nɛɛ, ācɛ o hile kú uwā gē kwúcē wā ɛgiyí nū. É gē pīyabɔ̄ ŋmá íne nēé bīya ā klla gē gbɔ̄ɔkɔ̄ lɛ ɔ́ nɛ̄ɛ̄nɛ̄hi.

³⁵É le bla ka Ɔwɔicō ɔ́ɔ ī gbō aá á, ka anú ɔ́ɔ klla nya aá tá á.

³⁶Amáŋ ɛlā kú uwá dóódu wɛ ɛ̄kɛ̄mgbɛ̄, ɛlā dóódu nēé ka ā í wɛ ɔkwɛ̄yi ŋ́.

³⁷É le ɔtū kú uwā yéékpó kéē gbā ɔ̄ ɛ̄gbā kpaakpa ŋ́. É lɛ okónu nēé ce mla anú ā tū ŋ́.

³⁸Amáŋ, Ɔwɔicō le eyīnyinyi ācɛ ɔlɛ́ nū má. Anɔ́ɔ ó kwú íne nēé bīya ā í yú uwā ɛhi, anɔ́ɔ ó klla kpó uwā yíífi gɛ ŋ́. Igbo alɛwa ó le ícɔ̄nū kú nū kwú tū. Ó klla cɔ̄nū dúúdú lɛyíkwu uwá gɛ ŋ́.

³⁹Ohígbū ka ó le bla ka é wɛ alɛɛcɛ nēe gē kwú icííci nɛ. É klla lɛbɛ̄ɛka owu nōo gē tá wā ī yɛ nōo ī mɛ tāajɛ icííci ā.

⁴⁰Igbɛ alɛwa é gē yíkpɛyí olɔfú tá ɔ̄ klla ī yá ɔ̄ ɔtūnōbí.

⁴¹Igbɛ alɛwa é jé Ɔwɔicō má klla bī íwɔ́tū gé lɛ Ɔwɔicō otīihɔ nɛ̄ Ísrɛ̄lu gē gbā ā.

⁴²É kwú mlanyī ɔfú kú nū mɛ́mla ɛ̄cī nɛ̄ ó nya uwá tá ŋmá abɔ̄ kú aólɛlā kú uwā ā.

⁴³Mla ɛ̄cī nɛ̄ ó yúklɔ́ idáagó ɔpɛ́ kú Usóyan ipú ajɛ kú Íjīpiti ā.

⁴⁴Ó kwú aísu ā í pīya oyī, ohīgbū ɔ́ɔmā ācɛ kú Íjīpiti í má éŋkpɔ̄ gwá ŋ́.

⁴⁵ Ó le ígwu kú aíju mɛ́mla abaná tū klá ajɛ Íjīpiti, nēe kwú ɛjɛ̄ɛ̄jī odée kú uwā í kpó yíífi.

⁴⁶Ó lɛ efūma tɛ̄hɔ̄ í kwú ɔdɛ̄hɔ̄ kú uwā ú kpó lé klla kwú aɔ́dā nēe hile ā kpó bīya.

⁴⁷Ó le ɔcí ufáyin mɛ́mla ufígi kú uwá kpó ŋmó mla ɛcɔ̄ɔwɔ mɛ́mla owu.

⁴⁸Ó lɛ aɛ́na mɛ́mla aálá kú uwā kpó ŋmó mla ɛcɔ̄ɔwɔ mɛ́mla ōcē obɔ̄bí.

⁴⁹Ó yá uwā ɔdā ōlɔnɔ nɛ̄hi ŋmá lɛ íwɔ́tū mɛ́mla ícɔ̄nū mɛ́mla ánya kú nū nēe wā bɛ̄ɛka ɔ̄cocɛ̄hɔ̄ nēé tū kéē wā í ŋmó ācɛ ā.

⁵⁰Ó kwú íwɔ́tū kú nū tū ɛ́ɛ́ nɛ̄ ó kōō gē nya uwá tá ŋ́. Amáŋ ó lɛ uwá kpó ŋmó mla ōcē obɔ̄bí.

⁵¹Ó le odúúdú aɔ́kplá kú ipɔ́ɔnū kú Íjīpiti dóódu ā kpó ŋmó.

⁵²Anɔ́ɔ ó le ācɛ ɔlɛ́ nū kpó wɛ̄ɛcɛ bɛ̄ɛka ɛ́gɛ́nɛ̄ ɔ̄cogbaálá ī gbō aálá ā. Ó klla bī uwā jé ɔwɛ bū ipú ígbíli ā.

⁵³ Ó kpó uwā trɛ̄yí ɛbɔ́, anɔ́ɔ é yúufi ŋ́ kpɔ́ á. Amáŋ ísu le cēenyi klá aólɛlā kú uwā ɛyí.

⁵⁴Ó le uwā kpó wā ipú ajɛ otīihɔ kú nū, wā ɛyí ɛfú nɛ̄ anú abɔ̄yī nū yálé ā.

⁵⁵ Ó lɛ ācɛ ajɛ ā nēe tɛtɛ lā ajɛ ā nū bɛ̄cɛ, abɔ̄ ācɛ ɔlɛ́ nū bá ī wā ā, ó lɛ ajɛ kú uwā ā kɔ́ lɛ aípɔ́ɔma kú Ísrɛ̄lu, klla kwú ɔlɛ́ uwā ú kpó lɛ ācɛ ɔlɛ́ nū.

⁵⁶ Amáŋ é lɛ ikpɛ̄yí olɔfú yá tá Ɔwɔicō nōo lɔfú fíyɛ́ dúú ā. É le ɔ́ jámā, klla í lɛyítáajɛ lɛ íne kú nū ŋ́.

⁵⁷Amáŋ é yíkpɛ̄yí olɔfú klla yá ucē nɛ̄ ó le kpaakpa ŋ́. É wɛ ācɛ nēé tōō lɛ ɔtūce uwá ŋ́, bɛ̄ɛka ɔtā nɛ̄ ó lɔhi ŋ́ mā.

⁵⁸É ya ɔ̄ cɔ̄nū ohígbū ɛga o pɛ̄ɛcí alɛwa kú uwā, é klla cɛ̄ lɛ ánya yá ɔ̄ nɛ̄hi lɛyíkwu uwā ohígbū aójibó kú aɛ́cí nēé gbɛ̄ɛ̄gbā ā.

⁵⁹Eko nɛ̄ Ɔwɔicō le ɛ̄nyā má ā, ó kwú cɔ̄nū nɛ̄hi, ohígbū ɔ́ɔmā ó tá ācɛ ɔlɛ́ nū dúúdú.

⁶⁰ Ó nyɛ̄ ŋmá ipú Áklɔ̄kpīihɔ kú nū Ussílo, ɛga nɛ̄ ó tɛtɛ lā mla uwá ā.

⁶¹ Ó cɛ̄ lɛ aólɛlā kú uwā mīyɛ ikpati kú Ɛka kú Ɔwɔicō ā. Anú wɛ ɔdōcābɔ̄ mafú ɔfú mɛ́mla ɛgahi kú Ɔwɔicō á.

⁶²Ó kwú cɔ̄nū mla ācɛ ɔlɛ́ nū, anɔ́ɔ ó cɛ̄ lɛ aólɛlā kú uwā le uwá kpó ŋmó á.

⁶³É le ayípōklóbīya kú ɔlɛ́ uwā kpó ŋmó ɔgbɛ́fú, anɔ́ɔ ayípɔ̄nɔ̄nyā kú ɔlɛ́ uwā í má ɔbá lɛ gɛ ŋ́ má.

⁶⁴É bī ɔkpacaŋgelī le ācogwɛ́ɛya kú ɔlɛ́ uwā kpó ŋmó. É kē cɛ̄ lɛ anyā uwā yēekwu kú uwā glá ŋ́.

⁶⁵Igbīhāajɛ ā, Óndú cāŋjɛ, bɛ̄ɛka ɔ̄cɛ ō nōo héyī ŋmá iyɔ̄lā ā, ó klla lɛbɛ̄ɛka ɔ̄cɛ olɔfú nɛ̄hi nɛ̄ ejé le ɔ́ kwú amáŋ nɛ̄ ejé gbɔɔ́ ō cá ŋmá ɔ́ eyī ā.

⁶⁶Ó lɛ aólɛlā kú nū kpó yálé, le uwēyī je lɛ uwā piyóó.

⁶⁷Amáŋ, ó tá ipɔ́ɔma kú Ujósɛ̄fu. Ó klla kē fu ipɔ́ɔma kú Ɛ́frem ŋ́.

⁶⁸Ikɔkɔ ɔ́ɔmā, ipɔ́ɔma kú Ujúda nɛ̄ ó fu á. Ó klla le ɛfu kú usáyɔn nōo he ɔ́ ɔtū nɛ̄hi ā fu dúú.

⁶⁹Abɔ́ɔ ā, ó lɛ Agblīihɔ-nɛ̄hi kú nū gwó bɛ̄ɛka ɔlɛ́ nū ɔkpáncō ā. Ó lɛ ɔ́ bū tū kli, bɛ̄ɛka ɛcɛ abɔ̄yīnū nɛ̄ ó yá kóō yɔ̄ piyóó ā.

⁷⁰Ó lɛ ɔ̄cocɛ̄hɔ̄ kú nū Udéfīdi fu, klla kwú ɔ̄ ú ŋmá álá nɛ̄ ó tɛtɛ gē gbō ipácí ā,

⁷¹kwú ɔ̄ ú ŋmá ɛga nɛ̄ ó gē gbāálá ā, anɔ́ɔ ó kwú ɔ̄ ú lé ɔcɛ́ kú Ísrɛ̄lu á. Ɔ̄cogbāálá kú ācɛ kú Ɔwɔicō ɛ́gɛ́nɛ̄ ɔ̄cɛ gē gbō aálá ā.

⁷²Udéfīdi kē leyīkwu uwá klla bī ɔtū ékpónú leyīkwu uwá. Ó klla bī ɔdā nɛ̄ ó jé ā lɛ gbō uwā ɔwɛ olɔhi.