Read idoma AÍJĒ KÚ Ɛ̄GBĀ 79 Bible Online

AÍJĒ KÚ Ɛ̄GBĀ 79 - idoma bible

AÍJĒ KÚ Ɛ̄GBĀ 79

¹ Elééé, Ɔwɔicō, aéwɔhá gā ipú ajɛ kú uwɔ ɛɛ́. É le ipú Agblīihɔ-nɛ̄hi kú uwɔ ā tēelihɔ ɛɛ́. É kwú Ujerúsālɛm ú tá alácɛ̄ ɛɛ́.

²É habɔ̄ aókwū kú ācɛ ɔlɛ́ uwɔ tá lɛ aépu mɛ́mla aɛ́bɛ́ ipácí kéē kpó uwā lé ɛɛ́.

³É le uwá kpó ŋmó, oyī kú uwā kē le pɛ́ klá ajɛ Ujerúsālɛm ɛga dóódu bɛ̄ɛka éŋkpɔ̄ ā, ɔ̄cɛ dúúmā í yɔ̄ nōo gē nyi okwū kú uwá ŋ́ mā.

⁴Alɔ kwú pīya ācɛ nɛ̄ aéwɔhá nēe lā kwu alɔ ā ī yá alɔ okónu ɛɛ́. É bá gē yɛhɛ tū alɔ klla gē yá alɔ ɛbɛ́!

⁵Humm, Óndú, eko nyá nāa gáā cɔ̄nū mla alɔ í kwu āā? A géē yɔ̄ ī cɔ̄nū mla alɔ klla í yɔ̄ ī yá alɔ ɛlā piyóó nɛɛ?

⁶Le cɔ̄nū nɛ̄ɛ̄nɛ̄hi mla aéwo nēé jé uwɔ ŋ́, nēé klla gē gbā uwɔ ŋ́ mā.

⁷Ohígbū ka é le ācɛ ɔlɛ́ uwɔ kpó ŋmó klla kwú ajɛ ɔlɛ́ uwɔ ú tá alácɛ̄ ɛɛ́.

⁸Kócōō, ā híī yá alɔ ōwē ohígbū íne nɛ̄ aádáádā alɔ bīya ā gɛ ŋ́. Lɛ eyīnyinyi kú alɔ má fíya mɛ́ɛ̄, ohígbū ka abɔ̄ hɛ́ alɔ iyē ɛɛ́.

⁹Ɔwɔicō, tá alɔ abɔ̄, cɛ́ɛ́ ká ā lɛ alɔ nyatá. Lɛ alɔ hɛ́tá káā kwú íne nɛ̄ alɔ bīya ā ú yá alɔ ɛhi, Ohígbū ojīlīmā kú awɔ abɔ̄yī uwɔ ā.

¹⁰Ɔdíyá nɛ̄ aéwɔhá gē bā ī da alɔ ɔ̄kā kahíníī, “Iní nɛ̄ Ɔwɔicō kú aá yɔ̄ āa?” Óndú, le aéwo nēe ŋmó ācɛ ɔlɛ́ uwɔ ā yá italā, kéē lɛ ɔ́ má.

¹¹Pó ifu nɛ̄ aálagbá ā bá ī tá ā, cɛ́ɛ́ káā bí ɔfú nɛ̄hi kú uwɔ ā, lɛ ācɛ nɛ̄ aólɛlā tútū kéē kpó ŋmó ā hɛ́tá.

¹²Óndú lɛ ulé kú odúúdú ɛcá nɛ̄ aéwɔhá cá uwɔ ā, cílá uwá ɛga ahāapa.

¹³Cɛ́ɛ́, alɔ nēe wɛ ācɛ kú ɔlɛ́ uwɔ ā, nēe kē wɛ ígwu kú aálá kú uwɔ ā, géē tá uwɔ ahínyá piyóó.