Read idoma AÍJĒ KÚ Ɛ̄GBĀ 80 Bible Online

AÍJĒ KÚ Ɛ̄GBĀ 80 - idoma bible

AÍJĒ KÚ Ɛ̄GBĀ 80

¹Jāhɔ̄ lɛ alɔ, awɔ nōo gē gbō Ísrɛ̄lu bɛ̄ɛka ɔ̄cogbāálá ā. Pó ɔkɔ nɛ̄ alɔ gē gbā ā, awɔ nōo gē kpó ācɛ ɔlɛ uwɔ tɔ̄ɔkwu bɛ̄ɛka aálá ā.

²Lɛ īyī uwɔ mafú lɛ aípɔ́ɔma kú Ɛ́frem, Ubénjamīn, mɛ́mla Umanásɛ. Bī ɔfú nɛ̄hi kú uwɔ ā ká ā wā í lɛ alɔ nyatá.

³Lɛ alɔ kwúcē wā ɔlɛ́, Óndú, ményinyi alɔ, cɛ́ɛ́ ká ā lɛ alɔ nyatá.

⁴Óndú, Ɔwɔicō, nōo lɔfú fíyɛ́ dúú, eko nyá nāa géē yɔ̄ ī cɔ̄nū nɛ̄ á gáā pó ɔkɔ nɛ̄ ācɛ ɔlɛ́ uwɔ gē gbā gā awɔ ā ŋ́, gaá kwu ā?

⁵A kwú ɔtūnōbí ú lɛ alɔ ká alɔ lé ɛ́gɛ́nɛ̄ ɔ̄cɛ gē lé igbō ā, a klla kē kwú agīje ú tū íkókwū lɛ alɔ kú ālɔ̄ gwá ɛ́gɛ́nɛ̄ ɔ̄cɛ gē gwá éŋkpɔ̄ ā.

⁶A cɛ̄ lɛ aéwo nēe yɛ alɔ jīla tá ā bá ī nunnu tá iyī uwā kéē mīyɛ ajɛ kú alɔ. Aólɛlā kú alɔ bá ī cá alɔ ɛcá.

⁷Lɛ alɔ kwúcē igbīhi wā ɔlɛ́, Ɔwɔicō nōo lɔfú fíyɛ́ dúú. Ményīnyi alɔ ká ā lɛ alɔ nyatá.

⁸A le ɔcí ufáyin éyi bī bɛ̄cɛ ŋmá Íjīpiti lɛ aéwɔhá kpó nū ŋmá ajɛ kú uwā, anɔ́ɔ a kwú ɔ̄ ú tū ipú ajɛ kú uwā ɔ́ɔmā á.

⁹A le ácí ŋmó tū ɔ̄ kóō jɛ̄, ó tá ɛgba lipú ga ɛga dóódu kú ajɛ ā, klla tá ābɔ̄ ga ɛga dóódu kú ajɛ ā.

¹⁰Ó le obobowú kú nū tá klá ɛyí ɛfu ā, klla le tá klá ɔcí ulōko nōo gbagwu nɛ̄hi ā icō, le gbobobowú ce ɔ́.

¹¹Ó kwu ābɔ̄ jāā ga ísu nēé hī ka Umeditarénīya ā. Ó klla yɛ jāā ga ísu kú Uyúfarétīisi.

¹²Ɔdíyá nāa klla je ɔdɔ kú nū a wúla tāajɛ ā, ɔ̄cɛ dóódu nōo gē yɛ ɔwɛ abālɔbányā géē yɔ̄ í hɛ́ aíkpó nū uwī.

¹³Aólūhī gē lɛ ikpó da ɔ́ tāajɛ, aɛ́bɛ́ kú ipácí klla í wúla anú tāajɛ.

¹⁴Pīyeyī má alɔ, Ɔwɔicō nōo lɔfú fíyɛ́ dúú ā, pīyeyī má alɔ ŋmá ɔkpáncō ká ā wā í lɛ alɔ nyatá.

¹⁵Wā í lɛ ɔcí kú Ufáyin nāa tū klla cɛ̄ lɛ ɔ́ je jɛ̄ lɔfú nɛ̄hi ā nyatá.

¹⁶Aólɛlā kú alɔ le ɔ́ hɛ́ wāajɛ klla kwú ɔ̄ ú tū ɔlá ɛɛ́. Lɛ ɔkɔnyɔ má uwā mla ícɔ̄nū kú uwɔ, kú ā lɛ uwá kpó yíífi.

¹⁷Gbō ācɛ nāa fu ā, ká ā lɛ éwo nāa yá kéē lɔfú ā tū.

¹⁸Alɔ í klla gáā kwúcē ŋmá ɛgiyī uwɔ igbɔhá gɛ ŋ́. Lɛ oyēeyī kú alɔ tū, cɛ́ɛ́ kú ālɔ̄ cɛ̄tra uwɔ.

¹⁹Lɛ alɔ kwúcē wā ɔlɛ́ kpɔ́, Ɔwɔicō nōo lɔfú fíyɛ́ dúú ā. Ményīnyi alɔ, cɛ́ɛ́ kú ālɔ̄ le nyatá.