Read idoma AÍJĒ KÚ Ɛ̄GBĀ 81 Bible Online

AÍJĒ KÚ Ɛ̄GBĀ 81 - idoma bible

AÍJĒ KÚ Ɛ̄GBĀ 81

¹Aá gwíijē gbōmgbōm lɛ Ɔwɔicō nōo gē gbō alɔ ā. Aá gwíijē kú aá cɛ̄tra Ɔwɔicō kú Ujékɔ̄pu.

²Aá lɛ ijē okónu hɛ́, ká aá gwō ɔdā ō bī gwíijē. Aá gwō ɛ̄ngwū mɛ́mla úmōlō.

³Aá tá opo kú ucɛ kú ɔyā ɛ̄yīpɛ̄, eko nɛ̄ ɔyā gā ɛyí ā.

⁴Ohígbū ka ɛ̄nyā wɛ íne lɛ ācɛ kú Ísrɛ̄lu, mɛ́mla ɔ́da nōo ŋmá ɛgiyí Ɔwɔicō kú Ujékɔ̄pu.

⁵Ó je ɔ́da nyā lɛ ācɛ kú Ísrɛ̄lu, eko nɛ̄ ó nuunu tá ācɛ kú Íjīpiti ā. N pó ɔkɔ nɛ̄ ń jé ŋ́ kahíníī,

⁶“N kwú iyó ogbɛnú ā ú ŋmá aá igbīhi ɛɛ́, n klla lɛ aá hɛ́tá ŋmá úklɔ́ olɔfú ā ɛɛ́.

⁷Eko nɛ̄ aá bá ipú unwalu nɛ̄ aá hī um igwú ā, n le aá nyatá. N tá aá ohi ŋmá ɛga nɛ̄ n gē tayínū ipú owu nɛ̄hi mɛ́mla akpáabana ā. N jé aá má okónu ɔkpá kú Umɛ́rība.

⁸Ācɛ ɔlɛ́ um, aá jāhɔ̄ lɛ ɛlā kú um. Ísrɛ̄lu, eyī yá um kú aá jāhɔ̄ gā um.

⁹Aá híī gbɔ̄ɔkɔ lɛ ɔwɔ ɔhá gbóógbóō ŋ́.

¹⁰Ami wɛ Óndú, Ɔwɔicō kú aá, nōo kpó aá bɛ̄cɛ ŋmá ajɛ kú Íjīpiti á. Aá lɛ okónu kú aá nwūla gbādāa, kú n̄ je ɔdōlé lɛ aá.

¹¹“Amáŋ ācɛ ɔlɛ́ um í gáā jāhɔ̄ ga um ŋ́, Ísrɛ̄lu í gáā lɛyítáajɛ gā um ŋ́.

¹²Ohígbū ɔ́ɔmā, n cɛ̄ lɛ uwá kéē bá ī yá ucē kú ikpɛ̄yí olɔfú kú uwā, cɛ́ɛ́ kéē yá ɔdā dóódu nōo he uwá ɔtū.

¹³Eyī yá um kú ācɛ ɔlɛ́ um kéē jāhɔ̄ gā um, kéē klla lɛyítáajɛ gā um.

¹⁴N géē yɛ í kwú odúúdú aólɛlā kú uwā ú yálé fíyaa, klla í lɛ uwá yá ōwē.

¹⁵Ācɛ nēe gē wɔ́tū um ā, géē túkpɛɛ́ iyɔ̄bū um ipú ufi. N géē yá uwā italā piyóó.

¹⁶Amáŋ n géē je ɔdōlé nōo lɔhi fíyɛ́ dúú ā lɛ aá lé nīipú. N klla í je ɛnwú kú ipácí lɛ aá.”