Read idoma AÍJĒ KÚ Ɛ̄GBĀ 83 Bible Online

AÍJĒ KÚ Ɛ̄GBĀ 83 - idoma bible

AÍJĒ KÚ Ɛ̄GBĀ 83

¹Kócōō, Ɔwɔicō, ā lɛ okónu klá gɛ ŋ́, ā klla yɔ̄ cíí gɛ ŋ́.

²Má ɔ̄, aólɛlā kú uwɔ gbɔɔ́ ō yíkpɛ́yí olɔfú ɛɛ́. Ācɛ nēe gē wɔ́tū uwɔ ā cāŋ́jɛ bá ī bɛ́yí kwu uwɔ ɛɛ́.

³É bá gē yá ojuju obɔ̄bí tayínū lɛyíkwu ācɛ ɔlɛ́ uwɔ. É bá ī tū ujɔ̄ lɛyíkwu ācɛ nēe gē gbá uwɔ ā.

⁴É gē ka kahíníī, “Aá wā ká ālɔ̄ lɛ éwo kú Ísrɛ̄lu ā yíífi, cɛ́ɛ́ kéē kwú mlanyī Ísrɛ̄lu piyóó ipú ɛcɛ nyā.”

⁵Odúúdú uwá cɛ̄ tɔ̄há, klla le okónu ce tɔ̄há lɛyíkwu uwɔ ɛɛ́.

⁶Ācɛ kú Ɛ́dɔm, ācɛ kú Ísmɛ̄lu, ācɛ kú Umówābu, ācɛ kú Uhágiri,

⁷ācɛ kú Ugɛ́balu, ācɛ kú Ámɔn mɛ́mla ācɛ Ámālɛ̄ki. Ācɛ kú Ufilístiya mla Utáya.

⁸Asírīya klla gaá wɛ mla uwá dúú, kwú pīya ācɛ aɔ́mpa ācɛ kú Ámɔn mɛ́mla Umówābu ayí kú Ulɔ́tū ā nēe lɔfú nɛ̄hi.

⁹Óndú, lɛ ɔdā nāa yá ācɛ Umídiyan, Usiséra mɛ́mla Ujábin, kwu ísu kú Ukíssɔn ā yá uwā.

¹⁰A le uwá yálé Éndɔ, okwū kú uwā klla kwú wā tāajɛ.

¹¹Lɛ ɔdā nāa yá Órebu mɛ́mla Usíibu ā yá uwā. Ká ā lɛ odúúdú aɔ́cɛ́ kú uwā ā kpó yálé, ɛ́gɛ́nɛ̄ a yá Usɛ́ba mɛ́mla Usálumūna,

¹²nōo gwō kahíníī, “Alɔ géē mīyɛ ajɛ kú Ɔwɔicō ā kóō kwú pīya ákú alɔ” ā.

¹³Kócōō, Ɔwɔicō, lɛ uwá fíyákátā bɛ̄ɛka úmúlá ā. Lɛ uwá gwu bónū ɛ́gɛ́nɛ̄ owu gē gwu igbóngbō bónū ā.

¹⁴Ɛ́gɛ́nɛ̄ ɔlá gē yi ūpū ā mla ɛ́gɛ́nɛ̄ ígbīlɛ́nyī ɔlá gē tū ácí kú ɛfu ɔlá ā,

¹⁵lɛ uwá nū nyɔ̄ ipú ofúlutu, cɛ́ɛ́ ká ā bī ofúlutu obɔ̄bí kú uwɔ ā le tū uwā ufi.

¹⁶Lɛ uwēyī kpó tū uwá ɛyí, ká ā yá kéē lɔfú kú uwɔ jé.

¹⁷Lɛ uwá yálé kú ufi kóō lɛ uwá kwú piyóó ipú ɛcɛ nyā. Ké ē le pɛ́ gekwú ipú uwēyī kú uwā dúúdú.

¹⁸Yá kéē le jé ka, awɔ ofōōfū uwɔ ā wɛ Óndú, nōo ī gbō odúúdú ɛcɛ kpɛ́mm á.