Read idoma AÍJĒ KÚ Ɛ̄GBĀ 84 Bible Online

AÍJĒ KÚ Ɛ̄GBĀ 84 - idoma bible

AÍJĒ KÚ Ɛ̄GBĀ 84

¹Óndú ā, Agblīihɔ-nɛ̄hi kú uwɔ ā he um ɔtū nɛ̄hi.

²Ó he um ɔtū kú n̄ yɔ̄ abɔ́ɔ. Unwū ká n̄ yɔ̄ ipú Agblīihɔ-nɛ̄hi kú Óndú gē ŋmó um. N gē gwíijē kú éeyē mɛ́mla odúúdú odo kú um lɛ Ɔwɔicō nōo yēeyī ā.

³Abɔ́ɔ nɛ̄ akpándēde mɛ́mla ícɔ́ɔlɔ́ gē gwó ɔlɛ́ kú uwā á. É gē hɛ́ ɔyí tū abɔ́ɔ kwu uwɔ ajaajɛ, kwu ɛyí ede kú Óndú ā nōo lɔfú fíyɛ́ dúú ā, ɔcɛ́ mɛ́mla Ɔwɔicō kú um.

⁴Éeyē yɔ̄ lɛ ācɛ nēe lā ipú Agblīihɔ-nɛ̄hi kú Óndú ā, nēé bá ī gwíijē ōcɛ̄tra uwɔ piyóó ā.

⁵Ɔtū he ācɛ nɛ̄ ɔfú kú uwā ŋmá ɛgiyí uwɔ ā, Óndú, nōo gē yɔ́ɔtū nwula nwula kéē ga iyāwu otīihɔ ga ɛyí ɛfu kú Usáyɔn ā.

⁶Abɔ̄ é bá ī bū ɔpɛ́ kú ajɛ íkpākplā kú Ubáka ā, ó kwú pīya ɛga nɛ̄ éŋkpɔ̄ bá nɛ̄hi. Ɔwɔ kú aflɛ́yí ā le yā le aúnjɔlɔ ā tū mu mla éŋkpɔ.

⁷É klla bá ī lɔfú tōōtɔ̄ɔ̄ ɔ̄ abɔ̄ é bá ī nyɔ̄ ā, é géē má Ɔwɔicō nōo lɔfú fíyɛ́ dúú, Ɔwɔicō kú aɔ́wɔ ɔhá Usáyɔn abɔ́ɔ.

⁸Pó ɔkɔ nɛ̄ n gē gbā ā, Óndú, Ɔwɔicō nōo lɔfú fíyɛ́ dúú. Jāhɔ̄ gā um! Ɔwɔicō kú Ujékɔ̄pu.

⁹Hɔ́ɔhā ce ɔcɛ́ kú alɔ, Ɔwɔicō. Ɔcɛ́ nāa fu ā.

¹⁰Ɛ̄cī ékpónú nɛ̄ ɔ̄cɛ yá ipú Agblīihɔ-nɛ̄hi kú uwɔ ā, anú fíyɛ́ ɛ̄cī úlā ɛpa ce ofu igwó (1,000) nɛ̄ ɔ̄cɛ yá ɛga ɔhá dóódu á. Ó gēe lɔhi gā um fíyɛ́ ká n̄ háyi okónu ɔwɛ kú Agblīihɔ-nɛ̄hi kú Ɔwɔicō kú um, fíyɛ́ ō nyɔ̄ í lā ɔlɛ́ kú ācobɔ̄bíipú.

¹¹Óndú, Ɔwɔicō lɛbɛ̄ɛka ɛnɔ mɛ́mla ɔkplɛ́fú kú alɔ á. A kē ī gbonɛnɛ lɛ alɔ. Á kē gáā nyá alɔ nēe gē yá ɔdā okpaakpa ā, ɔdā olɔhi dúúmā ŋ́.

¹²Ɔwɔicō nōo lɔfú fíyɛ́ dúú ā, ī lɔhi nɛ̄ɛ̄nɛ̄hi lɛ odúúdú ācɛ nēe kpɔ́tūce ɔ́ ā.