Read idoma AÍJĒ KÚ Ɛ̄GBĀ 86 Bible Online

AÍJĒ KÚ Ɛ̄GBĀ 86 - idoma bible

AÍJĒ KÚ Ɛ̄GBĀ 86

¹Óndú, jāhɔ̄ gā um ká ā tá um ohi, ohígbū ka n lɛ ɛgbá nɛ̄hi, ń kē lɛ ɔ̄cɛ o tá um abɔ̄ ŋ́.

²Lɛ um nyatá ŋmá ikwū, ohígbū ka n kē lɛyítáajɛ gā uwɔ. Lɛ um nyatá, ohígbū ka n wɛ ɔ̄cocɛ̄hɔ̄ kú uwɔ, n klla lɔtūce uwɔ.

³Awɔ wɛ Ɔwɔicō kú um á, ményinyi um. N gē gbɔ̄ɔkɔ ga uwɔ ŋmá ɔ̄cɔ̄ɔ̄cī kwu otú, ɛ̄cī dóódu.

⁴Yá ka ɔtū kóō he ami nōo wɛ ɔ̄cocɛ̄hɔ̄ kú uwɔ ā, ohígbū ka ɔkɔ nɛ̄ n gē gbā ā gē gicō ɛgiyí uwɔ.

⁵A ī yá olɔhi lɛ alɔ klla ī je íne nɛ̄ alɔ bīya ā yá alɔ ɛhi. A klla ī yíihɔtū tá odúúdú ācɛ nēe gē gbɔ̄ɔkɔ gā uwɔ ā.

⁶Óndú, jāhɔ̄ lɛ ɔkɔ nɛ̄ n gē gbā ā, ká ā pó ikwū ō je kú otábɔ̄ kú um.

⁷N gē hī uwɔ igwú eko kú unwalu, ohígbū ka a í pó ɔkɔ ōgbā kú um.

⁸Ɔwɔ dúúmā í yɔ̄ bɛ̄ɛka awɔ ā ŋ́, Óndú, ɔ̄cɛ dóódu í yá ɛdɔ ɔdā nɛ̄ ā gē yá ā glá ŋ́.

⁹ Odúúdú aéwo kú ɛcɛ nāa yá ā géē wā í túkpɛɛ́ɛ́ gā uwɔ, é kē í wā í cɛ̄tra ɛ́gɛ́nɛ̄ a lɔfú lɛ ā.

¹⁰A lɔfú nɛ̄hi, a klla ī yá ɔdā idáagó nɛ̄hi, awɔ ōfōōfū uwɔ wɛ Ɔwɔicō á.

¹¹Óndú, lɛ ɔdā nāa tíne kú n̄ yá ā nwū um, n gē lɛyítáajɛ gā uwɔ kpaakpa. Nwū um ka n yúklɔ́ gā uwɔ mla ɔtū ékpónú.

¹²N géē cɛ̄tra uwɔ mla odúúdú ɔtū kú um, Óndú, Ɔwɔicō kú um. N géē ka ɛ́gɛ́nɛ̄ a lɔfú nɛ̄hi lɛ ā tɛ́ɛcɛ piyóó.

¹³Ihɔtū nāa ī yá tū um eko dóódu ā nwuné nɛ̄hi. A le um hɛ́tá ŋmá ikwū mɛ́mla únóji abɔ̄yī nū.

¹⁴Ɔwɔicō, ācoyɔ́bɔ́ɔ̄cɛ cāŋjɛ lɛyíkwu um ɛɛ́, Ígwu kú ācobɔ̄bíipú nēé je uwɔ ka a wɛ ɔdā dúúmā ŋ́ mā, bá ī tíne kéē ŋmó um.

¹⁵Amáŋ, Óndú, a wɛ Ɔwɔicō nōo ī ményinyi klla ī yíihɔtū. A gbonɛnɛ, a klla gbēyī cíí klla tōō lɛ ɔtūce.

¹⁶Pīyeyī kwu um ká ā ményinyi um. Lɔfú tū um iyē ká ā lɛ um nyatá, ohígbū ka awɔ nɛ̄ n gē gbā ɛ́gɛ́nɛ̄ ɛ́nɛ́ um gbā uwɔ á.

¹⁷Óndú, lɛ ocābɔ̄ kú olɔhi kú uwɔ mafú gā um, cɛ́ɛ́ kú uwēyī kóō lɛ ācɛ nōo gē tū um eyījii ā kwú. Eko nēē le má ka awɔ lɛ um ɔtū túlé klla le um tábɔ̄ ā.