Read idoma AÍJĒ KÚ Ɛ̄GBĀ 88 Bible Online

AÍJĒ KÚ Ɛ̄GBĀ 88 - idoma bible

AÍJĒ KÚ Ɛ̄GBĀ 88

¹Óndú, Ɔwɔicō mɛ́mla ohɔ́nyɛtá kú um, n gē jikwū tū uwɔ eko dóódu, kwu otú kwu ɛnɔ.

²Pó ɔkɔ nɛ̄ n gbā ā, ká ā jāhɔ̄ lɛ ikwū nɛ̄ n je ká ā tá um abɔ̄ ā.

³Ohígbū ka unwalu alɛwa wā í klá um, nōo gáā ŋmó um ɛɛ́.

⁴N lɛbɛ̄ɛka ācɛ dóódu nēe gáā kwú ā. Ń lɛ ɔfú dóódu gɛ ŋ́.

⁵É habɔ̄ um tá ipú aálelékwū, n klla lɛbɛ̄ɛka ɔ̄cɛ nēé le ŋmó, kwú okwū nū í nyi únóji, nāa kwú mlanyī nū dúúdú ā. Nɛ̄ otábɔ̄ dúú í wā lɛ ɔ́ glá gɛ ŋ́ mā.

⁶A kwú um ú tá ga ipú únóji, ga ɛga odobū nɛ̄hi mla ɔkɛkɛlɛ kú únóji ā.

⁷Ícɔ̄nū kú uwɔ ā gáā fīyɛ̄ um wāajɛ bɛ̄ɛka úgbagwú kú ísu nɛ̄hi, ó klla gáā ce um báajɛ ɛɛ́.

⁸A cɛ̄ lɛ aóklóbīya um kwú pɛ́kwu gwū um tá, a kwú um ú pīya ɛbɛ ohéyī lɛ uwá. É le um gwō tū, anɔ́ɔ ń kē kwu bɛ̄ɛcɛ glá gɛ ŋ́ má.

⁹Ń mɛ́ɛbɛ lɔhi gɛ ŋ́, ohígbū ōwē nɛ̄ n yɔ̄ ī má ā. Óndú, ɛ̄cī dóódu, n gē hī uwɔ igwú klla ī je abɔ̄ kú um gicō kú n̄ gbɔ̄ɔkɔ gā uwɔ.

¹⁰A gē yúklɔ́ ídáagó lɛ aókwū nɛɛ? Aókwu gē cāŋjɛ í cɛ̄tra awɔ nɛɛ?

¹¹É gē kɔ̄kā kú ihɔtū nāa gē mafú eko dóódu ā, ipú únóji nɛɛ? Kɛ̄ɛ ka é ī kɔ̄kā kú ɛ́gɛ́nɛ̄ a tōō lɔtūce ā áncā nɛɛ?

¹²É gē má úklɔ́ idáagó kú uwɔ ā ipú ɛga odobū ɔ́ɔmā nɛɛ? Kɛ̄ɛ ka é ī má olɔhi kú uwɔ ipú ajɛ kú ācɛ nēé kwú mlanyī uwā ɛɛ́ ā nɛɛ?

¹³Óndú, ɔ̄cɔ̄ɔ̄cī dóódu, n gē gbɔ̄ɔkɔ gē hī uwɔ igwú ká ā tá um abɔ̄.

¹⁴Ɔdíyá nāa tá um ā, Óndú? Ɔdíyá nāa cīgbīhi kwu um ā?

¹⁵Ŋmá obene kú um, n húmáyī móōwē, klla kwu ikwū ajaajɛ. Ɛ̄jɛ̄ kú ōwē nāa ī je gā um ā le jɛ̄ um ɛɛ́.

¹⁶Ícɔ̄nū nɛ̄hi kú uwɔ ā le um ca báajɛ. Ɔnū kú uwɔ ā kwú um yíífi ɛɛ́.

¹⁷Ɛ̄cī dóódu é le jīla tū um bɛ̄ɛka ɔkpá nōo ī cēenyi ā, é le um gwōtū ŋmá ɔ́kíkā dóódu.

¹⁸A cɛ̄ lɛ aóklóbīya um nēe kwu um ajaajɛ ā, kwú pɛ́ kwu hɛ um tá ɛɛ́. Obū wɛ aóklóbīya um mɛ́ɛ̄ á.