Read idoma AÍJĒ KÚ Ɛ̄GBĀ 89 Bible Online

AÍJĒ KÚ Ɛ̄GBĀ 89 - idoma bible

AÍJĒ KÚ Ɛ̄GBĀ 89

¹Óndú, n géē yɔ̄ ī gwíijē eko dóódu lɛyíkwu úklɔ́ kú ihɔtū nāa gē yá eko dóódu ā. N gē tɔ́ɔna piyóó ka, a tōō lɛ ɔtūce uwɔ piyóó.

²N jé ka ihɔtū kú uwɔ gē yɔ̄ eko dóódu. Ka ā kē tōō lɛ ɔtūce piyóó bɛ̄ɛka ɛ́gɛ́nɛ̄ ɔkpáncō yɔ̄ ā.

³A ka ka anúɔ lɛ okónu ce mla ɔ̄cɛ nɛ̄ anúɔ fu ā ɛɛ́, Ka anúɔ le okónu ce lɛ Udéfīdi, ɔ̄cocɛ̄hɔ̄ kú anúɔ ā kahíníī,

⁴ “N géē yá kú ayááyí uwɔ kéē cɔcɛ́ eko dóódu ōfōōfūnū ŋ́, amáŋ n géē yá kéē bá ī cɔcɛ́ kwɛyí uwɔ piyóó.”

⁵Óndú, aálelékwū nēe bá Ɔkpancō gē gwíijē kú ɔdā idáagó nāa ī yá ā, é gē gwíijē lɛyíkwu ɛ́gɛ́nɛ̄ a tōō lɔtūce lɛ ā.

⁶Ɔ̄cɛ dúúmā í yɔ̄ ɔkpáncō bɛ̄ɛka awɔ ā ŋ́, alelékwū dóódu í yɔ̄ ɔkpáncō nōo bá gā awɔ ŋ́.

⁷Ɔwɔicō, aálelékwū nēe bá ójīla kú ɔkpáncō gē yúufi uwɔ nɛ̄hi.

⁸Óndú, Ɔwɔicō nōo lɔfú fíyɛ́ dúú ā, ɔ̄cɛ dúúmā í klla lɔfú bɛ̄ɛka awɔ ā ɛ́ɛ́ gɛ ŋ́. Ipú ɔdā dóódu ā, a tōō lɛ ɔtūce, Óndú.

⁹A gē gbō ísu, nōo lɔfú nɛ̄hi ā, klla ī trá úgbagwú kú ísu ā.

¹⁰A le ɛbɛ́ obɔ̄bí nēé hī ka Uráhābu ā ŋmó, a klla bī ɔfú nɛ̄hi kú uwɔ le aólɛlā kú uwɔ kpó yálé.

¹¹Ɛcɛ mɛ́mla ɔkpáncō wɛ ákú uwɔ. Awɔ yá ɛcɛ mɛ́mla ɔkpáncō mla ɔdā dóódu nēe bá ipú uwā á.

¹²Awɔ yá ajɛ kú ɛhícō mla ajɛ kú ɛháajɛ á. Ɛfu kú Utábɔ mɛ́mla ɛfu kú Uhámɔn gē gwíijē kú éeyē gā uwɔ.

¹³A lɔfú nɛ̄hi. A klla lɛ íkwu nɛ̄hi.

¹⁴A le ajɔ̄ɔ̄cɛ́ kú uwɔ kwu ajɛ ŋmá lɛ o yá olɔhi mɛ́mla ɛpɔ̄ okpaakpa ō ka lɛ ācɛ. Ihɔtū kú uwɔ mla ɛ́gɛ́nɛ̄ a tōō lɛ ɔtūce ā ī nyɔ̄ iyɔ̄bū uwɔ bɛ̄ɛka ɔ̄cocɛ̄hɔ̄ ā.

¹⁵Ācɛ nēe jé ō gwíijē ī cɛ̄tra uwɔ ā, nēe lā ipú ɔlá ofíyajɛ kú iyē kú uwɔ ā gwéeyē nɛ̄hi.

¹⁶Ohígbū uwɔ ā, é gē gwéeyē ɛ̄cī dóódu. É klla í cɛ̄tra awɔ ohígbū olɔhi kú uwɔ.

¹⁷Awɔ ī je ɔfú lɛ alɔ kú ālɔ̄ yá aólɛlā kú alɔ lé á. Ipú ihɔtū kú uwɔ nāa ī cɛ̄ lɛ alɔ yálé á.

¹⁸Óndú, awɔ gē fu ɔ̄cɛ nōo gē gbō alɔ á. Awɔ nōo wɛ Ɔwɔicō kú Ísrɛ̄lu ā, je ɔcɛ́ kú alɔ lɛ alɔ á.

¹⁹A da ɔ̄cocɛ̄hɔ̄ kú uwɔ nēe ī lɛyítáajɛ gā uwɔ kpaakpa ā, ipú ɛbɛ íkée kahíníī, “N le ícɔ́ɔja nɛ̄hi kú uwɔ ā tábɔ̄ ɛɛ́, n kwú ɔ̄cɛ nɛ̄ n fu ŋmá ipú ācɛ ā ú pīya ɔcɛ́ ɛɛ́.

²⁰ N lɛ Udéfīdi, ɔ̄cocɛ̄hɔ̄ kú um, pīyɛ̄, kwú ɔ̄ ú ce ɔcɛ́, oŋmá lɛ anɔ̄ ōtīihɔ kú um nēé le tū ɔ̄ ɛyí ā.

²¹Ɔfú kú um géē yɔ̄ mla anú eko dóódu, ɔfú kú um klla í lɛ ɔfú tū ɔ̄ iyē.

²²Aólɛlā kú nū í gáā yá ɔ̄ lé gbóógbóō glá ŋ́, ācobɔ̄bíipú ā í gáā yá ɔ̄ lé glá ŋ́.

²³N géē kpó aólɛlā kú nū ca tāajɛ klla í kpó odúúdú ācɛ nēe ī wɔ́tū nū ā ŋmó.

²⁴N géē yíihɔtū tá ɔ̄ eko dóódu, klla í yá ucē kpaakpa lɛyíkwu ɔ́. N géē yá kóō yá aólɛlā kú nū lé eko dóódu.

²⁵N géē nyīla ajɔ̄ɔ̄cɛ́ kú nū ŋmá ísu kú Umeditarénīya jāā ga ísu kú Uyufarétīisi.

²⁶Ó géē da um kahíníī, “Awɔ wɛ Ádā um mɛ́mla Ɔwɔicō kú um á, awɔ gē gbō um klla gē hɛ́ um tá á.”

²⁷ N géē je ɔ́ pīya ɔ́kplá kú um anú klla í lɔfú fíyɛ́ odúúdú aɔ́cɛ́ dóódu á.

²⁸N géē yíihɔtū tá ɔ̄ kpaakpa eko dóódu. Okónu nɛ̄ n ce mla anú ā kē í yɔ̄ piyóó ipú ɛcɛ nyā.

²⁹Ipɔ́ɔma kú ɔcɛ́ kú nū géē yɔ̄ piyóó bɛ̄ɛka ɛ́gɛ́nɛ̄ ɔkpáncō í yɔ̄ ā. Ayááyí nū gē bá ī lé ɔcɛ́ piyóó á.

³⁰“Amáŋ ɔ́dāŋ ka ayááyí nū í lɛyítáajɛ lɛ íne kú um ŋ́, nēé kē lā ɛ́gɛ́nɛ̄ íne kú um lɛ ā ŋ́,

³¹nēé lɛ eyī gwō íne kú um bónū, nēé lɛ ɔ́ tū ŋ́,

³²ó lɛ ā, n géē yá uwā italā kú íne kú um nēé bīya ā. N géē yá uwā ōwē nɛ̄hi kú ɔdōbɔ̄bí nēé yá ā.

³³Amáŋ, ń gáā mā ō yíihɔtū tá Udéfīdi ŋ́, ɛɛ́ nɛ̄ n gē tá ō yá okónu nɛ̄ n ce lɛ ɔ́ ā ŋ́.

³⁴Ń kē gáā bīya okónu nɛ̄ n cɛ mla anú ā, ɛ́ɛ́ nɛ̄ n gē je ékpónú ŋmá ipú okónu nɛ̄ n ce ɔ́ɔmā ŋ́.

³⁵Ɛ́gɛ́nɛ̄ n bī iyē otīihɔ kú um lɛ okónu ce ɛɛ́ ma ka ń gáā kɛ̄mgbɛ̄ lɛ Udéfīdi gbóógbóō ŋ́ ā.

³⁶Ó géē yɔ̄ í lɛ ayááyí piyóó, n kē í yɔ̄ í gbō ajɔ̄ɔ̄cɛ́ kú nū eko dóódu ɛ́gɛ́nɛ̄ ɛnɔ í yɔ̄ ī fíyajɛ icō kpɔ́ ā.

³⁷Ajɔ̄ɔ̄cɛ́ kú nū í yɔ̄ piyóó bɛ̄ɛka ɔyā ā, nōo wɛ ijáalí okpaakpa kú ɔkpáncō ā.”

³⁸Amáŋ a kwú cɔ̄nū mla ɔcɛ́ nāa fu ā ɛɛ́, a le igbīhi pīya kwu ɔ́ klla tá ɔ̄ ɛɛ́.

³⁹A le okónu nāa ce lɛ ɔ̄cocɛ̄hɔ̄ kú uwɔ ā bīya ɛɛ́. A kwú ukata kú ɔcɛ́ kú nū ú tá ga ipú ɔ́tɔ̄ ɛɛ́.

⁴⁰A klla le ɔdɔ kú igelī nɛ̄hi kú nū ā wúla tāajɛ ɛɛ́. A kwú ɛga olɔfú kú nū ā ú tá alácɛ̄.

⁴¹Odúúdú ācɛ nēe gē yɛ ɔwɛ ā, gē je ɔ́ iyō kpó uwī ɛɛ́, aɔ́mpa nū dóódu gē yɛhɛ tū ɔ̄.

⁴²A cɛ̄ lɛ aólɛlā kú nū lɛ ɔ̄ yálé ɛɛ́. A cɛ̄ le aólɛlā kú nū le éeyē gwó tū ɔ̄ klla le ɛhɛ yɛ tū ɔ̄ ɛɛ́.

⁴³A kwú iyɔ́fú kú nū ú pīya ɔdīcííci, klla cɛ̄ lɛ uwá lɛ ɔ́ yálé ɔgbɛ́fú.

⁴⁴A mīyɛ okwutɛ kú ɔcɛ́ kú nū, a klla le akpa kú ɔcɛ́ kú nū wúla tāajɛ.

⁴⁵A cɛ̄ lɛ ɔ́ kwú hīla ókplící gbɔbū lɛ eko kú nu ɛɛ́. A klla le uwēyī je lɛ ɔ́.

⁴⁶Óndú, a géē je īyī uwɔ tayínū piyóó nɛɛ? Eko nyá nɛ̄ ícɔ̄nū kú uwɔ géē yɔ̄ í yi bɛ̄ɛka ɔlá gaá kwu ā?

⁴⁷Blakwu ɛ́gɛ́nɛ̄ oyēeyī kú um le kpií lɛ ā. Ɔmɛ mɛ́mla ajɛ nāa kē le yá odúúdú alɛɛcɛ á.

⁴⁸Ɔ̄nyɛ géē lɛ́ɛcɛ í bū ajī nɛ̄ ó gáā kwú ŋ́ māā? Ɔ̄nyɛ géē ce īyī nū ō ga ipú únóji glá ā?

⁴⁹Óndú, iní nɛ̄ ocābɔ̄ kú ihɔtū nāa tɛtɛ lɛ ā yɔ̄ ā? Iní nɛ̄ okónu nāa ce lɛ Udéfīdi ā yɔ̄ ā?

⁵⁰Ā je mlanyī ɛ́gɛ́nɛ̄ é ī cá ami nōo wɛ ɔ̄cocɛ̄hɔ̄ kú uwɔ nyā ɛcá ā ŋ́, ɛ́gɛ́nɛ̄ n lɛ ɔtū lé kpɔ́ lɛyíkwu odúúdú ɛcá nɛ̄ aéwɔhá ā cá um ā.

⁵¹Aólɛlā kú uwɔ, bá í cá ɔcɛ́ nāa fu ā ɛcá, Óndú. Ɛga dúúmā nɛ̄ ó nyɔ̄, é bá í cá ɔ̄ ɛcá.

⁵²Cɛ̄tra Óndú piyóó ipú ɛcɛ nyā. Aamí.