Read idoma AÍJĒ KÚ Ɛ̄GBĀ 9 Bible Online

AÍJĒ KÚ Ɛ̄GBĀ 9 - idoma bible

AÍJĒ KÚ Ɛ̄GBĀ 9

¹N gē bī odúúdú ɔtū kú um lɛ cɛ̄tra Óndú ā. Óndú, n gē ka odúúdú úklɔ́ abɔ̄ kú idáagó kú uwɔ ā tɛ́ɛcɛ.

²N géē gwéeyē klla í gwíijē ohígbū ɔdā nāa yá ā. N géē gwíijē í cɛ̄tra awɔ Óndú nōo lɔfú fíyɛ́ dúú ā.

³Eko dúú nāa lɛ iyī uwɔ mafú lɛ aólɛlā kú um, é géē kwúcē ŋmá ɛgiyí um, géē gwōnū gblugudu klla í pɛ́ kwú.

⁴Ohígbū ka, a cīcē akpa kú ɔcɛ́ kú uwɔ yɔ̄ ī hɛ́pɔ̄ okpaakpa gā um. A kē le ɛpɔ̄hi hɛ́ gā um.

⁵A le aéwɔhá o pɛ̄cí ŋmɛ́pɔ̄bí. A klla le ācobɔ̄bíipú ā kpó yíífi. A le iyē kú uwā ŋmónyí ŋmá ipú ɛcɛ nyā piyóó.

⁶Aólɛlā kú alɔ kwú gblífi tāajɛ dúúdú nɛ̄ alɔ í má uwā gɛ ŋ́. A kwú aígelī nɛ̄hi kú uwā ú kpó catāajɛ. Ācɛ kwú mlanyī uwā dúúdú ɛɛ́.

⁷Amáŋ Óndú ā wɛ ɔcɛ́ piyóó. Akpa kú ɔcɛ́ kú nū kwu kóō kɛpɔ̄ okpaakpa.

⁸Ó gē gbō ɛcɛ mla ucē okpaakpa, klla ī bī ɔ̄kwɛ̄yi mɛ́mla okpaakpa kɛpɔ̄ tū alɛɛcɛ.

⁹Ɛgiyí Óndú ā nɛ̄ ācɛ nēé gē pīyatū ā, gē nyɔ̄ ī tayínū á. Ó wɛ ɛga nɛ̄ ācɛ gē kwu tayínū eko kú unwalu.

¹⁰Óndú, odúúdú ācɛ nēe jé uwɔ ɔkwɔ̄ɔ̄kwɛ̄yi ā, lɛ ɔtūce uwɔ, ohígbū ka awɔ, nōo wɛ Óndú ā í gē cīgbīhi kwú ɔ̄cɛ dúúmā nōo í wā ɛgiyí uwɔ ká ā tú uwā abɔ̄ ŋ́.

¹¹Aá gwíijē, kú aá cɛ̄tra Óndú ā, nōo lā Usáyɔn ā. Aá ka ɔdā nɛ̄ Óndú yá ā tɛ́ɛcɛ ipú ācɛ.

¹²Ɔwɔicō gē blakwu ācɛ nēe gē móōwē ā. Ó gáā mlanyī ikwū nēé gē je ā ŋ́. Ó kē í yá ācɛ nēe gē yá uwā ɔdōbɔ̄bí ā italā.

¹³Méyīnyinyi um, Óndú. Má ōwē mɛ́mla ákanya nɛ̄ aólɛlā kú um tū klá um, nɛ̄ n yɔ̄ ī má nyā. Lɛ um nyatá ŋmá ikwū, Óndú.

¹⁴Ká n̄ géē háyi iyɔ̄bū odúúdú ācɛ kú Ujɛrúsālɛm, ká n̄ da uwá, ɔdā nōo yá ɛ́ɛ́ nɛ̄ n gē cɛ̄tra uwɔ ā. N gē gwéeyē ohígbū ka a lɛ um nyatá.

¹⁵Aéwɔhá má gwōnū tá ipú ɔ̄gɔ̄ nēé bū ā ɛɛ́. Ukpa nēe jē ā le uwá kwú ɛɛ́.

¹⁶Óndú ā le iyī nū mafū ipú ɛpɔ̄ okpaakpa nɛ̄ ó ka ā ɛɛ́. Ɔ́bíipú kú ācobɔ̄bíipū ā le uwá kwú bɛ̄ɛka ukpa ā ɛɛ́.

¹⁷Ikwū wɛ oŋmɛ́yí kú odúúdú ācobɔ̄bíipū mla odúúdú ācɛ nēe tá ɛlā kú Ɔwɔicō ā á.

¹⁸Ɔwɔicō í gáā mlanyī ācɛ nɛ̄ ɛgbá ce uwá ā gbógbóō ŋ́. Ó gáā leyī gwō eyī ō ce kú ogbɛhá bónū piyóó ŋ́.

¹⁹Wā Óndú, ā cɛ̄ lɛ ɔlɛɛcɛ lɛ uwɔ yálé ŋ́! Lɛ odúúdú aéwɔhá ā kpó wā iyɔ̄bū uwɔ, cɛ́ɛ́ ká ā lɛ ɛpɔ̄ ka tū uwā, cɛ́ɛ́ a lɛ uwá ŋmɛ́pɔ̄bí.

²⁰Óndú, lɛ ufi tū uwā. Lɛ yá kéē le jé ka, aá ɔ́ɔ wɛ alɛɛcɛ áncā nɛ̄ n.