Read idoma AÍJĒ KÚ Ɛ̄GBĀ 90 Bible Online

AÍJĒ KÚ Ɛ̄GBĀ 90 - idoma bible

AÍJĒ KÚ Ɛ̄GBĀ 90

¹Óndú, awɔ húmáyī lɛbɛ̄ɛka ɔlɛ́ alɔ á.

²Gbɔbū ɛ́ɛ́ ká ā yá ɛcɛ ámāŋ ka ɛfú ā, a wɛ Ɔwɔicō eko nɛ̄ ó gē mɛ ŋ́, a klla í wɛ Ɔwɔicō ga opiyóó ipú ɛcɛ nyā.

³A da ɔ̄cɛ kɔ́ɔ̄ kwúcē ga ɔdā nɔ́ɔ tɛtɛ wɛ ā, a kwú ɔ̄ ú kwúcē ga úmúlá.

⁴Ɛ̄cī úlā ɛpa ce ofu igwó (1,000) wɛ ɛ̄cī éékpónú ɛgiyī uwɔ é lɛbɛ̄ɛka ɛ́nɛ̄ nōo wā í le yɛ ɛɛ́ mā. Ó klla lɛbɛ̄ɛka eko kpií kú otú ā.

⁵A gē bī oyéeyī kú alɔ wā oŋmɛ́yí igbledū. Oyēeyī kú alɔ le kpií bɛ̄ɛka ɔ̄na nɛ̄ ɔ̄cɛ ī nā ā, alɔ lɛbɛ̄ɛka ácí nōo le bū ɔ̄cɔ̄ɔ̄cī,

⁶le jɛ̄ klla le héepū, nēe kwú ŋmɔ́ɔ́lá klla gekwú ɔ̄nɔ̄ɔ̄nɛ̄ ā nɛ.

⁷Ícɔ̄nū kú uwɔ ā gē tū alɔ ufi, ánya kú uwɔ ā ī kpó alɔ yíífi ɛɛ́.

⁸A kē jé odúúdú íne nɛ̄ alɔ bīya ā. Ó kōō ɛ̄nɛ̄ alɔ bīya tayínū ā, a kē jé dúú.

⁹Ícɔ̄nū kú uwɔ lɛ oyēeyī kú alɔ hɛ́ kpií, ó gebí tāajɛ bɛ̄ɛka owu ohīlatá ā.

¹⁰Iháyí ofu ɛtá ce igwó piyóó nɛ̄ alɔ lɛ ipú ɛcɛ nyā á. Alɔ gē ga iháyí ofu ɛnɛ, ɔ́dāŋ ka alɔ lɔfú nɛ̄hi. Nááná, ɔdā nɛ̄ iháyí ā gē bī gē lɛ alɔ ā, wɛ ɔtūnōbí mla unwalu. Oyēeyī gē mɛ fíyaa cɛ́ɛ́ alɔ kē le wu le yɛ.

¹¹Ɔ̄nyɛ má odúúdú ɔfu kú ícɔ̄nū kú uwɔ ā jéjée ɛɛ́? Ɔ̄nyɛ jé ɛdɔ ufi nɛ̄ ɔnū ō ce kú uwɔ gē bī wā ā?

¹²Le nwū alɔ ɛ́gɛ́nɛ̄ oyēeyī le kpií lɛ ā, cɛ́ɛ́ ká alɔ le íjéeyī jé.

¹³Eko nyá nɛ̄ ícɔ̄nū kú uwɔ nyā géē yɔ̄ gaá kwu ā? Óndú, ményinyi kú ācocɛ̄hɔ̄ kú uwɔ.

¹⁴Lɛ alɔ tūmu mla ihɔtū nāa ī mafú ɔ̄cɔ̄ɔ̄cī dóódu ā, cɛ́ɛ́ ka ɔtū kóō he alɔ, ká alɔ bá ī gwíijē ɛjɛ̄ɛ̄jī eko kú oyēeyī kú alɔ.

¹⁵Lɛ éeyē nɛ̄hi je lɛ alɔ ɛ̄jīla kú ɔtūnōbí nɛ̄hi nāa je lɛ alɔ eko kú odúúdú iháyí kú ōwē kú alɔ ā.

¹⁶Yá kú alɔ nēe wɛ ācocɛ̄hɔ̄ kú uwɔ ā, kú ālɔ̄ má úklɔ́ nɛ̄hi kú uwɔ ā. Ipɔ́ɔma kú alɔ kóō má ɛgahi mɛ́mla ɔfú nɛ̄hi kú uwɔ ā.

¹⁷Óndú, Ɔwɔicō kú alɔ, a gbonɛnɛ lɛ alɔ. Lɛ úklɔ́ abɔ̄ kú alɔ bu tū lɛ alɔ, cɛ̄ ká alɔ jɛ̄ gɔbū ipú ɔdā dóódu nɛ̄ alɔ gē yá ā.