Read idoma AÍJĒ KÚ Ɛ̄GBĀ 94 Bible Online

AÍJĒ KÚ Ɛ̄GBĀ 94 - idoma bible

AÍJĒ KÚ Ɛ̄GBĀ 94

¹Óndú, a wɛ Ɔwɔicō nōo gē yá ɔ̄cɛ italā á, lɛ ícɔ̄nū kú uwɔ mafú.

²Awɔ gē hɛ́pɔ̄ kú ācɛ dóódu á, cāŋjɛ ká ā je ɔdā nōo cíkā lɛ ācoyɔ́bɔ́ɔ̄cɛ ā lɛ uwá.

³Eko nyá nɛ̄ ācobɔ̄bíipū ā géē bá ī gwéeyē gaá kwu ā? Óndú?

⁴Eko nyá nɛ̄ ācoyɔ́dōbɔ̄bí ā géē yɔ́bɔ́ɔcɛ gaá kwu ā. Eko nyá nēé géē bá ī gwō ipú ɔdōbɔ̄bí nēé bá gē yá ā gaá kwu ā?

⁵É gē da ācɛ kú uwɔ bá ajɛ, Óndú, é ī pīya ācɛ nēe wɛ ákú uwɔ ā tū.

⁶É kpó anyókwū mɛ́mla ayókwū ŋmó, é klla gē kpó aúgbɔga nēe lā ipú ajɛ kú alɔ ā ŋmó.

⁷É kahíníī, “Óndú í má alɔ ŋ́, ó kē jé ɔdā nɛ̄ alɔ bá ī yá nyā ŋ́.”

⁸Aá ācɛ o yá ucē obɔ̄bí, ɔdíyá nɛ̄ aá géē bá ī líla lɛ ā piyóó ā? Eko nyā nɛ̄ aá géē kllɔcɛ́ kú aá jé odée ā?

⁹Ɔwɔicō nōo yá ahɔ̄ kú alɔ ā í gáā pó ahɔ̄ glá ŋ́ nɛɛ? Anú nōo yá eyī kú alɔ ā, í klla mɛ́ɛbɛ glá gɛ ŋ́ nɛɛ?

¹⁰Anú nōo ī dɛ̄gba tū aéwɔhá ā, ó gaá yá aótrɛ̄yí obɔ̄bí kú alɔ ā italā gɛ ŋ́ nɛɛ? Anú nōo gē nwū odúúdú ɛlā ā, ó lɛ ā, ó klla jé ɔdā dúúmā gɛ ŋ́ nɛɛ?

¹¹Ɔwɔicō jé ɔdā nēé gē gbɛlá ā, ó kē jé ɛ́gɛ́nɛ̄ ohílīpú kú uwā wɛ ákú olíla lɛ ā.

¹²Óndú, ó lɔhi nɛ̄hi lɛ ɔ̄cɛ dúúmā nāa ī nwū ɔ̄ odée ā, nāa klla ī nwū ɔ̄ íne otīihɔ kú uwɔ ā.

¹³A ī je omlɛ́nyɔ́ lɛ ɔ́ ŋmá ɛ̄cī kú unwalu, jāā gbéeko nēé lɛ ɔ̄gɔ̄ bū kéē lɛ ācobɔ̄bíipū ā kpó kwú.

¹⁴Óndú, í gáā mā ācɛ ɔlɛ́ nū tá ŋ́, ó gáā cīgbīhi kwu ācɛ nēe wɛ ákú nū ā ŋ́.

¹⁵Aɔ́cɛ́ ohɛ́pɔ̄ klla ī gbɔɔ́ ō hɛ́pɔ̄ okpaakpa kpɔ́ ɛɛ́. Odúúdú ācɛ o yá ɔdā olɔhi ipéyī kú Óndú ā, kē í cɛ̄ tɔ̄há mla ɛpɔ̄ okpaakpa ā.

¹⁶Óndú ōfōōfūnū tá um abɔ̄ lɛyíkwu ācobɔ̄bíipú mɛ́mla ācoyódōbɔ̄bí nyā á.

¹⁷Ɔ́dāŋ ka Ɔwɔicō í tá um abɔ̄ ŋ́ nɛɛ, n géē yɛ í gekwú le tá ɔlékwū gbojī ɛɛ́.

¹⁸N dɛ̄gba kahíníī, “N gáā kwú ɛɛ́.” Amáŋ ihɔtū kú uwɔ nāa ī mafú eko dóódu ā bī um háyi icō á.

¹⁹Eko dúú nɛ̄ ɛlā kú ɔdā dúúmā le kwú um iyē, a gē tá um ɔtū lé, klla ī cɛ̄ lɛ ɔtū gē he um.

²⁰Á lé tɔ̄há mla aɔ́cɛ́ ōhɛ́pɔ̄ újí ŋ́, nēe gē je ɛga lɛ ɛpɔ̄ nɛ̄ ó le kpaakpa ŋ́ mā ā.

²¹É kē ī tū ujɔ̄ tū ācɛ olɔhi klla í ŋmó ācɛ nēé lé ɛpɔ̄bí ŋ́ mā ɛpɔ̄bí, cɛ́ɛ́ kéē lɛ uwá kpó ŋmó.

²²Amáŋ Óndú ī cɛ̄ɛpɔ̄ um á. Ɔwɔicō kú um ī gbo um á.

²³Óndú, géē yá uwā italā ohígbū ɔ́bíipú nēé bī ā piíí. Ó géē je uwá kpó yíífi, ohígbū íne nēé bīya ā. Óndú, Ɔwɔicō kú alɔ géē kpó uwā yíífi.