Read idoma AÍJĒ KÚ Ɛ̄GBĀ 96 Bible Online

AÍJĒ KÚ Ɛ̄GBĀ 96 - idoma bible

AÍJĒ KÚ Ɛ̄GBĀ 96

¹Aá gwíijē ɛ̄yīpɛ̄ lɛ Óndú, odúúdú ācɛ kú ɛcɛ, aá gwíijē lɛ Óndú.

²Aá, gwíijē lɛ Óndú kú aá cɛ̄tra anú. Aá tɔ́ɔna kú ɛ́gɛ́nɛ̄ ó gē nya alɔ tá ɛ̄cī dóódu ā.

³Aá tɔ́ɔna kú ɛ́gɛ́nɛ̄ ó lɔfú lɛ ā, lɛ odúúdú aéwo. Aá kē bī úklɔ́ nɛ̄hi nɛ̄ ó yá ā le tɔ́ɔna lɛ odúúdú ācɛ.

⁴Óndú ā lɔfú nɛ̄hi, ó cíkā kéē cɛ̄tra uwɔ nɛ̄hi. Ó cíkā kéē yúufi nū fíyɛ́ aɔ́wɔ ɔhá dóódu.

⁵Aɔ́wɔ kú odúúdú aéwɔhá wɛ aójibó kú aɛ́cí nɛ, amáŋ Óndú ā yá ɔkpáncō á.

⁶Ɛgahi mɛ́mla ojīlīmā kú ɔcɛ́ kē yɛ ɔ́ jīla tá. Ɔfú mɛ́mla ɔhi le mu ipú Agblīihɔ-nɛ̄hi kú nū.

⁷Aá cɛ̄tra Óndú, odúúdú ācɛ kú ɛcɛ. Aá cɛ̄tra ɛgahi mla ɛ́gɛ́nɛ̄ ó lɛ ɔfú lɛ ā.

⁸Aá cɛ̄tra ɛ́gɛ́nɛ̄ Óndú tū ɛgahi lɛ ā, aá bī ɛhi mla iyó ɛya nɛ̄ aá ī gwó ā wā ipú Agblīihɔ-nɛ̄hi kú nū.

⁹Aá gbā Óndú ɛ̄gbā ɛ́gɛ́nɛ̄ ó tīihɔ lɛ ā, aá tú iyī aá wā ɛgiyí nū, odúúdú ācɛ kú ɛcɛ.

¹⁰Aá ka lɛ odúúdú aéwo kahíníī, “Óndú ā wɛ ɔcɛ́.” Ó kwú ɛcɛ ú kwu ajɛ, nɛ̄ ó gáā tōō fu glá ŋ́. Ó géē kɛ́pɔ̄ ɔ̄kwɛ̄yi lɛ odúúdú ācɛ.

¹¹Aá gwéeyē, ɛcɛ mɛ́mla ɔkpáncō. Ísu mɛ́mla ɔdā dóódu, nēe bá ipú nū ā, kéē tá úgbagwú kéē yá uya.

¹²Ipácí mla ɔdā dóódu nēe bá ipú nū ā, kéē gwéeyē. Aɔ́cī mɛ́mla ābɔ̄ kú uwā géē tɔ́ɔga kú éeyē dúú,

¹³eko nɛ̄ Óndú í wā gaá ce ɔcɛ́ ipú ɛcɛ nyā ā. Ó géē ce ɔcɛ́ klla í gbō odúúdú ācɛ kú ipú ɛcɛ nyā mla okpaakpa, ó klla í hɛ́pɔ̄ ɔ̄kwɛ̄yi lɛ ācɛ ā.