Read idoma AÍITA 1 Bible Online

AÍITA 1 - idoma bible

AÍITA 1

¹Aíta nɛ̄ n gáā kwu lɛ aá nyā wɛ ákú Usólōmɔn, ɔyí kú Udéfīdi, nōo wɛ ɔcɛ́ kú Ísrɛ̄lu ā.

²Aíta nēe bá ā géē cɛ̄ lɛ ācɛ̄ kéē jé odée lɛyíkwu íjééyī, mla ɛlā olɔhi nēé nwū uwā ā, mɛ́mla o cɛ̄ lɛ ācɛ kéē jɛ́yí kú ɔdā lipú lipú.

³Aíta lɔfú nwū ɔ̄cɛ ɛ́gɛ́nɛ̄ ó géē lā oyēeyī ipú ɔdā ō jé nɛ̄hi, ohílīpú, ucē okpaakpa, ɔkwɛ̄yi mɛ́mla ō leyī yɛ ɛlā ɔwɛ ojōnjīlɛ̄.

⁴Aíta lɔfú je ogwuda pīya ojéeyī nɛ̄hi glá. Ó klla lɔfú nwū aɛ́drɔ́ kéē yá ɔdā nōo í tá iyī uwā abɔ̄ glá.

⁵Ita lɔfú yá kú ɔ̄cɛ ojéeyī kóō jɛ́yí kú aódée tōō tū ɔ̄ glá. Ó klla gē bī ɔ̄cɛ ojɔ́dā jé ɔwɛ.

⁶Kéē jɛ́yí ita, mɛ́mla ɛyí ācīije mɛ́mla ɛyí gbúbitā nɛ̄ ācɛ ojéeyī gē ka ā.

⁷Aá lɛ ojīlīmā ō ce Óndú ká ā klla cɛ̄ɛ̄lā nū. Ɛ̄nyā wɛ ohútu kú ɔdōojé á. Aólíla leyī gwō íjééyī mɛ́mla ɛlā nēé ī nwū uwā ā bónū.

⁸Ɔyí um, pó ɛlā nɛ̄ ádā uwɔ gē nwū uwɔ ā, ā kē híī tá ɛlā nɛ̄ ɛ́nɛ́ uwɔ gē nwū uwɔ ā ŋ́.

⁹Ohígbū ka ɛlā nēé gē nwū uwɔ ā géē cɛ̄ gā uwɔ yá ucē olɔhi, nōo í yá káā he ācɛ ɔtū ō má. Ó klla lɛbɛ̄ɛka ɛ́cɛ otɔ̄kɔ nōo gē je uwɔ héyīfuú ō má ā.

¹⁰Ɔyí um, ā híī cɛ̄ lɛ ācɛ o bīyíne plla uwɔ nyɔ̄ í yá ɔdōbɔ̄bí mla uwá ŋ́.

¹¹Eko ōhī nēé da uwɔ kahíníī, “Wā kú ālɔ̄ cɛ̄tɔ̄há nyɔ̄ í kwāajɛ ɔwɛ, cɛ́ɛ́ ká ālɔ̄ lɛ ɔ̄cɛ éyi ŋmó tónū icííci nááná nɛ̄ ó yá alɔ ɔdā dúúmā ŋ́ mā.

¹²É lɔfú yēeyī nɛ̄ ɔdā dúúmā í yá uwā ŋ́ eko nɛ̄ alɔ má uwā ā glá, amáŋ é géē kwú ga ɔlékwū eko nɛ̄ alɔ lɛ ocɛ̄bí cɛ̄bi yá uwā kwɛyí.

¹³Alɔ géē má ɛdɔ agbénú dóódu, nɛ̄ alɔ géē kpó ŋmá ɛgiyí uwā í bá ipú inu ɔlɛ́ alɔ.

¹⁴Wā kú ālɔ̄ nyɔ̄ tɔ̄há, ká ālɔ̄ kɔ̄ ɔdā dúúmā nɛ̄ alɔ géē kpó ā.”

¹⁵Ɔyí um, ā híī yɛ mla ɛdɔ ká ācɛ ɛ́gɔ́ɔmā ŋ́, ɛ́ɛ́ nāa kōō ī ga ɛga dúú mla uwá ŋ́. Lɛ ikpó kú uwɔ hɛ́ ŋmá ɔwɛ kú uwā.

¹⁶Ikpó kú uwā ī kwinya nyɔ̄ í yá ɔdōbɔ̄bí. É klla le tútū kéē nyɔ̄ í ŋmó ɔ̄cɛ eko dóódu.

¹⁷Eko nāa gē jē íkōtō tá ajɛ lɛ ígbáanɔ, anɔ́ɔ ó kē yɔ̄ ī má uwɔ á, ó gáā cɛ̄ túbla íkōtō ɔ́ɔmā ŋ.

¹⁸Amáŋ ɛdɔ ācɛ nēe bá ā í lɛ ā ŋ́, ohígbū kéē bá yɔ̄ ī jē ukpa tá ajɛ lɛ iyī uwā, uwá nɛ̄ ukpa nēé je pií ā kē gáā ŋmó á.

¹⁹Ɛ́gɔ́ɔmā nɛ̄ oyēeyi kú ācɛ ohéjulúgwu ā lɛ á. Obé kú ācɛ ohéjulúgwu ā gē wɛ ikwū kú uwā á.

²⁰Aá jāhɔ̄, íjééyī lɛbɛ̄ɛka ɔ̄cɛnyā nōo yɔ̄ ī dɛ̄gba ipú úláyi gbōō, nōo klla yɔ̄ ī je ɔkɔ gicō yɔ̄ ī dɛ̄gba ipú ōlihī ā.

²¹Ó le ɔkɔ cɛyí yɔ̄ ī dɛ̄gba nɛ̄hi okónɔɔwɛ kú igá kú igelī nɛ̄hi ā mɛ́mla ɛga dúúmā nɛ̄ ācɛ le jīla bá.

²²Ó yɔ̄ ī da uwá kahíníī, “Aólíla, eko nyá nɛ̄ aá géē lííla gaá kwu ā? Eko nyá nɛ̄ aá géē yá ɔdōōjé ɛbɛ́ gaá kwu ā? Ń ba aá í gáā tíne kú aá jé ɔdá dúúmā ŋ́ nɛɛ.

²³Jāhɔ̄ eko nɛ̄ n gē lɛ abɔ̄ pi uwɔ ahɔ̄, n gē tū uwɔ ukɔ́ olɔhi ká ā lɛ ukpɛ̄ kú ɔdōōjé kú um lɛ.

²⁴Abɔ̄ n lɛ igwú hī, nā á jāhɔ̄ ŋ́ mā, nɛ̄ n lɛ abɔ̄ nāańdaa gā uwɔ, nɛ̄ á wā ŋ́ mā,

²⁵nā á lɛ ɛlá wu ɛlā dúúmā nɛ̄ n gē nwū uwɔ ā ŋ́ mā, ɛ́ɛ́ nāa kōō ī cɛ̄ gā um nā uwɔ tɔ́ɔwɛ ŋ́ mā,

²⁶Ohígbū ɔ́ɔmā, eko dúúmā nāa le tá ipú unwalu, n géē yɛhɛ tū uwɔ nɛ̄hi klla í yá uwɔ ɛbɛ́.

²⁷Eko nɛ̄ ɔdā ufi wā í klá uwɔ bɛ̄ɛka owu nɛ̄hi nōo ī tá eko nɛ̄ ɔwɔ ī yā ā. Eko nɛ̄ ámíyā gaá klá awɔ, le uwɔ ɔtū wuklíicō ā, n kē í yɛhɛ tū uwɔ.

²⁸Eko ɔ́ɔmā, é géē hī um igwú, amáŋ ń gāa cɛ̄ ŋ́. É géē bá ī tíne um nɛ̄hi, amáŋ é gáā má um ŋ́.

²⁹Ohígbū keé tíne kéē jé ɔdā dóódu jéjéēē ɛ́ɛ́ ŋ́, é klla ī tá ō lɛyítáajɛ lɛ Óndú ā.

³⁰É mīyɛ ɛlā dúúmā nɛ̄ n nwū uwā ŋ́, ɛ́ɛ́ nēe gē mīyɛ ahɔ̄ dúúmā nɛ̄ n pi uwá anú ā ŋ́.

³¹Ohígbū ɔ́ɔmā, é géē mīyɛ ulé kú ɔdā nēé yá ā piíí. Ucē kú uwā piíí ā gáā tū ōcē klá uwá á.

³²Aógwuda gē kwú ohígbū íjééyī nēé tá ā. Á lɛ ɛlá wu ɔdée ŋ́ kú olíla gē je ɔ́ yíífi á.

³³Amáŋ, ɔ̄cɛ nōo jāhɔ̄ gā um ā, géē yɔ̄ ɛbɔ́. Ó géē lā ɛbɔ́ nōó gáā yúufi ɔdōbɔ̄bí dúúmā nōo géē yá ɔ̄ ŋ́.