Read idoma AÍITA 10 Bible Online

AÍITA 10 - idoma bible

AÍITA 10

¹Ɔyí ōjéeyī gē cɛ̄ lɛ ɔtū gē he ádā nū. Ɔyí olíla, gē bī ɔtūnōbí gé lɛ ɛ́nɛ́ nū.

²Agbénú nɛ̄ ɔ̄cɛ lɛ ɔwɛ obɔ̄bí ā, í gē lɔhi lɛ ɔ́ ŋ́. Amáŋ ucē ɔkwɔ̄ɔ̄kwɛ̄yi ō yá, lɔfú nya oyēeyī kú ɔ̄cɛ tá glá.

³Óndú ā í gáā mā ācɛ olɔhi tá lɛ ɛmiyɛ ŋmó uwā ŋ́, amáŋ, ó gē cɛ̄ lɛ ācobɔ̄bíipú ā lɛ ɔdā nēé cɛgbá ā ŋ́.

⁴Abɔ̄ ō tá áncā ohígbū ahi, í cɛ̄ lɛ ɛhá gē kwú ɔ̄cɛ. Amáŋ o cēyītīkwū yúklɔ́ lɔfú gē cɛ̄ lɛ ɔ̄cɛ gē lɛ agbénú.

⁵Ɔyí ojéeyī gē cē ɔdɛ̄hɔ̄ kú nū eko ɔnɔ̄. Amáŋ ɔyí nōo gē gbiyɔ̄lā eko nɛ̄ ācɛ gē cē ɔdɛ̄hɔ̄ ā, gē cɛ̄ lɛ uwēyī kwú ɔ̄cɛ.

⁶É géē hɔ́hā ce ɔ̄cɛ olɔhi mɛ́mla ɔ̄cɛ okpaakpa, amáŋ ɔ̄cobɔ̄bíipú gē bī ɛlā okónu kú nū le kpó ucē ɔbíipú kú nū tayínū.

⁷Eko nɛ̄ ɔ̄cɛ olɔhi gekwú, ācɛ gē blakwu ɔdā nɛ̄ ó yá ā, cɛ́ɛ́ é gē gwéeyē, amáŋ eko nɛ̄ ɔ̄cobɔ̄bíipú gekwú, ācɛ gē mlanyī nū fíya.

⁸Ācɛ o lɛ ohílīpú gē lɛ abɔ̄ bī ɛlā olɔhi nēé nwū uwā a, amáŋ, ɔ̄cɛ nōo ī kɛlā íla ā géē je yíífi fíyaa.

⁹Ɔdā obɔ̄bí dúúmā í gáā yá ɔ̄cɛ nōo gē yá ucē ɔkwɔ̄ɔ̄kwɛ̄yi ā ŋ́. Amáŋ ɔ̄cɛ nōo ī yá ɔdā icííci ā, é géē kwú ɔ̄.

¹⁰Ɔ̄cɛ dúú nōo lɛ abɔ̄ klá ɔ̄kwɛ̄yi ā, gē hɛ́ unwalu tá ajɛ, amáŋ ɔ̄cɛ nōo ī ka ɔ̄kwɛ̄yi ā gē bī ɛbɔ́ wā.

¹¹Ɛlā nɛ̄ ɔ̄cɛ olɔhi ā gē ka ā lɛbɛ̄ɛka njɔlɔ nɛ̄ éŋkpɔ̄ kú nū gē cɛ̄ lɛ ɔ̄cɛ gē yēeyī ā, amáŋ ɛlā kú ɔ̄cobɔ̄bíipú ā wɛ ɛga otayínū kú ucē ɔ́bíipú.

¹²Ɔtū ɔ̄cɛ ō wú gē tū ikpɛ́lā klá ɛcɛ, amáŋ ihɔtū gē leyī gla obɔ̄bí alɛwa nɛ̄ ɔ̄cɛ yá ā bónū.

¹³Ācɛ o lɛ ohílīpú ā gē bī íjééyī le kɛlā. Amáŋ, é cíkā ō yá aólíla italā.

¹⁴Ācɛ ojéeyī gē nwū odúúdú ɔdōojé nēé lɔfú jé glá ā, amáŋ eko dúú nɛ̄ olíla gē kɛlā, ayíka unwalu í ligbó lɛ ajɛ gɛ ŋ́.

¹⁵Aólɔdu gē bī agbénū kú uwā lɛ gbō iyī uwā ŋmá unwalu dóódu, amáŋ ɛhá gē je ogbɛhá yíífi ŋmá ajɛ.

¹⁶Ulé kú olɔhi ō yá wɛ oyēeyī, amáŋ, íne obīya gē bī ɔ̄cɛ ŋmá ínoōbīya éyi ga ɔhá.

¹⁷Ācɛ nēe gē pó ɛlā nēé nwū uwā ā, yɔ̄ ī yɛ ɔwɛ kú oyēeyī á, amáŋ, ācɛ nēe gē tá kéē pi uwá ahɔ̄ ŋ́ mā, géē nyíleyī ŋmá ɔwɛ olɔhi ā.

¹⁸Ɔ̄cɛ dúú nōo gē wɔ́tū ɔ̄cɛ tíipíípú ā wɛ ɔ̄cɛ okɛ̄mgbɛ̄. Ɔ̄cɛ dúúmā nōo gē yá awanda ga amu ga ánū ā wɛ olíla.

¹⁹Ɛlā alɛwa ō ka gē cɛ̄ lɛ ɔ̄cɛ ī bīyíne fíyɛ́. Ɔ̄cɛ nōo gbēyī cíí ā, kóō lɛ okónu klá cíí.

²⁰Ɛlā kú ɔ̄cɛ olɔhi lɛbɛ̄ɛka oje nɛ̄hɛ́ ā, amáŋ ɛlā kú olíla í tīile dúúmā ŋ́.

²¹Ɛlā kú ɛ́nɛ́nɛ̄ ɔ̄cɛ tīile lɛ ācɛ alɛwa, amáŋ, íla kú aólíla ā gē ŋmó uwā á.

²²Óndú ā gē ma ogbonɛnɛ kú nū fú, o ŋmá lɛ ō cē agbénú klá ācɛ ōhī. Ó wɛ úklɔ́ ō yá lɔfú kú ɔ̄cɛ ōfōōfūnū ŋ́.

²³Ɔdōbɔ̄bí ō yá gē lɔnyɛ bɛ̄ɛka ijā ō he ā, tū aólíla. Amáŋ ucē kú íjééyī wɛ ɔdā o lɔnyɛ tū ɔ̄cɛ o jɛ́yí odée.

²⁴Ɔdā nɛ̄ ɔ̄cobɔ̄bíipú gē yúufi nū fíyɛ́ dúú ā, gáā wā í yá ɔ̄ á. Amáŋ ɔ̄cɛ okpaakpa ā gē lɛ ɔdā nōo kwu ɔ́ ɔtū fíyɛ́ ā, amáŋ ɔdā nēe tū ācobɔ̄bíipú ufi fíyɛ́ ā nēé gáā lɛ á.

²⁵Owu nɛ̄hi gē tá wā í je ācobɔ̄bíipú kpó ŋmá ajɛ. Amáŋ, ācɛ oyólɔhi nēe gē yá ucē okpaakpa ā, ɔdā dúúmā í gē lɛ abɔ̄ kwu uwá ŋ́.

²⁶O je úklɔ́ lɛ okwáahi gē tū íwɔ́tū bɛ̄ɛka ɔdā nɛ̄ ɔ̄cɛ le alemú ogwucɛ́kwɔ gwá nɛ̄ ayīnu kú nū le kwíijile ā, ámāŋ o lɛbɛ̄ɛka ódūdū nōo gē kwū tū ɔ̄cɛ eyī ā.

²⁷Ɔ́dāŋ ka a lɛ ojīlīmā ce Óndú ā, a géē lɛ́ɛcɛ nɛ̄hi, amáŋ ɔ̄cobɔ̄bíipú ā gē kwú gbɔbū lɛ eko kú nū.

²⁸Eyīyōce kú ɔ̄cɛ okpaakpa ā gē cɛ̄ lɛ ɔ́ gwéeyē, amáŋ acobɔ̄bíipú í lɛ ɔdā dúúmā nēé gē leyīcɛ ɔ́ ŋ́.

²⁹Óndú ā gē gbō ācɛ okpaakpa mɛ́mla ācɛ olɔhi ā á. Amáŋ ó géē je ācobɔ̄bíipú yíífi ŋmá ajɛ.

³⁰É gáā fu ɔ̄cɛ olɔhi mɛ́mla ɔ̄cɛ okpaakpa ā ikpó ŋmá ajɛ ā glá ŋ́, amáŋ Óndú ā géē je ɔ̄cɛ ō yá ɔdōbɔ̄bí yíífi ŋmá ajɛ.

³¹Ɔ̄cɛ okpaakpa ā gē kɛlā olɔhi ŋmá okónu wɛ̄ɛcɛ, amáŋ é cíkā ō lɛ ígblɛ́nyī kú ācɛ o kɛ̄mgbɛ̄ kpó hɛ́ ŋmá uwá okónu.

³²Ɔ̄cɛ okpaakpa ā, jé ɛdɔ ɛlā nōo gē gbɔtū nɛɛ, amáŋ ācobɔ̄bíipú ī kɛlā nōo gē bīya ɔtū.