Read idoma AÍITA 11 Bible Online

AÍITA 11 - idoma bible

AÍITA 11

¹Óndú ā gē wɔ́tū ɔ̄cɛ dúúmā nōo gē lɛ ɔdā o miya ɔdā kú újí miya odée lɛ ɔ́mpa nū ā. Amáŋ ɔtū kú ācɛ nēé gē lɛ ɔdā o miya odée kú újí miya ɔdā lɛ ācɛ ŋ́ mā gē he Óndú ā.

²Eko dúú nɛ̄ ɔ̄cɛ gbɔɔ́ ō yɔ́bɔ́ɔ̄cɛ ɛɛ́, ayíka uwēyī gáā kwú ɔ̄ ɛɛ́. Amáŋ, ɔ́dāŋ ka ɔ̄cɛ lɛ iyī nū tú wāajɛ, ayíka ó jéeyī.

³Ucē ɔ̄kwɔ̄ɔ̄kwɛ̄yi kú ɔ̄cɛ olɔhi gē bī ɔ̄ jé ɔwɛ á. Amáŋ ācɛ nɛ̄ ācɛ í lɔtūce uwá glá ŋ́ mā, ucē ɛ̄kɛ̄mgbɛ̄ kú uwā piíí ā gē ŋmó uwā á.

⁴Agbénú nɛ̄ ɔ̄cɛ lɛ nɛ̄hi ā, í gáā tá ɔ̄ abɔ̄ ɔwɛ dúúmā glá ŋ́, eko nɛ̄ ɛ̄cī ikwū kú nū gā. Amáŋ, okpaakpa mɛ́mla olɔhi gē nya ɔ̄cɛ tá ŋmá ikwū ámōōmɛ glá.

⁵Ɔ̄cɛ ɔkwɛ̄yi nōo klla lɛ uce olɔhi, géē lā oyēeyī nōo í tɔ́ɔtɛ́ lɛ ɔ́, amáŋ ucē obɔ̄bí kú ɔ̄cobɔ̄bíipú ā gē je ɔ́ yíífi á.

⁶Okpaakpa ká ācɛ ɔkwɛ̄yi gē nya uwá tá á, amáŋ, unwɔ̄dā ká ācɛ, nēé tōō lɔtūce ŋ́ mā gē kwú uwā bɛ̄ɛka ukpa ā.

⁷Eko dúúmā nɛ̄ ɔ̄cobɔ̄bíipú gekwú, eyīyōce kú nū dóódu gekwú mla anú. Eyīyōce kú ɔ̄cɛ nōó jé Ɔwɔicō ŋ́ ma wɛ áncā.

⁸É gē gbō ɔ̄cɛ okpaakpa ā, ŋmá unwalu kú nū, cɛ́ɛ́ ɔ̄cobɔ̄bíipú le tá ipú unwalu kwɛyí nū.

⁹Ɔ̄cɛ nōó jé Ɔwɔicō ŋ́ mā, gē bī okónu kú nū je ɔ́mpa nū yíífi. Amáŋ íjééyī mɛ́mla ɔdōōjé kú ɔ̄cɛ okpaakpa gē nya ɔ́ tá.

¹⁰Eko dúú nɛ̄ ɔ̄cɛ okpaakpa gē jɛ̄ gɔbū, odúúdú ācɛ kú ipú igelī nɛ̄hi ā gē gwéeyē, amáŋ eko dúúmā nɛ̄ ɔ̄cobɔ́bíipú gekwú, ācɛ gē tɔ́ɔga kú éeyē ipú igelī nɛ̄hi ɔ́ɔmā piíí ā.

¹¹Ɛhi nɛ̄ Óndú ā gē yá ɔ̄cɛ dúúmā nōo le kpaakpa kú ipú igelī nɛ̄hi dóódu ā, gē cɛ̄ lɛ igelī nɛ̄hi ɔ́ɔmā gbagbénú. Amáŋ okónu kú ɔ̄cobɔ̄bíipú gē je igelī nɛ̄hi ā yíífi tāajɛ.

¹²Ɔ̄cɛ dúúmā nōo gē bī okónū awanda kú nū le pi ācɛ ɔhá wāajɛ, wɛ ɔ̄cɛ ɔdāhá. Amáŋ ɔ̄cɛ ō tū ohílīpú mɛ́mla ojɔ́dā gē lɛ okónu klá cíí.

¹³Ɔ̄cɛ dúúmā í gē kɛlā ɔkwɛ̄yi lɛ ɔ̄cɛ o yá awanda ŋ́, ohígbū nɛ̄ ó géē nyɔ̄ í je ka lɛ ācɛ ɔhá. Amáŋ é gē kɛlā ɔkwɛ̄yi nōo í yɔ̄ ipú ɔtū glá ā, lɛ ɔ̄cɛ ɔkwɛ̄yi nēé lɔtūce ɔ́ glá ā.

¹⁴Éwo dóódu nɛ̄ ó lɛ ācɛ o nwū ɔ̄ ɛlā ŋ́ gē je yíífi, amáŋ ɔlɛ́ dúúmā nōo lɛ ācɛ o nwū ɔ̄cɛ ɛlā alɛwa ā, ɔdá dúú í gáā yá ɔ́ glá ŋ́.

¹⁵Ɔ́dāŋ nāa mīyābɔ̄ ugbɔga ka anúɔ gē cílá ulé nɛ̄ ó bī ā á, ā géē hííjémā. Ó gē lɔhi gā uwɔ fíyɛ́ ɔ́dāŋ́ ka á lɛ abɔ̄ kú uwɔ wu ɔ́ ŋ́.

¹⁶Ɔnyā nōo lɛ ohílīpú gbeeyī cíí ā, géē lɛ ojīlīmā, amáŋ, uwēyī géē kwú ɔnyā dúú nɛ̄ ó lɛ ohílīpú ŋ́. Ɔ̄cɛ okwáhi, nōo klla ī yá újulu, í gáā lɛ ije gbóógbóō ŋ́.

¹⁷Ɔ̄cɛ ogbonɛnɛ gē má itene kú ogbonɛnɛ, amáŋ ɔ̄cɛ olɔnɔɔtū gē yá iyī nū ágbe.

¹⁸Ɔ̄cobɔ̄bíipú ā í gē lɛ itene dúúmā ŋmá ɔ́bíipú kú nū ā ŋ́, amáŋ, ɔ́dāŋ́ ka ɔ̄cɛ dúúmā lɛ ɔdā nōo le kpaakpa yá, ó géē miyɛ ulé nū.

¹⁹Ɔ̄cɛ dúúmā nōo lɛ abɔ̄ kwu ɔtū ka anúɔ í yá olɔhi mɛ́mla ucē okpaakpa géē yēeyī. Amáŋ, ɔ̄cɛ nōo ka anúɔ í yá ɔdōbɔ̄bí ā, géē mīyɛ ulé nū.

²⁰Óndú ā gē wɔ́tū ācɛ o lɛ ɔtū obɔ̄bí. Amáŋ, ācɛ o yá olɔhi mɛ́mla o yá ɔdā okpaakpa ā, gē he ɔ́ ɔtū.

²¹É géē yá ācɛ obɔ̄bí ā italā piíí, amáŋ ācɛ ō yá olɔhi mla ācɛ okpaakpa ā í gáā móōwē ɔ́ɔmā ŋ́.

²²Ɔnyā dúúmā nōo le jɔ̄nyā klla lɔhi nɛ̄hi, nɛ̄ ó lɛ ohílīpú ŋ́, lɛbɛ̄ɛka ókóme nēé lɛ eliká kú ugóolu (oje ɔdɔ) wu ɔ́ ɛnwū ā.

²³Ɔdā dúúmā nɛ̄ ɔ̄cɛ o yá olɔhi gē dɔɔ̄kā ā, gē ŋmɛ́yí tá ipú olɔhi, amáŋ eko dúúmā nɛ̄ ɔ̄cobɔ̄bíipú le ɔdā nɛ̄ ó ī dɔɔ̄kā ā lɛ, ɛjɛ̄ɛ̄jī ācɛ gē cɔ̄nū.

²⁴Ɔ̄cɛ ōhī gē ŋmó ije kú uwā tū ācɛ ɔhá nɛ̄hi, nááná é kē yɔ̄ ī lɛ ije tōōtɔ̄ɔ̄. Amáŋ ɔ̄cɛ ōhī gē yá ukpɛ́ nɛ̄hi, nēé ŋmó ije tū ācɛ ɔhá glá ŋ́, nááná é kē bá yɔ̄ ī gbɛhá tōōtɔ̄ɔ̄.

²⁵Ɔ̄cɛ onwūlabɔ̄ ā géē lɛ ije mɛ́mla agbénú tū ɔ̄ gɔbū. Tá ācɛ ɔhá abɔ̄, cɛ́ɛ́ é kē í tú uwɔ abɔ̄ dúú.

²⁶Ācɛ gē tókónu lɛ ācɛ nēe gē kpó ɔdōlé tayínū gbéeko nɛ̄ ɔ́lá nū le tíicō, ɛ́ɛ́ kéē kpó wɛ̄ɛcɛ í je lá ígbólá nɛ̄hi ā. Amáŋ, ācɛ kē ī cɛ̄tla ācɛ nēe gē kpó ákú uwā wɛ̄ɛcɛ kē je lá ɔlá ɔlamu ā.

²⁷Ɔ́dāŋ́ ka a lɛ ɔtū kwu ɔdā olɔhi ō yá, é géē lɛ ojīlīmā ce uwɔ, amáŋ ɔ̄cɛ nōo ī tíne ikpɛ́lā ā, ikpɛ́lā nɛ̄ ó gáā má á.

²⁸Ɔ̄cɛ nōo lɔtūce agbénú kú nū géē je wúla tāajɛ ŋmá icō wāajɛ bɛ̄ɛka ēpū kú ɔcí eko ɔnɔ̄ ā. Amáŋ ɔ̄cɛ ō yá ɔdā okpaakpa ā, géē yɔ̄ ī jɛ̄ bɛ̄ɛka ēpū kú ɔcí kú okónu ɔkpá ā.

²⁹Ɔ̄cɛ dúúmā nōo hɛ́ ikpɛ́lā gé lɛ aíkonó kú ɔlɛ́ nū, í gáā lé úgwū ɔdā dúúmā ŋ́. Olíla gē wɛ ɔ̄cocɛ̄hɔ̄ kú ojéeyī piyóó á.

³⁰Ucē okpaakpa ō yá géē cɛ̄ lɛ ɔ̄cɛ ī lā oyēeyī olɔhi. Amáŋ ínoōbīya gē bī ikwū gé lɛ ɔ̄cɛ.

³¹ Ɔ́dāŋ́ ka ɔ̄cɛ ō yá olɔhi ā gē mīyɛ ulé kú nū ɛcɛ amānyā, a cíkā ō jé ka, é géē yá ācɛ obɔ̄bí mɛ́mla ācobīyíne ā italā kú ɔdā nēé yá ā ipú ɛcɛ nyā piíí.