Read idoma AÍITA 12 Bible Online

AÍITA 12 - idoma bible

AÍITA 12

¹Ɔ̄cɛ dúúmā nɛ̄ ɔdā ō jé he ɔ́ ɔtū, gē dɔɔ̄kā kéē da ɔ́ ɛga nɛ̄ ó nyíleyī ā. Olíla ōfōōfūnū gē tá kéē nā anúɔ tá ɔwɛ ŋ́ má.

²Ācɛ ō yá olɔhi ā gē he Óndú ā ɔtū á, amáŋ Óndú ā gē ŋmó ācɛ oyá ɔdōbɔ̄bí ā ɛpɔ̄bí.

³Ɔbíipú í gbō ācobɔ̄bíipú ā ɛyí ŋ́, amáŋ ɔ̄cɛ nōo lā oyēeyī okpaakpa ā, géē kwaajɛ kli bɛ̄ɛka ɔcí nōo lɛ ɛgba tá ga ipíípú ajɛ nɛ̄ ɔdā dúúmā í jíla anú iyē glá ŋ́ mā.

⁴Ɔnyā ō yá ucē olɔhi lɛbɛ̄ɛka ukata o klá ɛyí kú ɔbá nū ā. Amáŋ ɔnyā nōo gē bī uwēyī gé lɛ ɔbā nū ā, lɛbɛ̄ɛka ōcē obɔ̄bí ipú ikpokwú kú ɔbá nū ā.

⁵Ācɛ olɔhi gē gbɛlá ɔkwɔ̄ɔ̄kwɛ̄yi lɛyīkwu ɔ̄cɛ ɔhá. Amáŋ ɛlá nɛ̄ ācɛ obɔ́bíipú gē gbo ā wɛ obɔ̄bí mɛ́mla ɛ́plla.

⁶Ɛlā kú ɔ̄cɛ obɔ̄bíipú gē pla unwalu klá ācɛ, amáŋ ɛlā okónu kú ɔ̄cɛ okpaakpa ge nya ɔ̄cɛ tá.

⁷Ācobɔ̄bíipú ā géē je kpó yíífi ŋmá ajɛ dúúdú. Amáŋ ɔlɛ́ kú ɔ̄cɛ oyá olɔhi ā géē yɔ̄ piyóó.

⁸É gē cɛ̄tra ɔ̄cɛ ɛ́gɛ́nɛ̄ ó jéeyī nwuné lɛ ā, amáŋ ācɛ gē lɛ eyī gwō olīla bónū.

⁹Ɔ̄cɛ nōo le iyī nū tú wāajɛ, yɔ̄ ī yúklɔ́ o yá ɛ́ɛ́ kóō lɛ ɔdōlé má lé ā, lɔhi fíyɛ́ ɔ̄cɛ nōo kwú īyī nū ú ce icō, tá ka anúɔ í yúklɔ́ ŋ́, nōo kē yɔ̄ ī kwú ɛmiyɛ á.

¹⁰Ɔ̄cɛ oyólɔhi mɛ́mla okpaakpa gē lɛ ɛlá wu oyēeyī kú aɛ́bɛ́ kú ɔlɛ́ nū, amáŋ ɔ̄cɛ obɔ̄bíipú ā ī lɔnɔɔtū lɛ aɛ́bɛ́ kú ɔlɛ́ nū.

¹¹Ɔ̄cɛ nōo gē hɛ́hɔ̄ nɛ̄hi, gē lɛ ɔdōlé ō lé á. Amáŋ, ɔ̄cɛ nōo yɔ̄ ī mīya úklɔ́ báajɛ áncā ā, wɛ olíla, ɛmiyɛ ī ŋmó ɔ̄.

¹²Odúúdú ɔdā nɛ̄ ācobɔ̄bíipú ā ī dɔɔ̄kā ā, wɛ ko ō tíne ɔdōbɔ̄bí kéē yá. Amáŋ, ācɛ o yá ɔdā olɔhi ā le bū tū kli, bɛ̄ɛka ɔcí nōo tá ɛgba ga ipíípú ajɛ ā.

¹³Ɛlā okónu kú ɔ̄cɛ obɔ̄bíipú piíí gē kwú ɔ̄ á. Amáŋ ɔ̄cɛ ō kɛlā okpaakpa ā, gē nya īyī nū tá ŋmá unwalu.

¹⁴Ulé nɛ̄ ɔ̄cɛ gē mīyɛ ā, ŋmá lɛ ɛlā nɛ̄ ó ka mɛ́mla ɔdā nɛ̄ ó yá ā. Ɔdā nōo wɛ ukpɛ̄ kú uwɔ ā, nāa gē mīyɛ á.

¹⁵Aólíla gē gbɛlá ka ákú aá gē le kpaakpa eko dóódu á. Ojéeyī gē jāhɔ̄ lɛ ɛlā nēé gē nwū ɔ̄ ā.

¹⁶Eko nɛ̄ olíla le cɔ̄nū, ācɛ gē jé bōōbū. Amáŋ ɔ̄cɛ ojéeyī gē lɛ eyī gwō ɛlā afūlūmā bónū.

¹⁷Ɔ̄cɛ ō kɛlā ɔkwɛ̄yi, gē cījáalí ɔkwɛ̄yi á. Ɔ̄cɛ okɛ̄mgbɛ̄ gē cījáalí ɛ̄kɛ̄mgbɛ̄ á.

¹⁸Ɛlā nɛ̄ ɔ̄cɛ gē ka í lɛ eyī yɛ ɔ́ ŋ́ mā, gē lɔfú yá ɔ̄cɛ ágbe bɛ̄ɛka ɔkpacaŋ́gelī ā glá. Ɛlā ō ka ipú íjééyī ɛmɛɛma ā gē gbɔtū nɛɛ á.

¹⁹Ɛ̄kɛ̄mgbɛ̄ í gē lɛ́ɛ́cɛ ŋ́, ɔkwɛ̄yí lɛbɛ̄ɛka ohi kú íkínábɔ̄ ā nɛ, ó kē tōō pīyeyī ŋ́.

²⁰Ācɛ nēe gē yá ojuju obɔ̄bí ā, ī má ɔdā nēé leyīce ā ŋ́. Amáŋ, ācɛ nēe gē yúklɔ́, cɛ́ɛ́ kú ɛbɔ́ kóō le yɔ̄ ā, géē gwéeyē.

²¹Ɔdā obɔ̄bí í gē yá ɔ̄cɛ olɔhi mla ɔ̄cɛ ɔkpaakpa ŋ́, amáŋ ācobɔ̄bíipú ā í lɛ ɔdā ɔhá dúúmā gwū unwalu tá ŋ́.

²²Óndú ā gē wɔ́tū ācɛ okɛ̄mgbɛ̄ ā. Amáŋ ācɛ nēe gē lɛ okónu nēé ce ā tū ā, ɔtū kú uwā gē he Óndú ā.

²³Ācɛ ojéeyī gē lɛ okónu kú uwā klá cíí lɛyíkwu ɔdā nēé jé ā, amáŋ, olíla gē bī ogwuda kú nū tɔ́ɔna.

²⁴Abɔ̄ kú ɔ̄cɛ o yúklɔ́ diili ā gē je ɔ́ yá otrɛ̄yí á. Amáŋ, ɔ̄cɛ okwáhi mɛ́mla ɔ̄cɛ ō yá ujulu ā géē wɛ ɔfulajɛ piyóó.

²⁵Ɔtū ō plicō lɛyíkwu unwalu kú oyēeyī í gē cɛ̄ lɛ ɔ̄cɛ gwéeyē ŋ́. Amáŋ, ɛlā ogbɔtū nɛɛ gē bī éeyē wā ipú ɔtū kú ɔ̄cɛ.

²⁶Ɔ̄cɛ olɔhi mɛ́mla ɔ̄cɛ okpaakpa ā gē kwu hɛ̄ ɔdōbɔ̄bí tá. Amáŋ, ɔwɛ kú ācobɔ̄bíipú ā, gē bī ɔ̄cɛ bí.

²⁷Okwáhi í gē má ɔdā agbénú nɛ̄ ó ī tíne ā ŋ́, Amáŋ ɔ̄cɛ nōo leyī tá úklɔ́ ā gē yúklɔ́ lɔɔlɔhi, gē pīyɛ̄ agbénú nɛ̄hi.

²⁸Ɔwɛ kú ɔ̄cɛ okpaakpa yɛ ga ipú oyēeyī. Amáŋ ɔwɛ kú ɔ̄cɛ ɛ̄kɛ̄mgbɛ̄ gē ŋmɛ́yí ipú ikwū.