Read idoma AÍITA 13 Bible Online

AÍITA 13 - idoma bible

AÍITA 13

¹Ɔyí ojéeyī gē pó ɛlā kú ádā nū, amáŋ, ɔyí olíla ā, í páhɔ nēé gē pi ɔ́ ā ŋ́.

²É gē cílá ācɛ olɔhi ā ulé kú ɔdā nēé gē yá ā. Amáŋ, ɛmiyɛ kú ɔdōbɔ̄bí ō yá gē ŋmó ācɛ o plla ācɛ ā.

³Lɛlá kwu ɔdā nāa ī ka ā, cɛ́ɛ́ ká ā gbō oyēeyī kú uwɔ ŋmá unwalu. Ɔ̄cɛ dúúmā nōo ge lɛ ɛlá tū ipú ŋ́, gē kɛlā daála, géē je iyī nū yíífi nɛ̄ n.

⁴Ɛ́gɛ́ dúúmā, nɛ̄ ɔ̄cɛ okwáhi tíne ɔdā dúúmā lɛ, ó gáā lɛ ɔdā ɔ́ɔmā glá ŋ́. Amáŋ, ɔdā dúúmā nɛ̄ ɔ̄cɛ o cēyītīkwū ī yúklɔ́ olɔfú ā í tíne ā, ó géē lɛ.

⁵Ɛ̄kɛ̄mgbɛ̄ gē wú ɔ̄cɛ ɔkwɔ̄ɔ̄kwɛ̄yi ā ɔtū. Amáŋ ācobɔ̄bíipú gē yá ucē nōo ī kpó uwēyi tū uwā ɛyí.

⁶Okpaakpa gē gbō ɔ̄cɛ nɛ̄ ó jíikpó odée ŋ́ má. Amáŋ, ɔ́bíipú gē ŋmó ɔ̄cobīyíne á.

⁷Ācɛ ōhī gē yúula ka aá lɛ ije, amáŋ é kē lɛ ɔdā dúúmā ŋ́. Ācɛ ɔhá yúula ka aá gbɛhá, amáŋ é kē lɛ ije mɛ́mla agbénú nɛ̄hi.

⁸O lɛ ijē ā, gē bī ije kú nū lɛ nya oyēeyī kú nū tá. Amáŋ ɔ̄cɛ ogbɛhá ā í lɛ unwalu kú ɔ̄cɛ dúúmā nɛ̄ ó gē fu ɔ́ ɔnū ŋ́.

⁹Ācɛ okpaakpa ā lɛbɛ̄ɛka ɔlá nōo yɔ̄ ī fíyajɛ ŋmáaŋmaá ā. Amáŋ ɔ̄cɛ obɔ̄bíipú ā lɛbɛ̄ɛka ɔlá nōo yɔ̄ ī hɛ́ peke peke, yɔ̄ ī nyí ā.

¹⁰Unwalu ōfōōfūnū nɛ̄ ɔbɔ̄cɛ ō yá gē tū táajɛ á. Ɔ̄cɛ ojéeyī gē dɔɔ̄kā ɔ̄cɛ ō pīya ɔ́ tā ɔwɛ.

¹¹Agbénú nɛ̄ ɔ̄cɛ gē hágágā ī lɛ ā, gē hágágā ī mɛ fíyɛ́. Amáŋ agbénú ō lɛ ɛmɛɛma géē nyīla klla í gbojī.

¹²Eko dúú nɛ̄ eyīyōce kú ɔ̄cɛ í yɔ̄ gɛ ŋ́, otū kú nū géē bīya. Amáŋ eko nɛ̄ ɔdā nɛ̄ ó tíne ā le yá, ɔtū kú nū le mu mla éeyē.

¹³É le ɛlā olɔhi nwū uwɔ nāa tá, a gē bī unwalu gé lɛ iyī uwɔ. Ɔ́dāŋ ka, a yɛce ɛlā ɔ́ɔmā, a géē nyatá.

¹⁴Ɛlā ōnwū kú ɔ̄cɛ ojéeyī wɛ njɔlɔ kú oyēeyī. Ó géē tá uwɔ abɔ̄ ká ā kwu hɛ ikwū tá.

¹⁵Ohílīpú gē bī ojīlīmā mɛ́mla olɔhi gē lɛ ɔ̄cɛ. Amáŋ, ɔwɛ kú ɔ̄cɛ nēé lɔtūce ɔ́ glá ŋ́ mā, wɛ ikwū.

¹⁶Ācɛ otōhílípú ā gē lɛ eyī yɛ odée ɛ́ɛ́ nēé gē yá á. Amáŋ olíla i bī íla kú nū tɔ́ɔna, klla gē ma iyī nū fú.

¹⁷Ɔ̄cocɛ̄hɔ̄ nɛ̄ ó tōō lɔtūcē ŋ́, gē bī ācɛ ga ipú unwalu, amáŋ ɔ̄cocɛ̄hɔ̄ nōo le kpaakpa gē bī ɛbɔ́ gé lɛ ācɛ.

¹⁸Ɔ̄cɛ nɛ̄ ó gē pó ɛlā ōnwū ŋ́ mā, ɛhá mɛ́mla uwēyī géē kwú ɔ̄. Amáŋ ɔ̄cɛ nōo gē jé ɔdā ŋmá ahɔ̄ nēé pi ɔ́ anú ā, géē lɛ ojīlīmā.

¹⁹Ó wɛ ɔdā olɔnyɛ tū ɔ̄cɛ dóódu, ɔdāŋ kōó le ɔdā nɛ̄ ó yɔ̄ ī dɔɔ̄kā ā má. Amáŋ, olíla í cē habɔ̄ ɔdōbɔ̄bí ō yá tá ŋ́.

²⁰Ɔ̄cɛ nōo gē yɛ mla ācɛ ojéeyī ā, géē jééyī, amáŋ, aóklóbīya kú aólíla géē je gbilífi.

²¹Ikpɛ́lā gē nū ācobīyíne inya ɛ́gɛ́nɛ̄ ɔ̄cɛ gē nū ɔ̄cɛ ɔ́mpa nū inya ā, Oōjɛ̄ gɔbū wɛ ulé kú ɔ̄cɛ oyólɔhi mɛ́mla ɔ̄cɛ okpaakpa á.

²²Ɔ̄cɛ olɔhi nōo ī yá ucē okpaakpa ā, gē habɔ̄ ɔdúgwū tá lɛ ayí nū mɛ́mla ayááyí nū, amáŋ agbénú kú ɔ̄cɛ obīyíne dóódu, í ga ɛgiyí ɔ̄cɛ okpaakpa ā.

²³Ajɛ ɛhɔ̄ ɛ̄yīpɛ̄ ō táajɛ kú ɔlɛɛhá géē lɔfú yá ɔdɛ̄hɔ̄ nɛ̄hi lɛ ɔ́ glá, amáŋ ācobɔ̄bíipú ā í gáā cɛ̄ lɛ ɔ́ hɛ́hɔ̄ ipú ajɛ ɔ́ɔmā ŋ́.

²⁴Ɔ̄cɛ dúúmā nɛ̄ ó lɛ itali kwu ɔyí nū iyē ŋ́, ayíka ó gē wɔ́tū ɔyí nū ɔ́ɔmā. Amáŋ, ɔ̄cɛ nōo yíihɔtū tá ɔyí nū ā, géē má ka o lɛ itali kwu ɔ́ ɔkwu, cɛ́ɛ́ kóō nwū ɔ̄ ɛlā.

²⁵Ɔ̄cɛ o yá okpaakpa géē yɔ̄ ī má lé piyóó, amáŋ ɛmiyɛ géē yɔ̄ ī ŋmó ɔ̄cobɔ́bíipú ā piyóó.