Read idoma AÍITA 14 Bible Online

AÍITA 14 - idoma bible

AÍITA 14

¹Ɔnyā nōo jéeyī ā gē gwó ɔlɛ́, amáŋ ɔnyā nōo wɛ olíla ā gē ca ɔlɛ́ tāajɛ.

²Ɔ̄cɛ nōo gē yá ucē ɔkwɔ̄ɔ̄kwɛ̄yi ā, gē yúufi Óndú ā, amáŋ ɔ̄cɛ nɛ̄ ó lɛ ɔkwɛ̄yi ipú oyēeyī kú nū ŋ́ mā, í yúufi kú Óndú ŋ́.

³É gē yá aólíla italā ohígbū ɛlā kú íla nēé gē ka ŋmá okónu ā. Amáŋ ɛlā okónu kú ojéeyī gē nya ɔ́ tá.

⁴Ɛga nɛ̄ ɔ̄cɛ o bī ɛnū hɛ́hɔ̄ í yɔ̄ ŋ́, ɔbā gē tá áncā, amáŋ ɛga nɛ̄ ɔ̄cɛ o hɛ́hɔ̄ olɔfú yɔ̄, ɔdɛ̄hɔ̄ gē le kpɔ nɛ̄hi.

⁵Ɔ̄cɛ o cījáalí ɔkwɔ̄ɔ̄kwɛ̄yi í gē kɛ̄mgbɛ̄ ŋ́, amáŋ ɔ̄cɛ o cījáalí ɛ̄kɛ̄mgbɛ̄ gē kɛ̄mgbɛ̄ eko dóódu.

⁶Ācɛ nēe jé ɔdā nɛ̄hi tū iyī uwā ā, í gáā jéeyī gbóógbóō ŋ́. Amáŋ ɔ̄cɛ ojéeyī gē jé odée fíyaa.

⁷Nyɛ̄ɛ̄ ŋmá ɛgiyí olíla, é lɛ ɔdā dúúmā nēe gē nwū uwɔ ŋ́.

⁸Ācɛ ojéeyī lɛ ohílīpú jɛ̄ nēe gē jé ɔwɛ nēé ī yɛ ā, amáŋ aólíla gē plla iyī uwā, gē gbɛlá ka aá jé ɔdā nōo cíkā lɛ aá ā.

⁹Ó gē kwú aólíla iyē ɔ́dāŋ ka é le ɔdōbɔ̄bí yá ŋ́. Amáŋ ɔtū gē he Ɔwɔicō eko nɛ̄ ācɛ lɛ ɔdā nōo le kpaakpa ā yá.

¹⁰Ɔ̄cɛ ɔhá dóódu í gáā jé ɛ́gɛ́nɛ̄ ɔtū he uwɔ lɛ, ámāŋ ka ɛ́gɛ́nɛ̄ ɔtū bīya gā awɔ lɛ ā glá ŋ́.

¹¹Inu kú ɔlɛ́ ɔ̄cɛ obɔ̄bíipú géē je yíífi fíyaa, amáŋ áklɔ̄kpɛ kú ɔ̄cɛ okpaakpa gáā lɛ́ɛcɛ fíyɛ́ á.

¹² Ɔdā nɛ̄ ɔ̄cɛ gbɛlá kóō wɛ ɔwɛ okpaakpa ā, lɔfú bī ɔ̄cɛ ga ɔlékwū glá.

¹³Ɔ̄cɛ gē lɔfú yɛhɛ klá íwɔ́tū ɛyí glá. Amáŋ eko nɛ̄ éeyē ā kē mɛ, ɔtūnōbí ā kē yɔ̄ abɔ́ɔ kpɔ́.

¹⁴Ācɛ obɔ̄bí gē mīyɛ ɔdā nōo cíkā lɛ uwá ā. Ācɛ ō yá olɔhi ā géē mīyɛ ulé kú ɔdā olɔhi nēé yá ā.

¹⁵Olíla gē cɛ̄ ɔdā dóódu nɛ̄ ó pó ā, amáŋ ɔ̄cɛ olohílípū ā gē leyī yɛ ikpó nēé gē fu ā.

¹⁶Ɔ̄cɛ ojéeyī ā gē leyī kwɛcɛ gɛɛ kóō gbō iyī nū ŋmá unwalu, amáŋ aólíla ā í gbeyī gɔɔ ŋ́. É gē nwúleyīkwu nɛ̄hi.

¹⁷Ɔ̄cɛ o lɛ ánya gē yá ucē kú íla, ɔ̄cɛ ojéeyī ā gē yɔ̄ cíí, klla gē gbēyī cíí.

¹⁸Ogwuda gē mīyɛ ɔdā nōo cíkā lɛ íla kú nū ā, amáŋ é gē je ɔdā ō jé lɛ ojéeyī ā.

¹⁹Ācobɔ̄bíipú géē túkpɛɛ́ ī gbɔ̄ɔkɔ lɛ ācɛ okpaakpa ā piíí. É klla í tá iyī uwā wāajɛ í gbɔ̄ɔkɔ lɛ uwá kéē lɛ odée yá lɛ uwá.

²⁰Ɔ̄cogbɛhá í gē he ɔ̄cɛ dúúmā ɔtū ŋ́, ó kōō he oladógbe kú nū ɔtū ŋ́ dúú. Amáŋ, ācɛ olagbénú lɛ aóklóbīya alɛwa nɛ̄hi.

²¹Ɔ̄cɛ dúúmā nōo leyī gwō ɔ́mpānū bónū wɛ ɔ̄cobīyíne. Ɔ̄cɛ dúúmā nōo gbonɛnɛ lɛ aógbɛhá géē gwéeyē.

²²Ācɛ nēe nyíleyī ā, gē miya ɔdōōbɔ̄bí á. Amáŋ ɔ̄cɛ nōo dɔɔ̄kā kóō yá ɔdā olɔhi ā, ɔtū kú nū gē he ācɛ. É klla gē lɛ ojīlīmā ce ɔ́.

²³Aá yúklɔ́ cɛ́ɛ́ kú aá má ɔdōlé lé. Ɔ́dāŋ ka aá cīce yɔ̄ ī kɛlā icííci, aá géē je kpó gbɛhá icííci.

²⁴Ulé kú ācɛ ojéeyī wɛ agbénú, amáŋ ulé kú aólíla wɛ íla tōōtɔ̄ɔ̄.

²⁵Ɔ̄cɛ o cījáalí nōo lɛ ɔkwɛ̄yi ka, gē nya oyēeyī kú ɔ̄cɛ éyi tá, eko dúú nɛ̄ ó lɛ ɛlā ɔkwɛ̄yi ka. Eko nɛ̄ ó kē lɛ ɛ̄kɛ̄mgbɛ̄ kā, ó le ībīyājɛ yá tū ācɛ ɛɛ́.

²⁶Ɔ́dāŋ ka ɔ̄cɛ lɛ ojīlīmā ce Óndú, klla gē tá iyī nū wāajɛ, Óndú ā gé gbō ɔ̄cɛ ɔ́ɔmā mla ācɛ ɔlɛ́ nū ŋmá unwalu dóódu.

²⁷Ojīlīmā ō ce Óndú ā mla o tá iyī ɔ̄cɛ wāajɛ, gē gbō ɔ̄cɛ ŋmá ukpa nōo ŋmó ɔ̄cɛ glá.

²⁸Ɛwa wɛ ɔcɛ́ á, ɔ́dāŋ ka ɛwa í yɔ̄ ŋ́, ɔcɛ́ í wɛ ɔdā dúúmā ŋ́.

²⁹Ɔ̄cɛ nɛ̄ ó gē cɔ̄nū fíyaa ŋ́, jɔ́dā klla lɛ ohílīpú nɛ̄hi. Ɔ̄cɛ o lɛ ánya, gē je íla kú nū mafú.

³⁰Ɔ́dāŋ ɔtū kú ɔ̄cɛ lɛ ɛbɔ́ lɛ, ayíka ɔkpíyē kú nū kē í lɛ ɔbɔ́lā. Amáŋ ɔ́dāŋ ka ɔ̄cɛ ī mímálānyī klla gē cɔ̄nū eko dóódu lɛyīkwu ācɛ ɔhá, ucē nyā í lɛbɛ̄ɛka ōcē obɔ̄bí nōo kwú ikpokwú kú nū ā.

³¹Ɔ̄cɛ nōo ge pīya aógbɛhá tū ā, gē cá Ɔwɔicō nōo yá aógbɛhá ā ɛcá. Ɔ̄cɛ nōo gbonɛnɛ lɛ aógbɛhá ā, gē lɛ ojīlīmā ce Ɔwɔicō.

³²Ɔdā obɔ̄bí kú ɔ̄cobɔ̄bíipú ā gē je ɔ́ yíífi ŋmá ajɛ. Amáŋ ɔkwɔ̄ɔ̄kwɛ̄yi kú ɔ̄cɛ olɔhi gē gbō ɔ̄ á.

³³Íjééyī yɔ̄ ipú ɔtū kú ɔ̄cɛ o jɔ́dā, amáŋ ɔtū kú olíla í lɛ íjééyī dúúmā ŋ́.

³⁴Ucē okpaakpa ō yá gē je éwo dóódu gicō, amáŋ ínoōbīya mɛ́mla ɔ́bíipú wɛ uwēyī lɛ ācɛ kú éwo dóódu.

³⁵Ɔ̄cocɛ̄hɔ̄ dóódu nōo jééyī, gē tá eyīyōlɔhi kú ɔcɛ́ kú ɔlɛ́ nū. Amáŋ, ɔcɛ́ gē yá ɔ̄cɛ dúúmā nɛ̄ ó yá ɔdā olɔhi ŋ́ mā italā.