Read idoma AÍITA 15 Bible Online

AÍITA 15 - idoma bible

AÍITA 15

¹Ohi kú ɛlā o tá ɛmɛɛma, gē cɛ̄ lɛ ícɔ̄nū ī mɛ. Amáŋ ohi ɛlā ō tá ɔfɔ́ɔ́fú kplúká gē cɛ̄ lɛ ɔtū wú ɔ̄cɛ tōōtɔ̄ɔ̄.

²Ojéeyī gē kɛlā kú íjééyī, amáŋ aólíla gē kɛlā nɛ̄ ó lɛyí ŋ́.

³Óndú ā gē má ɛjɛ̄ɛ̄jī ɔdā nōo gē yá ɛga dóódu ā. Kwu ɔdā olɔhi mɛ́mla ɔdōbɔ̄bí nɛ̄ alɔ ī yá ā, ó yɔ̄ ī má alɔ.

⁴Ɛlā ōgbɔtū nɛɛ, gē bī ɛbɔ́ wā ipú odo, amáŋ, ɛlā kú ɛcá mɛ́mla ɛlā ō ka nyáŋká gē bī íwɔ́tū wā.

⁵Olíla gē lɛ eyī gwō ɛlā nɛ̄ ádā nū nwū ɔ̄ ā bónū á. Ɔyí ojéeyī gē lɛ abɔ̄ flá tū ɛlā nɛ̄ ádā nū nwū ɔ̄ ā.

⁶Ācɛ okpaakpa gē gbagbénú, amáŋ agbénú kú ācobɔ̄bíipú ā gē mɛ tāajɛ eko kú unwalu.

⁷Ɔdā nɛ̄ ojéeyī gē ka ā, gē nwū ācɛ ɔhá kéē jé ɔdā.

⁸Ɔtū gē he Óndú ā, eko dúú nɛ̄ ācɛ olɔhi gē gbɔ̄ɔkɔ, amáŋ ɛya nɛ̄ ācɛ obɔ̄bí gē bī wā ā, ī wú ɔ̄ ɔtū.

⁹Ucē kú ācɛ nēe gē yá ɔdōbɔ̄bí ā gē wú Óndú ā ɔtū, amáŋ ó gē yíihɔtū tá ɛjɛ̄ɛ̄jī ācɛ nēe gē yá ɔdā olɔhi ā.

¹⁰Ɔ́dāŋ ka a lɛ ɔdōbɔ̄bí yá, é géē yá uwɔ italā lɔɔlɔhi. A géē kwú ɔ́dāŋ ka tá kéē híī nā uwɔ tá ɔwɛ ŋ́.

¹¹Ɔ́dāŋ ka Óndú ā lɔfú má ɛjɛ̄ɛ̄jī ɔdā dóódu nōo bá ɔlékwū ā glá, ɔwɛ nyá nɛ̄ alɔ je ɛlá ō gbo kú alɔ tayínū ŋmá ɛgiyí Ɔwɔicō glá ā?

¹²Ācɛ nēe gbɛlá ka aá lɛ odée jé nɛ̄hi tū iyī uwā, í gē tíne kú ojéeyī kóō nwū uwā ɛlā dúúmā ŋ́.

¹³Eko dúúmā nɛ̄ ɔtū le he ācɛ, é gē yɛhɛ, amáŋ eko dúú nɛ̄ ɔtū le bīya lɛ uwá nɛɛ, eyī kú uwā kwú kwányíhí.

¹⁴Ojéeyī mɛ́mla ojɔ́dā gē tíne ó jé ɔdā tōōtɔ̄ɔ̄, amáŋ, o cīce bɛ̄ɛka ogwuda ā, he ācɛ ɔdāhá ɔtū á.

¹⁵Aógbɛhá ā bá yɔ̄ ī nya kéē lɛ odée piyóó, amáŋ ɔ̄cɛ o lɛ ɔtū nɛ̄hɛ́ mɛ́mla éeyē ā yɔ̄ ī jɔ́nyɛ kú oyēeyī piyóó.

¹⁶Ɔdā lígíi nɛ̄ ɔ̄cɛ lɛ ipú ufi kú Óndú ō yá ā, lɔhi fíyɛ́ agbénú nɛ̄ ɔ̄cɛ gē lɛ̄, nɛ̄ unwalu kwu ɔ́ ɔkwu á.

¹⁷Ó lɔhi fíyɛ́ ká ɔ̄cɛ kóō lé ɔdōlé kú ēpēēpū mla ācɛ nōó he uwá ɔtū ikɔkɔ ō nyɔ̄ í lé ɛbɛ́ o lɔhi fíyɛ́ dúú ɛga nēé ī wɔ́tū ɔ̄cɛ.

¹⁸Ɔ̄cɛ o lɛ ánya gē bī áafú wā, Amáŋ, ɔ̄cɛ ogbēyī cíí gē bī ɛbɔ́ wā.

¹⁹Ahi ō kwú gē yá ɔ̄cɛ bɛ̄ɛka ɔdā nɛ̄ ɔwɛ nɛ̄ ó yɔ̄ ī yɛ ā, wɛ ujūūjē ā. Amáŋ ɔwɛ kú ɔ̄cɛ ɔkwɔ̄ɔ̄kwɛ̄yi ā í lɛ unwalu ɛga dúúmā ŋ́.

²⁰Ɔyí ojéeyī gē cɛ̄ lɛ ádā nū gwéeyē. Amáŋ ɔyí olíla gē lɛ eyī gwū ɛ́nɛ́ bónū.

²¹Ucē kú íla gē cɛ̄ lɛ ācɛ ɔdāhá gē gwéeyē. Amáŋ ɔ̄cɛ ojɔ́dā ā gē yá ucē okpaakpa.

²²Ɔ̄cɛ nōo tá ka anúɔ í miya ɛlā mla ɔ̄cɛ dúúmā ŋ́ mā, í gáā yá ɔdā dúúmā kpaakpa glá ŋ́. Amáŋ ɔ́dāŋ ka a lɛ ɛlā mīya mla ācɛ alɛwa, nēé lɛ ɛlā nwū uwɔ ā, a gé gɔbū ipú ɔdā dúúmā nɛ̄ a gē yá ā.

²³Ɔ̄cɛ nōo gē jé ohi okpaakpa ō tá eko okpaakpa kú ɛlá dóódu ā gwéeyē.

²⁴Odúúdú ācɛ nēe jéeyī ā, gē yɛ gɔbū kpaakpa ga ipú oyēeyī, ŋmá ɔwɛ nōo gē bī ɔ̄cɛ ga ɔlékwū ā.

²⁵Óndú ā géē je ɔlɛ́ kú ɔ̄cɛ oyɔ́bɔ́cɛ yíífi tāajɛ. Amáŋ ó gē gbō aɔ́dā nɛ̄ ɔnyōkwū lɛ ā lɛ ɔ́.

²⁶Óndú ā gē wɔ́tū ɛlá nɛ̄ ācobɔ́bíipú ā gē gbo ā, Amáŋ ɛlā kú ācɛ oyēŋēē ā gē he Óndú ā ɔtū.

²⁷Ɔ̄cɛ dúúmā nōo gē tíne ō lɛ itene abɔ̄fú ŋmá ɔwɛ obɔ̄bí gē tá unwalu bá ajɛ lɛ ācɛ ɔlɛ́ nū. Amáŋ ɔ̄cɛ nōo gē wɔ́tū ómíci ō mīyɛ lé, géē yēeyī gbojī ipú ɛcɛ nyā.

²⁸Ɔ̄cɛ olɔhi gē leyī yɛ ohi kú ɛlā, ɛ́ɛ́ nɛ̄ ó gē tá á. Ɔ̄cɛ obɔ̄bí ā gē tóohi ɛlā ɔkwɔɔkwu, cɛ́ɛ́ unwalu kwu ɔ́ ɔkwu bōōbū.

²⁹Eko nɛ̄ ācɛ olɔhi le ɔkɔ gbā, Óndú ā le pó, amáŋ ó gē le ahɔ̄ gwō ɔkɔ nɛ̄ ācobɔ̄bíipú gbā ā bónū.

³⁰Ɛhɛ o kwu ayīnu mɛɛɛ kú ācɛ gē cɛ̄ lɛ ɔtū he ɔ̄cɛ, ɔ̄kā olɔhi gē lɔfú tū ɔ̄cɛ iyē.

³¹Ɔ́dāŋ ka a lɛ ahɔ̄ jē eko dúú nēé lɛ ɛlā nwū uwɔ, ayíka a wɛ ɔ̄cɛ ojéeyī.

³²Ɔ́dāŋ́ ka a tá ō pó ɛlā nēé gē nwū ā, īyī uwɔ nāa gē yágbe abɔ́ɔ á. Amáŋ ɔ̄cɛ nōo lɛ ɛlā nēé nwū ā mɛ́mla ahɔ̄ nēé pi ɔ́ ā pó, ayíka o yɔ̄ ī jééyī tōōtɔ̄ɔ̄.

³³Ojīlīmā ō ce Óndú ā wɛ ɔdōōjé abɔ̄yīnū á. A géē tá iyī uwɔ wāajɛ ɛ́ɛ́ kéē géē lɛ ojīlīmā ce uwɔ.