Read idoma AÍITA 17 Bible Online

AÍITA 17 - idoma bible

AÍITA 17

¹Igbō ōŋmókókó nɛ̄ ɔ̄cɛ lé ɛbɔ́ ā lɔhi fíyɛ́, ō nyɔ̄ í lé ucɛ nɛ̄hi ipú inū nōo le mu mla unwalu nɛ̄ ɛjɛ̄ɛ̄jī ācɛ le kɔ̄, bá gē táafú ā á.

²É je ɔfiyɛ nōo jéeyī, gē cēyītīkwū ī yúklɔ́ nɛ̄hi ā yá otrɛ̄yí kú ɔyí ɔlɛ́ nōo wɛ ɔdāhá. É kē í kɔ̄ úgwū ékpó lɛ anú mɛ́mla ayí ɔlɛ́ ā jōōjīlɛ̄.

³Ɔlá nēé gē bī le já oje nɛ̄hɛ́ mla ugóolu (oje ɔdɔ) má á. Amáŋ Óndú ā gē jé ɔtū kú ɔ̄cɛ má á.

⁴Ɔ̄cɛ obɔ̄bí gē pó ɔ̄kā kú ɔdōōbɔ̄bí. Ɔ̄cɛ o kɛ̄mgbɛ̄ kē ī jāhɔ̄ lɛ ɛlā ɛ̄kɛ̄mgbɛ̄.

⁵Ɔ̄cɛ nōo gē yɛhɛ tū aogbɛhá ā, gē cá Ɔwɔicō nōo yá uwā ā ɛcá. É géē yá ɔ̄cɛ dúúmā nōo gē gwéeyē ohígbū ɔdōbɔ̄bí nōo gē yá ɔ̄cɛ ɔhá ā italā piíí.

⁶Aádā nɛ̄hi gē bī ayááyí uwā gwó, ɛ́gɛ́nɛ̄ ayááyí kē ī bī ɛ́nɛ́ mɛ́mla ádā uwā gwó ā.

⁷Ɔ̄cɛ ojīlīmā í gē kɛ̄mgbɛ̄ ŋ́, olíla í lɛ ɛlā ɔkwɛ̄yi dúúmā ō ka ŋ́.

⁸Ómíci ō je lɛbɛ̄ɛka ɛcí imabɔ̄ ā lɛ ācɛ nēe gē je ā. É gbɛlá ka ɔ́ɔ yá ɔdā dúúmā nɛ̄ aá gē dɔɔ̄kā ā glá.

⁹Ɔ́dāŋ ka a dɔɔ̄kā kú ɔtū uwɔ kóō he ācɛ, kwú ɔdā dúúmā nēé yá uwɔ ā í yá uwā ɛhi. Ɔ̄cɛ mla oklóbīya nū gē hɛ́, ɔ́dāŋ ka ó yɔ̄ gē kɛlā lɛyíkwu ɔdōbɔ̄bí nɛ̄ ó gē yá ɔ̄ ā.

¹⁰Ɔ̄cɛ nōo lɛ ohílīpú gē jé ɔdā ŋmá ahɔ̄ nēé pi ɔ́ anú igbeékpónú ā, amáŋ ɛ́gɛ́ dúú nāa ŋmó olíla ije lɛ, ó gáā lɛ ohílīpú glá ŋ́.

¹¹Ɔ̄cɛ obɔ̄bí ā gē yíīkpɛ̄yí olɔfu piyóó, ohígbū ɔ́ɔmā, ikwū olɔnɔɔtū nōó ī ményīnyinyi ɔ̄cɛ ŋ́ mā géē wā í yá mla anú.

¹²O jīla olíla nōo yɔ̄ gē yá ucē íla ɔwɛ, tūufi fíyɛ́ o jīla ɔgwú nēé lɛ ɔyí nū kpó uwī ā á.

¹³Ɔ́dāŋ́ ka ɔ̄cɛ bī obɔ̄bí le cíla ulé kú olɔhi, obɔ̄bí í gáā mɛ ŋmá inu ɔlɛ́ nū gbóógbóō glá ŋ́.

¹⁴Ohútu kú íkpɛ́lā lɛbɛ̄ɛka ō hɛ́bū kú ɔ̄kā nēé tū tū éŋkpɔ̄ ā. Kéē lɛ ɛlā ā trá gbɔbū kóō je ca klɛ́ɛcɛ.

¹⁵Óndú ā gē wɔ́tū ɔ̄cɛ nōo gē ŋmó ɔ̄cɛ nɛ̄ ó jé ikpó odée ŋ́ ɛpɔ̄bí mɛ́mla ɔ̄cɛ o hɛ́pɔ̄hi lɛ ɔ̄cobɔ̄bíipú ā.

¹⁶Ile nyá nɛ̄ ije nɛ̄ olíla gē ŋmó tū ɔkpá ō jé ā, gáā tū lɛ ɔ́ ā? Ohígbū kōó lɛ ohílīpú dúúmā ŋ́.

¹⁷Aóklóbīya ɛpa gē ma ihɔtū fú lɛ iyī uwā. Ɔdī wɛ ile kú aɔ́máapú ā, ɔdāŋ ka ó wɛ ka o tábɔ̄ eko kú ɛgbá ŋ́ mā?

¹⁸Ɔ̄cɛ nɛ̄ ó lɛ ohílīpú ŋ́, géē mīyɛ abɔ̄ ulé kú ɔ̄cɛ ɔhá, ka anɔ́ɔ gē cílá anú lɛ ɔ́ á.

¹⁹Ɔ̄cɛ nɛ̄ ínoōbīya he ɔ́ ɔtū, ayíka unwalu he ɔ́ ɔtū abɔ́ɔ á. Ɔ̄cɛ nōo gē lɔ̄ɔ̄fú eko dóódu, yɔ̄ ī dɔɔ̄kā unwalu nɛɛ n.

²⁰Ɔ̄cɛ obɔ̄bí ɔtū í gē jɛ̄ gicō ŋ́, ɔ̄cɛ nɛ̄ okónu kú nū lɛ mu mla ɛcá mɛ́mla ɛlā obɔ̄bí, gē ga ipú unwalu nɛɛ n.

²¹Ɔyí ɔdāhá wɛ ɔtūnōbí lɛ ádā nū. Ádā kú ɔyí olíla í lɛ éeyē dúúmā ipú ɔtū ŋ́.

²²Ɔtū oyēŋēē gē je ɔfú iyē lɛ ɔ̄cɛ, amáŋ ɔtūnōbī gē bī ikwū gē lɛ ɔ̄cɛ fíyaa.

²³Ɔ̄cobɔ̄bíipú gē mīyɛ ómíci lé, cɛ́ɛ́ kóō lɛ ɛpɔ̄ okpaakpa eyī pīya klá ajɛ.

²⁴Ɔ̄cɛ ojɔ́dā lɛ eyī kú nū kwu ɔdā kú íjééyī, amáŋ eyī kú olíla gē yɛ ga ɛga ɔhá kú ɛcɛ nyā.

²⁵Ɔyí olíla wɛ ɔtūnōbí lɛ ádā nū, ó klla wɛ íjémā nɛ̄hi mɛ́mla íwɔ́tū lɛ ɛ́nɛ́ nōo ma ɔ́ ā.

²⁶O cɛ̄ lɛ ɔ̄cɛ okpaakpa mɛ́mla ɔ̄cɛ o yá ólɔhi gbɛfiyɛ ā í lɔhi ŋ́. O yá ācɛ olɔhi italā kú ɔdā nēé jé ikpónū ŋ́ mā, wɛ ɔdōbɔ̄bí.

²⁷Ɔ̄cɛ o jɔ́dā ā í gē kɛlā ojigógó ŋ́. Ācɛ nēe gē gbeyī cíí ā, gē mɛ́ɛbɛ akplata.

²⁸Olíla nōo lɛ okónu kú nū klá cíí, é gē je ɔ́ ka ɔ́ɔ jéeyī, ohígbū ka ó lɛ okónu kú nū klá, klla yɔ̄ cíí.