Read idoma AÍITA 18 Bible Online

AÍITA 18 - idoma bible

AÍITA 18

¹Ācɛ nēé gē bá tɔ̄há mla ācɛ ɔhá glá ŋ́ mā, wɛ ācɛ nēe ī lɛ ɛlá kwu īyī uwā, ōfōōfū uwā. É gáā cɛ̄ɛ̄lā ɔkwɛ̄yí dóódu nɛ̄ ācɛ ɔhá ka lɛ uwá ā gbóógbóō ŋ́.

²Olíla í lɛ ɛlá wu ɔ́ ŋ́, ɔ́dāŋ ka ó jɛ́yí odée ámāŋ ka ó jɛ́yí nū ŋ́. Ɔdā nōo wɛ ɛgbá kú nū ā wɛ, kéē lɛ ɛga je lɛ ɔ́ kóō lɛ ákú nū ka ōfōōfūnū.

³Ɔ́bíipú mɛ́mla eyī ō gwō ɔ̄cɛ bónū gē yɛ tɔ̄há á. Ɔ́dāŋ nāa kwú ojīlīmā kú uwɔ ú tónū, uwēyī géē kwú uwɔ.

⁴Ɛlā okónu kú ɔ̄cɛ ojéeyī gē lipú bɛ̄ɛka ísu ā. Íjééyī gē pɛ́ wɛ̄ɛcɛ ŋmá anú okónu bɛ̄ɛka éŋkpɔ̄ ɔkpá.

⁵Ó lɔhi ká ɔ̄cɛ kóō cɛ̄ɛ̄pɔ̄ ɔ̄cobɔ́bíipú ŋ́, ɛ́ɛ́ nɛ̄ ɔ̄cɛ gē nyí ɛ́nɛ́nɛ̄ ɔ̄cɛ ā ɛpɔ̄ okpaakpa kú nū ŋ́.

⁶Okónu kú olíla gē bī ikpɛ́lā wā ajɛ, okónu kú nū klla ī cɛ̄ lɛ ācɛ gɔ́ ɔ̄ itali.

⁷Ɛlā íla ō ka kú olíla lɛbɛ̄ɛka ukpa nɛ̄ ó yɔ̄ ī jē táajɛ gbēyi iyī nū, kóō je iyī nū yíífi ā.

⁸Awanda lɔnyɛ nɛ̄hi. Ó ī he alɔ ɔtū ō je mulɛ nɛ̄hi.

⁹Ɔ̄cɛ okwáhi mɛ́mla ɔ̄cɛ o yújulu, wɛ ɔdā ékpó mɛ́mla ɔ̄cɛ obīyɔ̄da nɛ.

¹⁰Óndú ā lɛbɛ̄ɛka inu olɔfú nɛ̄ ācɛ o yá ɔdā okpaakpa ā gē nyɔ̄ ī tayínū ipú nū, kéē bá ɛbɔ́ ā.

¹¹Ācɛ nēe lɛ agbénú nɛ̄hi ā gē gbɛlá ka ije ká aá gē gbō aá ŋmá unwalu bɛ̄ɛka igá o lɔfú o lico nɛ̄hi kú igelī nɛ̄hi nōo gē gbō ɔ̄ ā.

¹²Ɔ̄cɛ dúúmā nɛ̄ ó tá iyī nū wā ajɛ ŋ́, é gáā lɛ ojīlīmā ce ɔ́ ŋ́. Ācɛ o yɔ́bɔ́ɔ̄cɛ bá ī yɛ ɔwɛ nōo í bī uwā ga ífi.

¹³Lɛ ahɔ̄ jē lɔɔlɔhi gbɔbū ɛ́ɛ́ ká ā tóohi ɛlā. Ɔ́dāŋ ka á yá lɛ ā ŋ́, olíla mɛ́mla ɔdāhá nāa wɛ á.

¹⁴Ɔtū ō yéékpó kú ɔ̄cɛ lɔfú gbō ɔ̄ eko nɛ̄ ó yɔ̄ ī doōcē glá. Amáŋ, ɔ́dāŋ ka ó lɛ ɔtū kú nū yéékpó gɛ ŋ́, ɔdā dúúmā í yɔ̄ nōo ī tá ɔ̄ abɔ̄ gɛ ŋ́.

¹⁵Ācɛ ojɔ́ɔdā ā le tútū eko dóódu kéē jé ɔdā nēé gē nwū ā.

¹⁶Ɔdā kú ɛhi ō bī gé lɛ ɔ̄cɛ nɛ̄hi, géē nwūla ɔwɛ lɛ ɔ̄cɛ kóō nyɔ̄ í má ɔ̄.

¹⁷Ɔ̄cɛ nōo gē kɔɔkɔ únɛ́pɔ̄ aflɛ́yí ā, gē gbɛlá ka ɛlā kú anúɔ le kpaakpa á, jāā gbéeko nɛ̄ ɔ̄cɛ nōo lɛ ɛpɔ̄ mla anú ā gbɔɔ́ ō da ɔ́ ɔ̄kā.

¹⁸Ūlī ō tá gē hɛ́pɔ̄ ká ācɛ o táafú nɛ̄hi ɛpa á.

¹⁹Tá ɔyínɛ́ uwɔ abɔ̄, cɛ́ɛ́ ó géē gbō uwɔ bɛ̄ɛka, ɔdɔ olɔfú nōo yɛ igelī nɛ̄hi jīla tá ā. Amáŋ ikpɛ́lā ō yá mla anú, géē hɛ́ uwɔ ŋmá ɛgiyí nū bɛ̄ɛka odūngwɔ̄wɛ kú ɔwɛ nɛ̄hi kú igelī nɛ̄ ɔdɔ kú nū lɔfú nɛ̄hi ā.

²⁰Ɛdɔ kú ɛlā nōo ŋmá okónu kú ɔ̄cɛ ā, gē cɛ̄ lɛ ɔtū he odo kú nū, ɛ́gɛ́nɛ̄ ɔdōlé gē cɛ̄ lɛ ipú kú ɔ̄cɛ gē nū ā.

²¹Ɛlā nɛ̄ ɔ̄cɛ ka ŋmá okónu ā, lɔfú ŋmó ɔ̄cɛ glá, ó kē lɔfú nya ɔ̄cɛ tá glá. Ɔ̄cɛ nɛ̄ ɛlā ō ka nwuné he uwá ɔtū ā, géē lɛ ɔdā nōo tá ɔ̄ ɔkwu ā.

²²Ɔ̄cɛ dúúmā nōo lɛ ɔnyā lɛ ɛɛ́, le ɔdā olɔhi yá ɛɛ́. Ó mafú gā uwɔ ka Óndú ā le ɔdā olɔhi yá gā uwɔ ɛɛ́.

²³Ɔ̄cɛ ogbɛhá gē kɛlā ī gbɔ̄ɔkɔ, amáŋ olagbénú ī kɛlā aflūmā mɛ́mla íkwu.

²⁴Ɛma kú aóklóbīya ámāŋ ka aɔ́ncɛ́nyā ōhī í gē gbojī ŋ́. Amáŋ aóklóbīya ōhī kwu ɔ̄cɛ ajaajɛ fíyɛ́ ɔyínɛ́ ipú ɔ̄cɛ á.