Read idoma AÍITA 19 Bible Online

AÍITA 19 - idoma bible

AÍITA 19

¹Ó lɔhi kú ɔ̄cɛ kóō wɛ ogbɛhá amáŋ kóō wɛ ɔ̄cɛ ɔkwɛ̄yi, fíyɛ́ ō wɛ olíla nōo gē kɛ̄mgbɛ̄.

²Ɔtū kpoókpoó nɛ̄ íjééyī mɛ́mla ɔdōōjé í blla anú ŋ́, í lɔhi ŋ́. Á gbeyī cíí ŋ́, gē bī ɔ̄cɛ ga ipú unwalu.

³Eko nɛ̄ íla kú ācɛ ōhī lɛ uwá bī ga ipú ífi, cɛ́ɛ́ ɔtū gē wú uwā lɛyíkwu Óndú.

⁴Ācɛ olagbénú ā bā ī lɛ aóklóbīya ɛ̄yīpɛ̄ eko dóódu, amáŋ aóklóbīya lígíí nɛ̄ ogbɛhá lɛ ā, í kōō cɛ̄ yɔ̄ mla anú ŋ́.

⁵Ɔ́dāŋ ka ɔ̄cɛ le ijáalī ɛ̄kɛ̄mgbɛ̄ cɛ̄ únɛ́pɔ̄, é géē yá ɔ̄ italā piíí. Ó lɛ ɔwɛ dúú nɛ̄ ó gáā kwu glá ŋ́.

⁶Ācɛ dóódu gē tíne kéē téeyī olɔhi kú ācɛ nɛ̄hi. Ācɛ dóódu gē je iyī uwā ka aá wɛ oklóbīya kú ɔ̄cɛ dúúmā nōo gē yá ɛhi nɛ̄hi.

⁷Odúúdú ayínɛ́ kú ogbɛhá gē wɔ́tū nū klla ī leyī gwō ɔ̄ bónū. Ákú aóklóbīya nū kōō fíyɛ́ á. Ɛ́gɛ́dúú nɛ̄ ó cēyītīkwū lɛ kóō tú blá uwá, ó kōō gáā má uwā ŋ́.

⁸Ɔ́dāŋ ka a he iyī uwɔ ɔtū, le jéeyī. Gbɛlá kwu ɔdā nāa jé ā, cɛ́ɛ́ a géē gbagbénū.

⁹Ɔ̄cɛ dúú nōo lɛ ijáalí ɛ̄kɛ̄mgbɛ̄ cɛ̄ únɛ́pɔ̄, é géē yá ɔ̄ italā piíí. Á kú nū mɛ ɛɛ́.

¹⁰Olíla í cíkā ō lā oyēeyī kú abahi ŋ́. Ɔfiyɛ í cíkā ō wɛ otrɛ̄yí ámāŋ ka o wɛ ɔkpani kú ācɛ nɛ̄hi ŋ́.

¹¹Ɔ̄cɛ olohílípū olɔhi gē kwú ánya kú nū tū. Ó wɛ ɔdā ojīlīmā lɛ ɔ̄cɛ kóō leyī gwō ɔdōbɔ̄bí nɛ̄ ɔ̄cɛ éyi yɔ̄ ī yá ā bónū.

¹²Ɔnū ō cɛ̄ ká ɔcɛ́ lɛbɛ̄ɛka oji nɛ̄ ágábá gē tū ā nɛ̄ n. Eyī olɔhi kú ɔcɛ́ ō pīya kwu ɔ̄cɛ lɛbɛ̄ɛka ɔwɔ kú aflɛ́yí ā.

¹³Ɔyí olíla wɛ ífi lɛ ádā nū. Ɔnyā ō ka ífulá nōo klla gē je unwalu lɛbɛ̄ɛka éŋkpɔ̄ nōo gē nū bónū trétrétré ā.

¹⁴Ɔ̄cɛ lɔfú lé úgwū kú ɔlɛ́ mɛ́mla ije ŋmá ɛgiyí ádā nū glá, amáŋ Óndú ā ōfōōfūnū gē je ɔnyā ō lɛ ohílīpú lɛ ɔ̄cɛ á.

¹⁵Abɔ̄ o kpó wu agada gē bī iyɔ̄lā wā. Ɔ̄cɛ nɛ̄ ó yúklɔ́ dúúmā nɛ̄ ó gē yá ŋ́ mā, ɛmiyɛ géē je ɔ́ ŋmó tónū icííci.

¹⁶Ɔ̄cɛ nōo lɛ íne kú Ɔwɔicō tū ā, géē lɛ oyēeyī ōlīkpō ipú ɛcɛ nyā ā. Ɔ́dāŋ ka á lɛ íne nyā tū glá ŋ́, ayíka a géē kwú.

¹⁷Eko nāa gē je ɔdā lɛ aógbɛhá, ó lɛbɛ̄ɛka a yɔ̄ ī lɛ odée kplá Óndú ā nɛ. Óndú ā gē cílá awɔ ulé nū igbīhāajɛ.

¹⁸Nwū ɔyí uwɔ ɛlā, ká ā pi ɔ́ ahɔ̄ eko nɛ̄ ó wɛ ɔyípɛ̄ kpɔ́ ɛ́ɛ́ mā. Amáŋ, ɔ́dāŋ ka á yá lɛ ā ŋ́, ayíka a yɔ̄ ī cɛ̄ lɛ ɔ́ kóō je iyī nū yíífi.

¹⁹Mabɔ̄ ɔ̄cɛ o lɛ ánya tá, kóō mīyɛ ulé kú ánya kú nū. Ámāŋ, ɔ́dāŋ́ ka a kwú ɔ̄ ú ŋmá ipú unwalu igbo éyi a klla géē nyɔ̄ í je ɔ́ igbo ɔhá kpɔ́ ɛ́ɛ́.

²⁰Jāhɔ̄ lɛ ɛlā nēé gē nwū ā, cɛ́ɛ́ ká ā kē lɛ abɔ̄ bī ukɔ́ nēé tū uwɔ ā, cɛ́ɛ́ kú ā géē le jéeyī.

²¹Ɔ̄cɛ gē yá ojuju kú ɔdā alɛwa ipú ɔtū kú nū, amáŋ Óndú ā yá ɛ́ɛ́ nɛ̄ ɔdā nɛ̄ ó miya ā í yá glá á.

²²Ɔdā nōo cíkā lɛ ɔ̄cɛ ā, wɛ o lɛyí táajɛ. Ó lɔhi kú ɔ̄cɛ kú ō gbɛhá ikɔkɔ ō wɛ ɔ̄cɛ okɛ̄mgbɛ̄.

²³Ufi kú Óndú ā mla ɛyí ō táajɛ lɛ ɔ́ gē bī ɔ̄cɛ ga oyēeyī olīkpō. Ɔdā dóódu géē jɛ̄ ɔ̄, ɔdōbɔ̄bí dúúmā í gáā yá ɔ̄ ŋ́.

²⁴Ɛdɔ kú ahi nɛ̄ ācɛ ōhī kwú ā, í kōō cɛ̄ lɛ uwá bī abɔ̄ kú uwā je ɔdōlé tá okónu kú uwā glá ŋ́.

²⁵É cíkā ō yá ācɛ o yɔbɔ́ɔcɛ italā, cɛ́ɛ́ ká aógwuda kéē kllɔcɛ́. Ɔ́dāŋ ka ɔ̄cɛ dúúmā jéeyī, ó géē jé odée eko nēé lɛ ɔ́ nā tɔ́ɔwɛ.

²⁶Ɔyí ɔdāhá, mɛ́mla ɔyí nɛ̄ ó jé ɔdā uwēyī ŋ́, gē yá ádā nū ōwē klla ī nū ɛ́nɛ́ nū ŋmá ɔlɛ́ nū á.

²⁷Ɔyí um, ɔ́dāŋ ka a tá ká anúɔ í jé ɔdā ɛ̄yīpɛ̄ gɛ ŋ́, a géē je mlanyī ɔdā nāa tɛtɛ jé ā.

²⁸Ɔ̄cɛ icííci ī cījáalí ɛ̄kɛ̄mgbɛ̄ kéē je ɛpɔ̄ okpaakpa pīya ɔdā ɛfulɛ́ɛfu. Ācɛ obɔ̄bíipú ā gē cē ɔdōbɔ̄bí mlɛ ɛ́gɛ́nɛ̄ ɔ̄cɛ gē je ɔdōlé mlɛ ā.

²⁹Ɛ̄pɔ̄bí mla ijē ō ŋmó wɛ italā nōo yɔ̄ ī gbēyī olíla nōo gbɛlá ka anúɔ jé ɔdā nɛ̄hi á.