Read idoma AÍITA 2 Bible Online

AÍITA 2 - idoma bible

AÍITA 2

¹Ɔyí um, bī ɛlā nɛ̄ n nwū uwɔ ā le yúklɔ́. Ā kē híī mlanyī ukɔ́ nɛ̄ n tū uwɔ ā ŋ́.

²Jāhɔ̄ lɛ ɛlā kú íjééyī lɔɔlɔhi, ká ā klla cēyītīkwū kú ā jɛ́yí kú ɔdā nɛ̄ íjééyī wɛ ā.

³Lɛ ɔkɔ cɛyí gbōō káā bɛba ká ā jɛ́yí kú odée.

⁴Tíne íjééyī ɛ́gɛ́nɛ̄ a lɔfú tíne oje nɛ̄hɛ́ ámāŋ ka aɔ́dā agbénú ɔhá lɛ glá ā.

⁵Cɛ́ɛ́ ā géē jɛ́yí kú ɔdā nɛ̄ ufi kú Óndú ō yá wɛ, cɛ́ɛ́ ká ā lɛ odée jé lɛyíkwu Ɔwɔicō.

⁶Ohígbū kú Ɔwɔicō gē je íjééyī lɛ ɔ̄cɛ á. Ɔdōjé mɛ́mla o jɛ́yí kú ɔdā ŋmá okónu kú nū nɛ.

⁷Ó lɛ íjééyī nōo ī tá ɔ̄cɛ abɔ̄ ā kpó tū lɛ ācɛ okpaakpa ā. Anú klla wɛ ɔkplɛ́fú ká ācɛ ɔkwɛ̄yi ā á.

⁸Ó gē gbō ācɛ nēe gē yá ucē kpaakpa lɛyíkwu ɔ́mpa uwā ā. Ó klla ī gbō ācɛ nōo ī gbā ɔ̄ ɛ̄gbā ā.

⁹Ɔ́dāŋ́ ka a jāhɔ̄ gā um, a géē jé ɔdā nōo le kpaakpa, mɛ́mla ɛpɔ̄ ɔkwɛ̄yi. A klla géē jé ɔdā nāa cíkā ō yá ā.

¹⁰A géē jééyī, cɛ́ɛ́ ɔdā nāa jé ā géē cɛ̄ lɛ ɔtū í he uwɔ.

¹¹Ohílīpú mɛ́mla ɔdā ō jé kú uwɔ géē gbō uwɔ.

¹²Ó klla géē cɛ̄ gā awɔ yá ucē ɔwɛ olɔhi, ó klla í gbō uwɔ ŋmá ɛgiyí ācobɔ̄bíipú,

¹³nēe nyɛ̄ɛ̄ ŋmá ɔwɛ kú oyēeyī okpaakpa ō lā, nēe gaá yɔ̄ ī yɛ ɔwɛ kú ajɛ odobū kú ínoōbīya ā.

¹⁴Ācɛ nɛ̄ ɔdōbɔ̄bí ō yá gē lɔnyɛ tū uwā, ācɛ nēe gē gwéeyē eko nēé bá ī bɔ̄bíipú nɛ̄ ó lɛyí ŋ́ mā.

¹⁵É wɛ ācɛ újí, nɛ̄ ɔ̄cɛ dúúmā í lɛ ɔtū ce uwá glá ŋ́, ohígbū kēé wɛ ācɛ nɛ̄ ɔ̄cɛ í kpɔ́tūce uwá glá ŋ́.

¹⁶A géē nyatá ŋmá abɔ̄ kú ɔnyā ōgbajā nōo ī bī ɛlā olɔnyɛ kú okónu kú nū lɛ plla awɔ tū ɔdōbɔ̄bí ā.

¹⁷Ɔnyā nɛ̄ ó lɛ iyī nū tū cíí lɛ ɔbá nū glá ŋ́ mā. Ɔ̄cɛ nōo klla leyī gwō ɛka nɛ̄ ó gbo iyɔ̄bū Ɔwɔicō ā bónū ā.

¹⁸Ohígbū ka ɔ́dāŋ ka a le tá ɔlɛ́ nū, ɛ́mba ɔwɛ nōo yɛ ga ɔlékwū nāa yɔ̄ ī yɛ abɔ́ɔ á. O ga ɔlɛ́ nū ā lɛbɛ̄ɛka o túbla ɔlíkɔtɔ ā.

¹⁹Ɔ̄cɛ dúúmā í gē ga ɔlɛ́ nū kóō bɛ̄cɛ oyēeyī glá ŋ́, ɛ́ɛ́ nɛ̄ ó klla ī má ɔwɛ o yɛ wā oyēeyī glá ŋ́.

²⁰Yɛ ɔwɛ nɛ̄ ācɛ okpaakpa gē yɛ ā, cɛ́ɛ́ ká ā lā oyēeyī okpaakpa ā á.

²¹Ohígbū ka ācɛ okpaakpa mɛ́mla ācɛ ojīlīmā mɛ́mla ācɛ okɛlā ɔkwɛ̄yí ā, gáā lé úgwū ajɛ kú alɔ nyā á.

²²Amáŋ Ɔwɔicō géē je ācobɔ̄bíipú ā kpó hɛ́ ŋmá ipú ajɛ ā, ó klla í je ācobīyíne ā kpó fu ŋmá ajɛ tɛgbatɛgba ā bɛ̄ɛka aɔ́cí ā.