Read idoma AÍITA 20 Bible Online

AÍITA 20 - idoma bible

AÍITA 20

¹Ejé wɛ ɔdā nōo ī yá ɔ̄cɛ íwɛ́wɛ. Ó klla ī je ɔ̄cɛ yá olíla. Ɔ̄cɛ dúúmā nɛ̄ ejé lɛ ɔ́ kwú wɛ olíla mɛ́mla ɔdāhá.

²Yúufi ɔcɛ́ nōo le cɔ̄nū, ɛ́gɛ́nɛ̄ a í yúufi ágábá nōo yɔ̄ ī tū oji ā. Ɔ̄cɛ dúúmā nōo lɛ ɔcɛ́ ɔtū bīya, le iyī nū ŋmó ɛɛ́.

³Ó wɛ ɔdā ojīlīmā ká ɔ̄cɛ kóō lɛ īyī nū tū cíí ŋmá ikpɛ́lā, amáŋ olíla gē yíkpɛ́lā eko dóódu á.

⁴Ɔ̄cɛ nɛ̄ ahi í cɛ̄ lɛ ɔ́ hɛ́hɔ̄ ɔgwā ŋ́ mā, í gáā má ɔdɛ̄hɔ̄ ce ɔnɔ̄ ŋ́.

⁵Ɛlá nɛ̄ ɔ̄cɛ gē gbo ā lipú lɛbɛ́ɛka ɔdā nɛ̄ ɔ̄cɛ ī tá ɛga o lipú nɛ̄hi kú ipú itekwú ā. Amáŋ ɔ̄cɛ dúú nōo jɔ́dā nɛ̄hi lɔfú pi ɔ́ wɛ̄ɛcɛ ɛ́gɛ́nɛ̄ ɔ̄cɛ gē pi éŋkpɔ̄ wɛ̄ɛcɛ ā glá.

⁶Ācɛ gē ka ɛ́gɛ́nɛ̄ é tá iyī uwā wāajɛ klla gē ka ɛ́gɛ́nɛ̄ é tōō lɔtūce ā, amáŋ, lɛ abɔ̄ wu ajɛ ká ā má ɔ̄, ɔ́dāŋ ka a géē má ɔ̄cɛ ɛ́gɔ́ɔmā glá?

⁷Ádā dúúmā nōo wɛ ɔ̄cɛ ɔkwɛ̄yí klla ī yá ucē okpaakpa, ɔtū géē he ayí nū nēe ī wā igbīhi nū ā.

⁸Ɔcɛ́ nōo cīce ɛyí akpa kú ɔcɛ́ gē hɛ́pɔ̄ okpaakpa ā, gē jé ɛyɛ́ɛyɛ́yí kú obɔ̄bí ŋmá olɔhi.

⁹Ɔ̄nyɛ lɔfú ka ka ɔtū kú anúɔ le yēŋēē, Odo kú anúɔ í kē bīyíne dúúmā ŋ́ glá ā?

¹⁰Aɔ́dā ɛpa nēe ī wú Óndú ā ɔtū ā bá yɔ̄ á, ɔdā ō miya odée kú újí, mɛ́mla ɔdā ō miya kú újí.

¹¹Ó kōō wɛ ayípɛ̄ gē ma ɔdā nēé wɛ ā fú, ŋmá lɛ ɛdɔ ucē nēé gē yá ā. Ɔ̄cɛ lɔfú jé ɔ́dāŋ ka ayípɛ̄ ā lɛ ucē olɔhi klla wɛ ayípɛ̄ ɔkwɔ̄ɔ̄kwɛ̄yi glá.

¹²Óndú ā kwú eyī nɛ̄ alɔ gē bī lɛ mɛ́ɛbɛ ā mla ahɔ̄ nɛ̄ alɔ gē bī le pó ɛlā ú kpó lɛ alɔ ɛɛ́.

¹³Ɔ́dāŋ́ ka a kwú eko kú uwɔ ú táajɛ lɛ iyɔ̄lā ō gbo, a géē gbɛhá. Yúklɔ́ eko dóódu, a géē lɛ ɔdōlé nɛ̄hi nāa í yɔ̄ ī lé.

¹⁴Ɔ̄cɛ nōo nyɔ̄ gaá lɔ́lá ŋmá ɛgiyí ɔ̄cɛ, gē da ɔ̄cɛ ɔ́ɔmā ka ɔ́lá odée ɔ́ɔ lɔnɔ íbí, amáŋ eko nɛ̄ ó nyɛ̄ɛ̄ ŋmá abɔ́ɔ, cɛ́ɛ́ o gbo ɔ́ gwéeyē ka ɔ́lá afa nɛ̄ anúɔ lá á.

¹⁵Ɛlā kú ɔ̄cɛ o lohílīpú lɔhi nɛ̄ɛ̄nɛ̄hi fíyɛ́ ugóolu (oje ɔdɔ) ámāŋ́ ka ɛdɔ aɛ́cɔ̄ ō gbɔlá á.

¹⁶Ɔ̄cɛ nōo líla gaá mīya abɔ̄ ugbɔga, cíkā nēé ī kpó iyó kú ɔlɛ́ nū kóō wɛ ɔdā ō cabɔ̄, gbéeko nɛ̄ ó lɛ ulé ā gbā kwɛyí.

¹⁷Ɔdā nɛ̄ ɔ̄cɛ lɛ ŋmá ɔwɛ kú ɔ̄cɛ nɛ̄ ó pīyatū ā, lɔfú lɔnyɛ tū ɔ̄ okónu bɛ̄ɛka ɔdōlé ā glá. Amáŋ igbīhāajɛ, ó géē lɛbɛ̄ɛka ɔdā nɛ̄ ɔjɛ wɛ omōōmu okónu kú nū ā.

¹⁸Lɛ abɔ̄ bī ɛlā olɔhi nēé nwū uwɔ ā, gbɔbū ɛ́ɛ́ kú ā miya ɔdā dúúmā, ámāŋ ka o nyɔ̄ gáā kpɛ́fú tá ācɛ ɔhá.

¹⁹O yá awanda í gē lɛ ɛlā tayínū glá ŋ́. Ā híī túbla ɔ̄cɛ dúúmā nōo gē kɛlā nɛ̄hi ŋ́.

²⁰Ɔ́dāŋ́ ka ɔ̄cɛ lɛ okónu tá lɛ ɛ́nɛ́ nū mla ádā nū, oyēeyī kú nū gē mɛ ɛ́gɛ́nɛ̄ ɔlá kú agege gē mí ajɛ odobū ā.

²¹Agbénú nɛ̄ ɔ̄cɛ lɛ nɛ̄ ó bū ahɛ nū ŋ́, géē mɛ fíyaa. Ó kē gáā tīile lɛ ɔ́ ŋ́ dúú.

²²Ā híī gwɔ̄ɔ́ci abɔ̄yī uwɔ ŋ́. Mabɔ̄ ɔ́ci ōgwō tá lɛ Ɔwɔicō, anú géē tá uwɔ abɔ̄ á.

²³Óndú ā gē wɔ́tū ācɛ nēe gē pīya ācɛ tū klla ī hɛ́ ācɛ lé ā.

²⁴Óndú ā le ɔwɛ nɛ̄ oyēeyī kú alɔ í yɛ ā mīya táajɛ gbɔbū ɛ́ɛ́. Ɛ́gɛ́nyá nɛ̄ ɔ̄cɛ í jé ɔdā nōo í yá ɔ̄ ā, abɔ̄ Óndú ōfōōfūnū gē jé ɛga nɛ̄ oyēeyī kú ɔ̄cɛ ī nyɔ̄ ā?

²⁵Aá gbɛlá cíí gbɔbū ɛ́ɛ́ kú ā cokónu ɔdā dóódu lɛ Ɔwɔicō. A lɔfu hīíjémā nū igbīhāajɛ glá.

²⁶Ɔcɛ́ ojéeyī géē lɛ abɔ̄ kwu ɔ̄cɛ nōo yɔ̄ ī yá ɔdōbɔ̄bí ā ɔkwu tɛ́ɛcɛ. Ó gáā ményīnyinyi nū eko nɛ̄ ó gáā yá ɔ̄ italā ŋ́.

²⁷Odo mɛ́mla ɔtū nɛ̄ Óndú ā je lɛ alɔ ā lɛbɛ̄ɛka agege kú nū nōo yɔ̄ ī jila klla ī mafú ɛlá olipú nɛ̄hi kú odo kú alɔ ā.

²⁸Ɔcɛ́ dúúmā nōo ī yá ucē ɔkwɔ̄ɔ̄kwɛ̄yi mɛ́mla ucē okpaakpa, géē ce akpa kú ɔcɛ́ piyóó.

²⁹Ɔfú kú ayípōklóbīya gē hɛ́ ācɛ eyī fuú, ācɛ kē ī lɛ ojīlīmā ce īnyīlɛ̄yí nɛ̄hɛ́ kú aókplícī.

³⁰Ōwē nɛ̄ ō ī ga ajɛ odo ā, gē nū ɔdōbɔ̄bí ŋmá odo á. Itali ā kē í na eyīpú kú ɔtū kú ɔ̄cɛ á.