Read idoma AÍITA 21 Bible Online

AÍITA 21 - idoma bible

AÍITA 21

¹Ɔtū kú ɔcɛ́, lɛbɛ̄ɛka éŋkpɔ̄ ɔkpá nɛ̄ Óndú gē nā tá ɔwɛ ā. Ó gē nā ɔ̄ tá ga ɛga dúúmā nōo he ɔ́ ɔtū.

²A lɔfú gbɛlá ka ɔdā nɛ̄ anúɔ gē yá ā ɔ́ɔ le kpaakpa, amáŋ Ondú ā gē jila, klla jé ɔdā nɛ̄ ō yɔ̄ ipú ɔtū kú ɔ̄cɛ á.

³O yá ɔda olɔhi mɛ́mla ɔdā okpaakpa ā, he Óndú ɔtū fíyɛ́ ō gaá gwɛ́ɛya lɛ ɔ́ á.

⁴Ɔbɔ́ɔ̄cɛ, oōgɔ̄ kú ɔ̄cɛ obɔ̄bíipú ā wɛ ínoōbīya.

⁵Ojuju ō yá lɔɔlɔhi dilii ā, gē cɛ̄ lɛ ɔ̄cɛ lɛ ɔdā nɛ̄hi. Ágágā ō hɛ́, í gē cɛ̄ lɛ ɔ̄cɛ lɛ odée ɛ́gɛ́nɛ̄ ó gē dɔɔ̄kā ŋ́.

⁶Agbénú nɛ̄ ɔ̄cɛ gē lɛ ɔwɛ obɔ̄bí ā, gē bī ikwū gé lɛ ɔ̄cɛ. Ó klla ī mɛ fíyaa.

⁷Ɔdōbɔ̄bí kú ɔ̄cobɔ̄bíipú piíí ā gē je ɔ́ yíífi á. Ohígbū ka ó tá kóō yá ɔdā nōo le kpaakpa ā.

⁸Ɔ̄cɛ o lɛ́pɔ̄bí ā gē yɛ ɔwɛ nōo le pú kɔgɔ́ɔ, amáŋ ɔ̄cɛ o lɛ́pɔ̄hi ā gē yá ɔdā nōo le kpaakpa ā.

⁹Okónōgwu kú inu lɔhi nɛ̄ ɔ̄cɛ í lā fíyɛ́ o lā ipú inū ékpónú mla ɔnyā ō kiífulá á.

¹⁰Ācobɔ̄bíipú yɔ̄ ī tíne ɔ́bíipú nēé géē bī eko dóódu. É gē méyīnyinyi ɔ̄cɛ dúúmā ŋ́.

¹¹Eko nēé le italā yá ɔ̄cɛ obɔ̄bí nōo ī gɔ̄ ka anúɔ jɔ́ɔdā nɛ̄hi ā, olíla nááná ā gē kllɔ̄cɛ́ ŋmá italā ɔ́ɔmā dúú. Amáŋ ɔ̄cɛ ojéeyī gē jé odée ŋmá ɔdā nēé nwū ɔ̄ ā.

¹²Ɔwɔicō nōo ī yá ɔdā okpaakpa ā gē jé ɔdā nōo ī yá ipú ɔlɛ́ kú ɔ̄cɛ obɔ̄bíipú, ó kē í je ɔ̄cobɔ̄bíipú yíífi.

¹³Ɔ̄cɛ dúúmā nōo tá ō pó ikwū kóō tá abɔ̄ nɛ̄ ogbɛhá gē je ā, eko nɛ̄ anú abɔ̄yī nū gáā jikwū ā, ɔ̄cɛ dúúmā í gáā tá ɔ̄ abɔ̄ ŋ́.

¹⁴Ɔ́dāŋ ka ɔ̄cɛ dúúmā le cɔ̄nū mla awɔ, ɛhi ō yá ɔ̄cɛ ɔ́ɔmā tayínū ā géē tú ɔ̄ ɔtū wāajɛ.

¹⁵Eko nēé le ɛpɔ̄ hɛ́ kpaakpa, ɔtū gē hi ɔ̄cɛ okpaakpa ā. Amáŋ eyī kē cá ācobɔ̄bíipú ā.

¹⁶Ɔ̄cɛ dúúmā nōo tá ka anúɔ í tōhílīpú ŋ́, ayíka ikwū bayi gē gbēyī nū á.

¹⁷Ɔ̄cɛ dúúmā nɛ̄ ɔnyɛ kú ɛcɛ, nɛ̄ ɔdā abahi bɛ̄ɛka ejé, ɔdōlé olɔhi he ɔ́ ɔtū nɛ̄hi géē je gbɛhá.

¹⁸Ōwē nɛ̄ ācobɔ̄bíipú gē tíne ō yá ācɛ olɔhi ā, géē kwúcē gé lɛ uwá.

¹⁹Ó lɔhi ká ɔ̄cɛ kóō lā áklɔ̄kpɛ ipú ígbíli, fíyɛ́ ō lā inu mla, ɔnyā ikpɛ́lā nōo klla ī ka ífulá nɛ̄hi.

²⁰Ācɛ ojéeyī ā gē gwō ipú abahi piyóó, amáŋ, ɔkwɔɔkwu nɛ̄ olíla mīyɛ ije kú nū ā, ó gē je ɔ́ ŋmó.

²¹Ɔ̄cɛ dúúmā nōo gbonɛnɛ klla ī yá ucē ɔkwɔ̄ɔ̄kwɛ̄yi, géē lɛ́ɛcɛ nɛ̄hi. Ācɛ kē í lɛ ojīlīmā ce ɔ́ klla í yá ɔdā olɔhi lɛ ɔ́.

²²Ojéeyī éyi lɔfú mīyɛ igelī nɛ̄hi éyi nɛ̄ aícɔ́ɔja bá anú nɛ̄hi, tābɔ̄ glá. Cɛ́ɛ́ ó lɛ ɔdɔ olɔfú nɛ̄hi kú igá kú ɔlɛ́ ā, nēé kpɔ́tūce ā wúlatāajɛ.

²³Ɔ̄cɛ dúúmā nɛ̄ ó dɔɔ̄kā ō ga ipú unwalu ŋ́, ayíka ó leyī kwɛcɛ lɛyíkwu ɛlā nōo í ka ā.

²⁴Ɔ̄cɛ nōo ī gɔ̄ ka anúɔ jé odée nɛ̄hi ā, wɛ ɔ̄cɛ nōo gē gɔ̄ mɛ́mla ɔ̄cɛ nɛ̄ ó gē leyī yɛ ɔdā dúúmā ŋ́.

²⁵Ɔ̄cɛ okwáhi mla ɔ̄cɛ oyújulu nōo tá ō yúklɔ́ yɔ̄ ī ŋmó iyī nū.

²⁶Ɔdā nɛ̄ ó gē yá ōfōōfūnū ā, wɛ ō yɔ̄ ī gbɛlá kú ɔdā nɛ̄ ó dɔɔ̄kā ō lɛ ā. Amáŋ ɔ̄cɛ ɔkpaakpa ā gē lɛ odée eko dóódu, klla yɔ̄ ī je lɛ ācɛ ŋmá ɔtū kú nū.

²⁷Eko dúúmā nɛ̄ ɔ̄cɛ obɔ̄bí gē gwɛ́ɛya lɛ Óndú ā, ó gē wú Ondú ɔtū. Ofíyɛ́ dúú ā, ɔ́dāŋ ka ó gē gwɛ́ɛya ɔ́ɔmā ŋmá ɔtū obɔ̄bí.

²⁸Ācɛ í gē mīyɛ ijáalí kú ɔ̄cɛ o kɛ̄mgbɛ̄ ŋ́, amáŋ, ɛlā kú ɔ̄cɛ nōo gē leyī yɛ ɛlā ɛ́ɛ́ nōo gē ka ā, nēé gē mīyɛ ákú nū á.

²⁹Obɔ̄bíipú ā leyī kwúfúlá ká yɔ̄ ī yúula, amáŋ ācɛ okpaakpa gē lɛ ɔtū ce iyī uwā ɔwɛ nēé gē yɛ ā.

³⁰Íjééyī dúúmā, ɔdōjé dúúmā, ojuju dúúmā, i gáā tá ɔ̄cɛ abɔ̄ glá ŋ́, ɔ́dāŋ́ ka Óndú ā leyī hɛ́ kwu ɔ́.

³¹Ācɛ lɔfú tá ɔnya tū gē gbēyī ɛfú ō kpó glá, amáŋ, Óndú ā gē cɛ̄ lɛ ɔ̄cɛ gē yálé ɔgbɛ́fú á.