Read idoma AÍITA 22 Bible Online

AÍITA 22 - idoma bible

AÍITA 22

¹Iyē olɔhi ō lé mla ojīlīmā cɛgbá nɛ̄hi fíyɛ́ agbénú nɛ̄hi ō lɛ á.

²Ɔdā nɛ̄ olɔdu mɛ́mla ogbɛhá lɛ tɔ̄há ā, wɛ ka Óndú yá uwā ɛplɛ́ɛpa á.

³Ojéeyī lɛ unwalu má yɔ̄ ī wā, ó gē kwu ŋmá ɛgiyí nū, amáŋ olíla ā gē nyɔ̄ cuúcuú gaá wu ɔdōbɔ̄bí ɔ́ɔmā abɔ̄, cɛ́ɛ́ ó gbɔɔ́ ō hīíjémā igbīhāajɛ.

⁴Lɛyítáajɛ lɛ Óndú, cɛ́ɛ́ ká ā tú iyī uwɔ wāajɛ lɛ ɔ́. Ulé nɛ̄ ó ī gbā gā awɔ ā wɛ agbénú, ojīlīmā mɛ́mla oyēeyī ō likpō ipú ɛcɛ nyā.

⁵Ujē mɛ́mla ukpa bá ɔwɛ kú ɔ̄coyódōbɔ̄bí, ɔ̄cɛ nɛ̄ oyēeyī kú nū he ɔ́ ɔtū, kóō túblla ɔwɛ ɔ́ɔmā ŋ́.

⁶Nwū ɔyí uwɔ nɛ̄ŋcɛ́, ɔwɛ nɛ̄ ó cíkā ō yɛ ā, cɛ́ɛ́ eko nɛ̄ ó le jɛ̄, ó gáā nyā ŋmá ɔwɛ ɔ́ɔmā gɛ ŋ́.

⁷Ogbɛhá wɛ ɔ̄cocɛ̄hɔ̄ kú olɔdu nɛ̄, ācɛ nēe kplá ije ā lɛbɛ̄ɛka ɔfiyɛ kú acɛ nēé kplá ije ŋmá ɛgiyí nū ā.

⁸Ɔ̄cɛ nōo nyi īkpō kú ɛpɔ̄ újí ɛ́gɛ́nɛ̄ ɔglɛ́ɛjí gē nyi īkpō ā, ífi gáā wɛ ukpɛ́ kú nū á, cɛ́ɛ́ ó méyī mɛ́ɛbɛ lɛ abɔ̄ da ācɛ ɔhá ɛyī tāajɛ gɛ ŋ́.

⁹Óndú géē hɔ́hā ce ɔ̄cɛ dúúmā nōo gē jɛ́lá kú ɔdōlé lɛ aógbɛhá.

¹⁰Lɛ ɔ̄cɛ nōo gē gbɛlá ka anúɔ jé ɔdā nɛ̄hi tū iyī nū ā nū bɛ̄cɛ, cɛ́ɛ́ ikpɛ́la, áafú mɛ́mla ɛcá ō cá ācɛ ɔhá kē í mɛ.

¹¹Ɔcɛ́ gē yóklóbīya mla odúúdú ācɛ nēe ī kɛlā ɔkwɛ̄yi nōo klla ī kɛlā ogbonɛnɛ ŋmá okónu.

¹²Óndú ā ī má ka ɔkwɛ̄yi ɔ́ɔ yɔ̄, o ŋmá lɛ ō je ɛlā ká ācɛ o kɛ̄mgbɛ̄ ā yɛ́fulɛ́fu tū uwā okónu.

¹³Ɔ̄cɛ okwáhi nōo klla ī yújulu ā gē klá ɔlɛ́ ī ka, ɔ́dāŋ nɛ̄ anúɔ le tɛ́ɛcɛ, ágábá ɔ́ɔ géē je anúɔ ŋmó tá ipú úláyi.

¹⁴Ɛlā ō jé ācɛnyīlɔ tū ɔ̄ kú ɔnyā ōgbajā ā, lɛbɛ̄ɛka ukpa ā lɛ ācɛ dúúmā nɛ̄ ó he Óndú ā ɔtū ŋ́.

¹⁵Ɔyípɛ̄ í yá uce kú íla piíí, amáŋ itali ō gɔ́ ɔ̄ géē nwū ɔ̄ ɔwɛ nɛ̄ ó géē yá ucē olɔhi ā.

¹⁶Ɔ̄cɛ nōo gē yá ācɛ olagbénú ɛhi, amáŋ gē pīya aógbɛhá tū, cɛ́ɛ́ kóō lɛ agbénú tōōtɔ̄ɔ̄ ā, géē je gbɛhá igbīhāajɛ.

¹⁷Jāhɔ̄, n géē nwū uwɔ ɔdā nɛ̄ ācɛ ojéeyī ka ā. Kllɔcɛ́ ɔdā nēé ī nwū ā.

¹⁸Ɔtū géē he uwɔ, ɔ́dāŋ ka a ī blakwu ɔdā nēé gē nwū ā, nāa klla ī bī okónu kú uwɔ ī ka ɔ́ tɛ́ɛcɛ glá.

¹⁹N tíne kú ā kwú ɔtū kú uwɔ ú kpóce Óndú ā, ɔ́ɔmā yá ɛ́ɛ́ nɛ̄ n yɔ̄ ī nwū uwɔ ɛlā kú íjééyī nēe bá ā ícɛ nyā á.

²⁰N lɛ ɛlā kú íjééyī ofu cīgwó, nɛ̄ ɛlā ō nwū ɔ̄cɛ yɔ̄ ipú nū ā, tá tāajɛ gā uwɔ ɛɛ́.

²¹É géē nwū uwɔ klla mafú gā uwɔ, ɔdā nɛ̄ ɔkwɔ̄ɔ̄kwɛ̄yi mɛ́mla okpaakpa wɛ ā. Cɛ́ɛ́ ɔ́dāŋ nɛ̄ ācɛ lɛ uwɔ tɛ̄hɔ̄ ka ā nyɔ̄ í lɛ ɔkwu kú ɔkwɛ̄yi nōo yɔ̄ ipú ɔdā dúúmā bū wā, a lɔfú bī ohi okpaakpa mla ɔkwɛ̄yi ā gé lɛ uwá glá.

²²Ā híī wī ogbɛhá uwī ŋ́, ohíghū ka ó wɛ ogbɛhá, ɛ́ɛ́ nāa gē pīya ācɛ nēé lɛ otábɔ̄ ŋ́ mā tū únɛ́pɔ̄ ŋ́.

²³Óndú ā gē kɛpɔ̄ kú ācɛ nēé lɛ ɔ̄cɛ o tá uwā abɔ̄ ŋ́ mā á. Ɔ̄cɛ dúúmā nōo bɛ́yíkwu oyēeyī kú uwɔ, Óndú ā abɔ̄yī nū géē bɛ́yí kwu oyēeyī kú ɔ̄cɛ ɔ́ɔmā.

²⁴Ā híī yá oklóbīya tá ɔ̄cɛ dúúmā nōo lɛ ánya mɛ́mla ɔtū ōkpúúlú obɔ̄bí nɛ̄hi ŋ́, ɛ́ɛ́ nāa gē yɛ mla ɔ̄cɛ ocɔ̄nū nɛ̄hi ŋ́,

²⁵ohígbū nāa géē kllɔcɛ́ ucē kú nū, nɛ̄ á gáā bɛ̄cɛ ŋmá anú glá ŋ́.

²⁶Ā híī mīyābɔ̄ ulé kú ɔ̄cɛ dúúmā ka anɔ́ɔ géē cílá ŋ́.

²⁷Ohígbū eko nēé géē wā í je uwɔ agōdō kpó, ɔ́dāŋ nɛ̄ á cíla ulé ā glá ŋ́.

²⁸Ā fu ɛjī kú ajɛ nɛ̄ aádáádā uwɔ tū ā ŋ́.

²⁹Aá má ɔ̄cɛ dúúmā nōo gē yúklɔ́ olɔhi fú gā um, cɛ́ɛ́ n kē í ma ɔ̄cɛ nōo lɔhi fíyɛ́ nōo cíkā ō cɛ̄ aɔ́cɛ́ ɛhɔ̄ ā fú lɛ aá.