Read idoma AÍITA 23 Bible Online

AÍITA 23 - idoma bible

AÍITA 23

¹Ɔ́dāŋ́ ka a cīce gáā lé ɔdōlé mla ɔ̄cɛ nɛ̄hi dúúmā, lɛ ɛlá kwu ɛdɔ ɔ̄cɛ nɛ̄ ɔ̄cɛ ɔ́ɔmā wɛ ā.

²Ɔ́dāŋ́ ka a tɛtɛ gē yá unwōdōlé nɛɛ, ayíka a lɛ iyī uwɔ kwú tū.

³A híī yá unwōdōlé olɔhi nɛ̄ ó gē je gā uwɔ ā ŋ́, ohígbū ka ó lɔfú yɔ̄ ī jé uwɔ má glá.

⁴Ā híī je īyī uwɔ ŋmó ohígbū agbénú ōgla bá ajɛ lɛ īyī uwɔ ŋ́. Lɛ íjééyī jé ká ā lɛ iyī uwɔ cēbī.

⁵Ije kú uwɔ lɔfú mɛ ipú eyī ōcēbeé igbeékpónú glá, bɛ̄ɛka ɔdā nɛ̄ ó lɛ acá bū le wu ŋmá ɛgiyí uwɔ bɛ̄ɛka okpé ā.

⁶Ā híī lé ɔdōlé kú ɔ̄cɛ oyúkpɛ́ ŋ́, ɛ́ɛ́ nāa gē yá unwōdōlé nɛ̄ ó gē je lɛ ɔ̄cɛ ā ŋ́.

⁷Ó géē lɔfú da uwɔ kahíníī, “Wā í lé, kú ā gwá.” mla anú glá. Amáŋ igwú nɛ̄ ó gē hī uwɔ abɔ̄ ā, í ŋmá ɔtū kú nū ŋ́.

⁸Ā géē je odúúdú ɔdōlé kú nū nāa lé ɔ́ɔmā gba bónū, cɛ́ɛ́ ocɛ̄tra nɛ̄ a cɛ̄tra ɔ́ kpɛ́mm ā, kwú pīya eko o kpó bónū.

⁹Ā híī kɛlā kú íjééyī kú uwɔ ipú eyī olíla ŋ́, ó gáā lɛ ɛlá wu ɔ́, ɛ́ɛ́ nɛ̄ ó ī jé ile kú ɛlā ɔ̄kwɛ̄yí mla íjééyī kú uwɔ ɔ́ɔmā ŋ́.

¹⁰Ā híī fu ɔcí kú ɛjī ká ajɛ ŋmá ajɛ ŋ́, ɛ́ɛ́ nāa gē mīyɛ ajɛ kú ayókwū ŋ́.

¹¹Ohígbū ka Óndú ohɔ́nyɛtá kú uwā lɔfú nɛ̄hi. Ó géē cē uwā kɛpɔ̄ kú awɔ mla uwá.

¹²Jāhɔ̄ lɛ ɛlā nēé gē nwū uwɔ ā, cɛ́ɛ́ ká ā le jééyī dúúdú.

¹³Ā híī kpó eko bónū ō itali gɔ́ ɔyí uwɔ ká ā nwū ɔ̄ ɛlā ŋ́. Ɔ́dāŋ́ ka a lɛ ɔ́ gɔ́ nááná, ó gáā kwú ŋ́.

¹⁴Ɔ́dāŋ́ ka a lɛ itali gɔ́ ɔ̄, a géē yɔ̄ ī nya ɔ́ tá ŋmá ikwū nɛ̄ n.

¹⁵Ɔyí um, ɔ́dāŋ ka a le jééyī, ɔtū gē he um nɛ̄hi, n klla í gwéeyē.

¹⁶Ɔtū géē he um nɛ̄hi eko nɛ̄ n yɔ̄ ī pó abɔ̄ a yɔ̄ ī kɛlā kú íjééyī.

¹⁷Ā híī mímálānyī kú agbénú nɛ̄ ācobīyíne gē lɛ ā ŋ́. Ɔtū kú uwɔ kóō kwu ufi kú Óndú ā ō yá.

¹⁸Ɔ́dāŋ ka ó lɛ ā, ɛ̄cɔ̄bū kú uwɔ géē lɔhi gā uwɔ. Eyíyōce kú uwɔ í kē gáā já uwɔ kwɔɔwɛ ŋ́.

¹⁹Ɔyí um, jāhɔ̄ gā um, ká ā jééyī, cɛ́ɛ́ ká ā lɛ odo kú uwɔ̄ tá ɔwɛ okpaakpa ā.

²⁰Ā híī yɛ mla ācɛ ōgwéjé nɛ̄hi mɛ́mla ācɛ nēe ī lé ɔdōlé nɛ̄hi ŋ́.

²¹Ɛhá géē kwú ācɛ ogwéjé mla aóléwulu lé kpɔkɔ́. Ɔ́dāŋ́ ka ɔdā nāa jé ōfōōfū nū ā wɛ, o yɔ̄ ī lé, yɔ̄ ī gwá klla yɔ̄ ī gbiyɔ̄lā piyóó, ó gáā gbojī ɛ́ɛ́ nāa géē gbɔɔ́ ō lɛ áhingílí wu iyē ā ŋ́.

²²Jāhɔ̄ lɛ ádā nōo ma uwɔ ā. Ā lɛ eyī gla ɛ́nɛ́ uwɔ bónū, eko nɛ̄ ó kwú hīla ókplícī ŋ́.

²³Ɔkwɛ̄yi, íjééyī, ɔdā ōjé mɛ́mla ɛyí ɔdā ō jé cíkā nāa ī lɛ, amáŋ eko nāa le lɛ, ā cɛ̄ lɛ uwá hɛ́ uwɔ abɔ̄ ŋ́.

²⁴Ɔtū géē he ádā kú ɔyí olɔhi mla ɔyí ō yá ucē okpaakpa dóódu. Ɔ̄cɛ dúú nōo lɛ ɔyí ojéeyī ma, ɔtū gē he ɔ́.

²⁵Yá ká ɔtū ká o he ɛ́nɛ́ mɛ́mla ádā nēe ma uwɔ ā.

²⁶Ɔyí um, kwú ɔtū kú uwɔ ú gā um, cɛ́ɛ́ ká ā yɛ tá íkpa kú um.

²⁷Aákwuna mɛ́mla anyā ōgbajā wɛ ukpa o ŋmó ɔ̄cɛ glá nɛ̄ n.

²⁸É kwū ajɛ yɔ̄ ī gbēyī ācɛnyīlɔ bɛ̄ɛka ācɛ ohéjulúgwu ā, anɔ́ɔ é gē yá kú ācɛnyīlɔ alɛwa kéē cikpó ɔnyā nɛ̄ ó wɛ ɔnyā uwā ŋ́.

²⁹Ɔ̄nyɛ̄ gē yá ikpɛ́lā eko dóódu ā? Ɔ̄nyɛ gē táafú gē nuunu eko dóódu ā? Ɔ̄nyɛ nɛ̄ odée gē hɛ́ ɔ̄ iyē nɛ̄ ágbe klla ī yá ɔ̄ eko dóódu ā? Ɔ̄nyɛ nɛ̄ eyī kú nū gē tɔ́ɔ́wá yóó eko dóódu ā?

³⁰Ācɛ nēé gē ce ɛyí ejé gbojī ā nɛ, mɛ́mla ācɛ nēe klla gē nyɔ̄ ī jé ejé olɔfú ɛ̄yīpɛ̄ dóódu má ā nɛɛ.

³¹Ɔ́dāŋ nɛ̄ ejé wɛ ɔnɔ̄wá yɔ̄ ī wú saa ipú íkókwū, nááná, ā cɛ̄ lɛ ɔ́ já uwɔ tū ɔ̄ ŋ́, ohígbū ka ɔnyɛ kú nū gē plla ɔ̄cɛ.

³²Igbīhāajɛ ó gē kwú ɔ̄cɛ bɛ̄ɛka ogwije ā.

³³Īkpēyī kú uwɔ géē gbɔɔ́ ō má ɔdā oyéyījii alɛwa. Á klla gáā gbɛlá lɔhi ɛ́ɛ́ nāa gē kɛlā kpaakpa ŋmá okónu glá gɛ ŋ́.

³⁴Eko nāa tíne ō gbiyɔ̄lā nɛɛ, ó géē lɛbɛ̄ɛka agōdō ā lɛ akā gē yāwu ā. Ó klla géē lɛbɛ̄ɛka a yɔ̄ gē túnēē gɔbū gigbīhi ɛyí agōdō kú uwɔ ā.

³⁵Ā géē yɔ̄ ī kahíníī, “É tū um ɛ̄bɛ̄, ó kē lɛ ɔnɔ tū um ŋ́. É ŋmó um ijē, amáŋ ń lɛ ɛlá wu ɔ́ ŋ́. Eko nyá nɛ̄ n géē héyī ŋmá iyɔ̄lā ā? N klla í nyɔ̄ í gwá ejé igbɔhá.”