Read idoma AÍITA 24 Bible Online

AÍITA 24 - idoma bible

AÍITA 24

¹Ā híī mímálānyī kú ɔdā dúúmā nɛ̄ ācɛ obɔ̄bí gē lɛ ā ŋ́, ɛ́ɛ́ nāa gē yá oklóbīya mla uwá ŋ́.

²Ohígbū, ka ɔdōbɔ̄bí nēé bá ī gbɛ̄la nū piyóó á. Ɛ̄lā obɔ̄bí kē ī ŋmá okónu kú uwā piyóó á.

³Íjéeyī mla ɔdōojé nēé gē bī le gwó ɔlɛ́ á.

⁴Oŋmá lɛ ɔdōōjé nɛ̄ agbénú olɔhi alɛwa ī mu ipú ínu éyééye á.

⁵Íjéeyī ō jé lɔhi fíyɛ́ ɔfú nɛ̄hi ō lɛ á. Ɔ̄cɛ o jɔ́dā kē lɔfú fíyɛ́ ɔ̄cɛ olɔfú á.

⁶Ɔ̄cɛ gē yá ojuju, klla gē miya ɛfú ō kpó lɔɔlɔhi ɛ́ɛ́, nɛ̄ ó géē nyɔ̄ gāá kpɛ́fú á. Ɛ́gɛ́nɛ̄ a lɛ ācɛ o nwū uwɔ ɛlā olɔhi alɛwa lɛ ā, nāa kwu ō yálé ajaajɛ lɛ á.

⁷Ɛlā kú íjééyī lipú nɛ̄hi fíyɛ́ ɔdā nɛ̄ aólíla gē jɛ́yí nū. Aólíla í gē má ɛlā dúú ō ka, eko dúú nēé gē kɛlā ɔkwɛ̄yí ɛyí ɔpu ŋ́.

⁸Ɔ̄cɛ nōo gē yá ojuju kóō yá ɔdōbɔ̄bí piyóó ā, é gē hī ɔ̄ ka ɔcɛ́ kú unwalu.

⁹Ɛlá ō gbo kú olíla wɛ ínoōbīya eko dóódu. Ācɛ gē wɔ́tū ɔ̄cɛ nɛ̄ ó lɛ ɔdā ɔhá ō yá gwū ācɛ ō jijitēyī tá ŋ́ mā.

¹⁰Ɔ́dāŋ́ ka a le gege eko kú unwalu, ayíka a kwáhi ɔkwɔ̄ɔ̄kwɛ̄yi.

¹¹A híī kpéko bónū ká ā hɛ́ ɔ̄cɛ dúúmā nēé bī nyɔ̄ gáā ŋmó icííci tá ŋ́.

¹²A géē lɔfú ka ka ɔ́dāŋ keé lɛ ɔ́ ŋmó, nááná ɔ́ɔmā í wɛ ɛlā anúɔ ŋ́, amáŋ Óndú ā nōo gē kɛpɔ̄ ā jé ɔtū kú uwɔ. Óndú ā má uwɔ, ó ī gbō uwɔ. Ó kē í cílá uwɔ ulé ɛ́gɛ́nɛ̄ úklɔ́ kú uwɔ lɛ ā.

¹³Ɔyí um, lé ɛnwú, ohígbū ka ó lɔnyɛ́. Ɛ́ gɛ́nɛ̄ enyi kú āgā kú ɛnwū ā kē lɔnyɛ tū uwɔ okónu íbí ā,

¹⁴jé ka ɛ́gɔ́ɔmā nɛ̄ íjééyī gē lɔnyɛ tū odo kú uwɔ lɛ á. Le jééyī, cɛ́ɛ́ kú ɛ̄cɔ̄bū kú uwɔ kóō le lɔhi.

¹⁵Ā híī lɛbɛ̄ɛka ācobɔ̄bíipú nēe gē bayi gbēyī ɔ̄cɛ olɔhi mɛ́mla ɔ̄cɛ okpaakpa kéē wī ɔ̄ uwī, ámāŋ kéē nyɔ̄ í wu ɔlɛ́ nū klá ɛcɛ ā ŋ́.

¹⁶Ɔ̄cɛ okpaakpa mɛ́mla ɔ̄cɛ olɔhi lɔfú gwōnū ce ɔhɔ́ɔ́há igbo ahāapa glá, ó kē í cāŋjɛ igbo ahāāhilapa ā. Amáŋ unwalu kú igbeékpónú jɛ̄, nōo géē je ɔ̄cobɔ̄bíipú ā yíífi.

¹⁷Eko dúú nɛ̄ olɛlā kú uwɔ lɛ ikpó gbo ajɛ, má gwōnū. Ā gwéeyē ɛ́ɛ́ nɛ̄ ɔtū gē he uwɔ ŋ́.

¹⁸Ohígbū nɛ̄ Óndú ā géē jé ka a yɔ̄ ī gwéeyē, nɛ̄ ɔtū í gáā he ɔ́ ŋ́, nɛ̄ ó gáā yá olɛlā kú uwɔ ɔ́ɔmā italā gɛ ŋ́.

¹⁹Ā je unwalu lɛ īyī uwɔ ohígbū ācɛ obɔ̄bī ŋ́, ɛ́ɛ́ nāa gē mímálānyī kú ācɛ obɔ̄bí ŋ́.

²⁰Ohígbū ka ācɛ obɔ̄bí ā í lɛ ɛ̄cɔ̄bū dúúmā ŋ́. Oyéeyī kú uwā lɛbɛ̄ɛka ɔlá ofíyajɛ nōo géē je nyí ānāānā ā.

²¹Ɔyí um, lɛyítáajɛ lɛ Óndú ā mɛ́mla ɔcɛ́. Ā híī túblla ācɛ dúúmā nēe ī yīkpɛ̄yí ɔlɔfú tá uwā ɛplɛ́ɛpa ā ŋ́.

²²Ohígbū ka ífi lɔfú ŋmá ɛgiyí uwā, wā í klá ɛdɔ kú ācɛ ɛ́gɔ́ɔmā igbledū glá.

²³O gwó ɔwɛ ce abɔ̄ éyi eko kú ɛpɔ̄ ō ka í lɔhi ŋ́.

²⁴Ɔ̄cɛ dúúmā nōo lɛ ɛpɔ̄hi hɛ́ lɛ ɔ̄cɛ o yá ɔdōbɔ̄bí, ācɛ géē tá okónu lɛ ɔ̄cɛ ɔ́ɔmā, odúúdú ācɛ kú éwo ā klla í wɔ́tū nū.

²⁵Amáŋ ɔ̄cɛ dúú nōo lɛ ɛgba dɛ̄ tū ɔ̄cɛ ō yá ɔdōbɔ̄bí, ó géē he ācɛ ɔtū, é géē hɔ́hā ce ɔ́ klla géē wafa lɛ ɔ́.

²⁶Ohi ɔkwɔ̄ɔ̄kwɛ̄yi ō tá wɛ ocābɔ̄ mafú kú ɔtu oyēŋēē nɛ̄.

²⁷Lɛ ɛhɔ̄ lɛ kú ā klla lɛ ɔdɛ̄hɔ̄ lɛ, gbɔbū ɛ́ɛ́ kú ā gwó inu, kú ā lɛ ɔlɛ́ abɔ̄yī uwɔ lɛ. Cɛ́ɛ́ a le jé kpɔ́cí ka ɔdā ō bī yábɔ̄ ɔ́ɔ gáā ŋá anúɔ gɛ ŋ́.

²⁸Ā cījáalí tū ɔ́mpa uwɔ icííci ŋ́, ɛ́ɛ́ nāa gē kɛ̄mgbɛ̄ ce ɔ́ icííci ŋ́.

²⁹Ā híī kahíníī, “Ɔdā nɛ̄ ó yá um ā, n géē yá ɔ̄ piíí,” ámāŋ ka, “N géē cílá anú ulé kú ɔdā nɛ̄ ó yá um ā piíí” ŋ́.

³⁰N gaá gwū ɛhɔ̄ kú ɔlɛ́ okwáhi mɛ́mla oyújulu tá.

³¹N má, ácí mɛ́mla ujē le mu tū odúúdú ɛhɔ̄ ā. Ácí klá odúúdú ajɛ ā kpúúmm, ɔdɔ kú ɛcɔ̄ kú nū klla kwú wúla tāajɛ.

³²Anɔ́ɔ n má ɔ̄, klla lɛ eyī yɛ ɔ́. N le ɛlā éyi jé ŋmá ɛhɔ̄ ɔlɛ́ nū nyā.

³³Ó he uwɔ ɔtū, a lɛ abɔ̄ kpó wu agada, ká ā gbɔlā lígíí, ká ā mlɛ́nyɔ́ ká ā má ɔ̄.

³⁴Ɛhá géē wā í klá awɔ bɛ̄ɛka uwī ā. Úkpa géē bī uwɔ ká, bɛ̄ɛka ɔ̄cɛ ohéjulúgwu ā.