Read idoma AÍITA 25 Bible Online

AÍITA 25 - idoma bible

AÍITA 25

¹Aɛ́nyā wɛ ita kú Usólōmɔn, nɛ̄ ācɛ ɔlɛ́ Uhɛ́sɛkíya ɔcɛ́ kú Ujúda tá tāajɛ ā.

²É ī cɛ̄tra Ɔwɔicō kú ɔdā nɛ̄ ó gē le tayínū ā. É kē ī cɛ̄tra aɔ́cɛ́ kú ɛyí kú aɔ́dā ō tayínū nēé gē ka tɛ́ɛcɛ péee ā.

³Ɛ́gɛ́nɛ̄ ɔkpáncō licō, nɛ̄ ísu lipú lɛ ā, ɛ́gɔ́ɔmā nɛ̄ ācɛ í jé ɔtū kú aɔ́cɛ́ ŋ́ lɛ á.

⁴Lɛ īmū kpó ŋmá ipú oje nɛ̄hɛ́, cɛ́ɛ́ onɔ̄wá ā kē í bī oje ā lɛ na ɔdā olɔhi nɛ̄hi.

⁵Ɔwɛ íkpónú ɔ́ɔmā, ɔ́dāŋ ka lɛ ācobɔ̄bíipú ō nwū ɔcɛ́ ɛlā kpó ŋmá ɛgiyí ɔcɛ́, ɛpɔ̄ okpaakpa géē yɔ̄ ipú ajɛ nɛ̄ ó gē gbō ā.

⁶ Ā híī ma iyī uwɔ fú lɛ ɔcɛ́ ka anúɔ wɛ ɔ̄cɛ éyi ocɛgbá nɛ̄hi, ámāŋ ka o je iyī uwɔ gicō eko nāa háyi iyɔ̄bū ɔcɛ́ ŋ́.

⁷Ohígbū ka ó géē lɔhi kéē da uwɔ ka a wā gāá cīce icō amānyā, fíyɛ́ ō da uwɔ ka ā cāŋjɛ ŋmá ɛga nāa cīce iyɔ̄bū ɔcɛ́ ɔ́ɔmā.

⁸Ā híī nwúleyīkwū ō bī ɔdā dúúmā nāa má ā ga únɛ́pɔ̄ ŋ́. Eko nɛ̄ ɔ̄cɛ ɔhá nōo má odée ɔ́ɔmā dúú ā, lɛ ijáalí kú uwɔ ŋmónyí bɛ́ɛ́gɛ? Abɔ̄ a géē yá lɛ āa?

⁹Awɔ mɛ́mla ɔ́mpa awɔ kóō lɛ ɛlā dúú nōo tá ɔtāhɛ̄ kú aá kagwó ōfōōfū aá. Ā híī nyɔ̄ í ka ɔdā nōo tayínū ā tɛ́ɛcɛ ŋ́.

¹⁰Ohígbū nɛ̄ odúúdú ācɛ géē kwú uwɔ abɔ̄, ka awɔ ɔ́ bī ɛlā tū ipú glá ŋ́, nɛ̄ uwēyī nōo í kwú uwɔ ā í gáā mɛ ŋ́.

¹¹Ɛlā nɛ̄ ɔ̄cɛ le ka lɔhi, lɛbɛ̄ɛka ɔdā ō yá héyīfuú kú ugóolu (oje ɔdɔ) nōo wu ipú oje nɛ̄hɛ́ ā.

¹²Ɛlā nɛ̄ ɔnyākwɔ́cɛ gē nwū ɔ̄cɛ nōo le tútū ō pó ā gbɔɔ́lá fíyɛ́ oje nɛ̄hɛ́ mɛ́mla ugóolu (oje ɔdɔ) mɛ́mla ayīnu adāgbá á.

¹³Ɔ̄cocɛ̄hɔ̄ okpaakpa ā gē gbo ɔ̄cɛ nōo tū ɔ̄ ɛhɔ̄ ā ɔtū nɛɛ, bɛ̄ɛka éŋkpɔ̄ ō hīlaŋ́dɔ́ eko kú ɔnɔ̄ ā.

¹⁴Ācɛ nēe gē cokónu ɛhi nēé gē yá ɔ̄ ŋ́ mā, lɛbɛ̄ɛka, ɔwɔ nōo le tū kpúmm mla owu kwūūū nɛ̄ ó yá ŋ́ mā.

¹⁵O kwú ɛlā tū ɛmɛɛma mla ogbēyīcíí, géē lɔfú kwú ánya kú ɔcɛ́ tū glá. Ó klla ī wī ɛlā nōo lɔfú nɛ̄hi ā yɛwuu.

¹⁶Ā híī lé ɛnwú nɛ̄hi fíyɛ́ ɛ̄jīla nōo ce uwɔ ɛgbá ā ŋ́. O lé nɛ̄hi kú ɛnwú gē cɛ̄ lɛ ɔ̄cɛ gē gba.

¹⁷Ā ga ɔlɛ́ ɔ́mpa uwɔ ojigógó ŋ́, ɛ̄jɛ̄ kú uwɔ gē je jɛ̄ ɔ̄, nɛ̄ ó klla í gbɔɔ́ ō wɔ́tū uwɔ.

¹⁸Ije ō cē bá ɔ̄cɛ lɛbɛ̄ɛka ɔkpacaŋ́gelī ō le gwu ɔ̄cɛ, ámāŋ ɔyī ō cɛ̄ ɔ̄cɛ, ámāŋ ka ogbló ō lɛ fīyɛ̄ ɔ̄cɛ ā nɛ.

¹⁹O gbolóce ɔ̄cɛ ɛflɛ́ɛfu nɛ̄ ó tōō lɔtūce ŋ́ eko kú unwalu mla ámíyā, lɛbɛ̄ɛka o lé ɔdōlé mla ayīnu nōo gáā fu, ámāŋ ka o yāwu mla ikpō obɔ̄bí nōó gáā kwu ajɛ glá ŋ́ mā.

²⁰O yɔ̄ ī gwíijē lɛ ɔ̄cɛ nɛ̄ ɔtū gē wú ɔ̄ ā, lɛbɛ̄ɛka o yɔ̄ ī plla úwé ŋmá iyē eko ofū ā, ámāŋ o yɔ̄ ī lɛ ɔmā tū ipí.

²¹ Ɔ́dāŋ́ ka ɛmiyɛ gē ŋmó aólɛlā kú uwɔ, je ɔdōlé lɛ uwá. Ɔ́dāŋ ka ijēēnyi gē ŋmó ɔ̄, je ɔdā ōgwá lɛ ɔ́.

²²O ŋmá ɛ̄nyā, a géē cɛ̄ lɛ uwēyī kwú ɔ̄ nɛ̄hi. Óndú ā géē cílá awɔ ulé.

²³Ɛ́gɛ́nɛ̄ owu kú ɛháajɛ gē bī ɔwɔ wā ā, ɛ́gɔ́ɔmā nɛ̄ awanda ō ya gē bī ikpɛ́lā wā lɛ á.

²⁴O nyɔ̄ í lā ajīlɛ̄yí inu lɔhi fíyɛ́, ō lā ipú inu ékpónú mla ɔnyā ō yá ikpɛ́lā nōo klla gē ka ífulá nɛ̄hi á.

²⁵Ɔ̄kā olɔhi ō pó ŋmá ɛga oligbó, lɛbɛ̄ɛka enyi ohīlaŋdɔ́ nɛ̄ ɔ̄cɛ ŋmá ɔtɛ́ mɛ́mla ɛgoligbó gē gwá ā.

²⁶Ɔ̄cɛ o yá olɔhi mɛ́mla ɔ̄cɛ okpaakpa dóódu nōo cɛ̄ mla ɔ̄cɛ o yá ɔdōbɔ̄bí lɛbɛ̄ɛka, obugā, ámāŋ ka ɔkpá nēé lɛ emī kwū tū ɔ̄ ā nɛ.

²⁷Ɛnwú ō lé nɛ̄hi í lɔhi ŋ́, ɛ́gɔ́ɔmā nɛ̄ ocɛ̄tra nɛ̄hi í lɔhi lɛ ɔ̄cɛ ŋ́ dúú á.

²⁸Ɔ̄cɛ nɛ̄ ó kwú ánya kú nū tū glá ŋ́, lɛbɛ̄ɛka igelī nɛ̄hi nēé wúla tāajɛ, nɛ̄ igá dúúmā nōo gē gbō ɔ̄ ŋmá ɛgiyí aólɛlā í yɔ̄ gɛ ŋ́ mā.