Read idoma AÍITA 26 Bible Online

AÍITA 26 - idoma bible

AÍITA 26

¹Ɛ́gɛ́nɛ̄ ɔwɔ í cɛgbá eko ɔnɔ nɛ̄ ācɛ gē cē ɔdɛ̄hɔ̄ ŋ́ má, ɛ́gɔ́ɔmā nɛ̄ ojīlīmā ō je lɛ olíla í cɛgbá ŋ́ dúú á.

²Ɔ̄cɛ nɛ̄ ó yá ɔdā nēé ī tókónu lɛ ɔ́ ŋ́, okónu ō tá lɛ ɔ́ í gáā kwú ɔ̄ glá ŋ́. Ó lɛbɛ̄ɛka aígbáanɔ nōo gē wu gla ɔcí nēé ce ɔ́ ŋ́ mā.

³É gē lɛ itali fīyɛ ɔnya, é klla gē lɛ anjámī wū ijakī okónu, amáŋ é gē ŋmó olíla ijē.

⁴Ɔ́dāŋ ka, a lɛ ɔ̄kā kú íla cíla, ayíka awɔ abɔ̄yi uwɔ wɛ olíla bɛ̄ɛka ɔ̄cɛ nōo dɔɔ̄kā ā dúú.

⁵Tá ohi kú íla kú ōkā íla nɛ̄ olíla da āa, cɛ́ɛ́ ɔ̄cɛ nɛ̄ o da uwɔ ɔ̄kā ɔ́ɔmā géē jé ka anúɔ í jééyī ɛ́gɛ́nɛ̄ anúɔ gbɛlá ā ŋ́.

⁶Awɔ nōo gē tū olíla ɛhɔ̄ ā, lɛbɛ̄ɛka ɔ̄cɛ o gwó iyī nū ikpó tónū ā. Unwalu nāa gē bī gē lɛ iyī uwɔ á.

⁷Ɛ́gɛ́nɛ̄ ikpó kú ɔ̄coŋmíkpó playi dangla nɛ̄ ó tū ile lɛ ɔ́ ŋ́ mā, ɛ́gɔ́ɔmā nɛ̄ ita nɛ̄ olíla gē kwu ā lɛ dúú á.

⁸O cɛ̄tra olíla klla ī ce ɔ́ ojīlīmā, lɛbɛ̄ɛka ɛcɔ̄ nēé le gbō bá ítū gáā tá ā.

⁹Olíla nōo gē kwu ita lɛbɛ̄ɛka ɔ̄cɛ nɛ̄ ejé lɛ ɔ́ kwú nōo, yɔ̄ ī tíne kóō fu ujē ŋmá abɔ̄ kú nū ā.

¹⁰Ɔ̄cɛ dúúmā nōo pūla olíla ámāŋ ka ogwéjé kú úklɔ́ ā, lɛbɛ̄ɛka otɔ́ɔyī nōo gē tá ɔyī cē ɔ̄cɛ dúúmā nōo wā í yɛ ɔwɛ ɛgiyí nū ā[1]

¹¹ Olíla gē yá ucē kú íla kú nū igbo ɔhá kpɔ́ bɛ̄ɛka ewō nōo le gba bá ajɛ klla gē je kpó lé ā.

¹²Ɔ̄cɛ dúúmā nɛ̄ ó jéeyī ŋ́, anɔ́ɔ ó kē gbɛlá ka anúɔ jééyī nɛ̄hi á, olíla abɔ̄yī nū lɔhi fíyɛ́ ɔ̄cɛ ɔ́ɔmā á.

¹³O yújulu mɛ́mla okwáahi í gē bɛ̄cɛ ŋmá inu glá ŋ́, é gē dɔ̄ɔka ɔdā ō lɛ abɔ̄ bá ɔ̄. Anɔ́ɔ é gē kahíníī, “Ágábá klá ɔwɛ, ágábá klá úláyi dóódu.”

¹⁴Ɛ́gɛ́nɛ̄ odūngwɔ̄wɛ playi ɔwɛ gē nwūla klla ī je gwū ā, ɛ́gɔ́ɔmā nɛ̄ ɔ̄cɛ o yújulu ā gē pīyeyī agōdō kú nū lɛ á. Ó bɛ̄cɛ ga ɛga dúú glá ŋ́.

¹⁵Ujulu nōo kwú ācɛ ōhī ā í kōō cɛ̄ lɛ uwá lɛ abɔ̄ cē ɔná ŋmá ógo bī ga okónu kú abɔ̄ iyī uwā glá ŋ́.

¹⁶Oyújulu nōo kwáhi nɛ̄hi ā, gbɛlá ka anúɔ jééyī nɛ̄hi fíyɛ́ ācɛ ahāapa nōo gē tóohi ɛlā kpaakpa glá ā á.

¹⁷Ɔ̄cɛ dúúmā nōo gē je iyī nū tá ipú ikpɛ́la nɛ̄ ó wɛ ɛlā nū ŋ́, lɛbɛ̄ɛka ɔ̄cɛ nōo gē nyɔ̄ í kwú ewō nōo yɔ̄ ī yɛ úláyi ahɔ̄ ā.

¹⁸Ɔ̄cɛ nōo ī plla ɔ́mpa nū ga ɔdōbɔ̄bí, nōo gē ka anúɔ gē hija nɛ̄ ā,

¹⁹lɛbɛ̄ɛka ojɛɛ́lɛ́ nōo bī ɔdā ō ŋmó ɔ̄cɛ bɛ̄ɛka ɛfɔ́ɔ́lá mɛ́mla ɔyī nɛ̄ ɔlá kwu ɔ́ ā yɔ̄ ī le hijā ā.

²⁰Ɛga dúú nɛ̄ ɛfɔ́ɔ́lá yi mɛ̄ ā nɛ̄ ɔlá gē nyí ā, ɛga dúú nɛ̄ awanda í yɔ̄ ŋ́, ikpɛ́lā gē mɛ.

²¹Ɛ́gɛ́nɛ̄ úbi gē cɛ̄ lɛ ahɔ̄lá yēeyī ā, nɛ̄ ɛfú kē ī cɛ̄ lɛ ɔlá gē cɛ̄ ā. Ɛ́gɔ́ɔmā nɛ̄ ɔ̄cɛ o hɛ́ unwalu tá ajɛ gē mu ɔlá tū ɛlā lɛ á.

²²Awanda lɔnyɛ nɛ̄hi. Ó kē lɔnyɛ tū alɔ ō je mule nɛ̄hi.

²³O je ɛlá obɔ̄bí tayínu igbīhi ɛlā olɔnyɛ ō ka bɛ̄cɛ ŋmá okónu ā, lɛbɛ̄ɛka oje nɛ̄hɛ́ nēé ma plá iyē kú ɛtɛ́ ɔmɛ ā.

²⁴Ó leyī ɛpa gē je íwɔ́tū kú nū tayínū ipú ɛlā olɔnyɛ kú nū.

²⁵Eko dúúmā nɛ̄ ó gē kɛlā olɔnyɛ, ā kpɔ́tū ce ɔ́ ŋ́, ohígbū ka otū kú nū le mu mla obɔ̄bí alɛwa.

²⁶Ó lɔfú je ɔ́bíipú kú nū tayínū ɔkwɔɔkwu ɔ́ɔmā glá, amáŋ odúúdú ācɛ géē má ɔ́bíipú kú nū ā igbīhāajɛ.

²⁷Ɔ̄cɛ nōo gē bū ɔ̄gɔ̄ ā géē je míya tá ipú ɔ̄gɔ̄ nɛ̄ ó bū ɔ́ɔmā. Ɔ̄cɛ nōo gē míya ɛcɔ̄ ā, nɛ̄ ɛcɔ̄ gē míya wā ī ca ɔ́ ikpó á.

²⁸Ɔ̄cɛ nōo gē wɔ́tū ɔ̄cɛ ā, gē kɛ̄mgbɛ̄ bá ɔ̄. Ɛ̄la ɛ̄kɛ̄mgbɛ̄ kú okónu kú ɔ̄cɛ gē bī ífi wā.