Read idoma AÍITA 27 Bible Online

AÍITA 27 - idoma bible

AÍITA 27

¹Á híī gwō ohígbū oócí ŋ́, ohígbū ka á jé ɔdā nōo géē yá ŋmá abālɔbányā gāá kwu ɛ̄cī ɔ́ɔmā ɛ́ɛ́ ŋ́.

²Ā cɛ̄tra īyī uwɔ ŋ́. Ɔ̄cɛ ɔhá nōo kōō wɛ ugbɔga ā, géē cɛ̄tra awɔ á.

³Ogbɛnú kú ɛcɔ̄ mla ɔjɛ í gbɛnú gaajɛ unwalu nɛ̄ íla gé hɛ́ táajɛ lɛ ɔ̄cɛ ā ŋ́.

⁴Ícɔ̄nū bɔ̄bíipú klla ī ŋmó ɔ̄cɛ, amáŋ ímálānyī bɔ̄bí fíyɛ́ dúú á.

⁵Ífulá ō ka klá ɔ̄cɛ, ɛcɛ péee, lɔhi fíyɛ́ ihɔtū ō tayínū ipú á.

⁶Ɛlā íwɔ́tū mla ɔdā íwɔ́tū nɛ̄ oklóbīya uwɔ yá uwɔ ā lɔhi fíyɛ́ abɔ̄ ihɔtū nɛ̄ olɛ̄lā kú uwɔ le yɛ uwɔ ɔkɔ gbaala á. Leyī kwɛɛcɛ n.

⁷Eko nāa lɛ ipú nū, nēé lɛ ɛnwū bī wā, a géē tá. Amáŋ eko nɛ̄ ɛmiyɛ gē ŋmó uwɔ, ēpū ohɔ́nɔ gē lɔnyɛ tū uwɔ bɛ̄ɛka ɛnwú ā.

⁸Ɔ̄cɛ dúúmā nōo le yɛ ligbó ŋmá ɔlɛ́ nū, lɛbɛ̄ɛka ígbáanɔ, nōo le wu ligbó hɛ ɔlɛ́ nū tá ā.

⁹Ɔtulalī mla anɔ̄ okpóocu gē yá ka ɔtū kóō he uwɔ, amáŋ unwalu gē je ɛbɔ́ kú odo kú uwɔ pahīla.

¹⁰Ā híī je mlanyī aóklóbīya kú uwɔ ámāŋ ka aóklóbīya kú ádā uwɔ ŋ́. Eko dúúmā nāa yɔ̄ ipú unwalu, ā kwu gāá hī ɔyínɛ́ uwɔ igwú, kóō wā í tá anúɔ abɔ̄ piíí ŋ́. Oladógbe kú uwɔ nōo lā kwu uwɔ ajaajɛ ā lɔhi fíyɛ́ ɔyínɛ́ uwɔ nōo yɔ̄ ligbó hɛ̄ uwɔ tá á.

¹¹Ɔyí um, le íjééyī jé, cɛ́ɛ́ ká ɔtū kóō he um, cɛ́ɛ́ ká n̄ géē má ohi ōtá ɔ̄cɛ dúúmā nōo lɛ okónu kwu um iyē.

¹²Ɔ̄cɛ ojéeyī géē má unwalu yɔ̄ ī wā, cɛ́ɛ́ ó kwú nyā ŋmá ɔwɛ ɔ́ɔmā. Amáŋ olíla ā, ī wā gɔɔ́gɔɔ́ í gwōtū ipú unwalu, cɛ́ɛ́ ó gbɔɔ́ ō hīíjémā igbhihājɛ.

¹³Olíla dúúmā nōo mīyɛ abɔ̄ kú ulé kú ugbɔga ka anúɔ géē cílá, cíkā nēé gē je odúúdú agbénú kú nū kpó kwɛyí ulé ā.

¹⁴Ɔkɔ o le cɛyí hokónu tū oklóbīya uwɔ ɔ̄cɔ̄ɔ̄cī blibli ā, wɛ ɔdā ékpónú mla okónu ō tá lɛ ɔ́.

¹⁵Ɔnyā ō ka ífulá lɛbɛ̄ɛka, ɔwɔ nōo gē mí wílíwílí eko nɛ̄ ó mīyɛ ɛ̄cī ā.

¹⁶Ó yá ɛ́ɛ́ kú ɔnyā ā kóō yɔ̄ cíí ā, lɛbɛ̄ɛka owu ō kwú tū ipú abɔ̄, ámāŋ ka o hɛ́ anɔ̄ tū ipú abɔ̄ omōmu ā.

¹⁷Oje gē tū oje ulé á, ɛ́gɔ́ɔmā nɛ̄ ɔ̄cɛ gē wɛ ɔlá kú ɔ́mpā nū á.

¹⁸Lɛ eyī kwu ɔcí ō gwá īkpō lɔɔlɔhi, cɛ́ɛ́ ká ā lɛ īkpō má lé ŋmá anú. Ɔ̄cocɛ̄hɔ̄ nōo gē leyīkwu ɔkpani nū lɔhi, géē mīyɛ ojīlīmā.

¹⁹Ɔ́dāŋ ka ɔ̄cɛ pīyeyī má éŋkpɔ̄, ó géē má ofu kú iyī nū. Ɔ́dāŋ ka ɔ̄cɛ kē gbafíyóó lɛyíkwu ɛlá nɛ̄ ó ī gbo mɛ́mla ɔdā nɛ̄ ó gē yá ā, ó géē jé ɛdɔ ɔ̄cɛ nɛ̄ anú abɔ̄yī nū wɛ ā.

²⁰Únóji ī nū ipú jéjéē ɛ́ɛ́ ŋ́, ɛ́gɔ́ɔmā nɛ̄ eyī í cɛ́ɛbɛ ŋ́ má.

²¹Ɔlá nēé gē bī le jé oje nɛ̄hɛ́ mɛ́mla ugóolu (oje ɔdɔ) má á, ɛ́gɔ́ɔmā nēé gē jé ɔ̄cɛ ŋmá lɛ ocɛ̄tra mɛ́mla ɛlā nɛ̄ ācɛ gē ka lɛyíkwu ɔ́ á.

²²Ɔ́dāŋ ka a ŋmó olíla ijē jāā gbéeko nɛ̄ ó gbɔɔ́ ō hɛ́kwú, nááná, á gáā ŋ́mó íla kú nū ā ije ŋmá ɔɔ́ iyē wɛ̄ɛcɛ glá ŋ́.

²³Leyī kwu aálá mɛ́mla aɛ́na kú uwɔ lɔɔlɔhi, ká ā jé ɛ́gɛ́nɛ̄ é bá lɛ ā.

²⁴Ohígbū ka ije mɛ́mla agbénú í gē gbojī ō mɛ ŋ́. Ajɔ̄ɔ̄cɛ́ dúúmā í kē yɔ̄ piyóó glá ŋ́.

²⁵Lɛ ɛdɔ kú ácí nɛ̄ aálá gē lé ā hɛ́ ŋmá ajɛ, cɛ́ɛ́ a klla lɛ ácí ɔlamu nōo yɔ̄ ɔkwu ɛfu ā kpó hɛ́ eko nɛ̄ ácí nɛ̄ aálá gē lé ā yɔ̄ ī lū abāābɔ̄ ŋmá ajɛ ɛ́ɛ́ mā.

²⁶A lɔfú tá īlī ō wu iyē ŋmá ɔnwū kú aálá kú uwɔ ā. A kē lɔfú kpó aɛ́wū ōhī lá, ká ā bī ije ā lɛ lá ajɛ glá.

²⁷A lɔfú lɛ enyi amɛ̄ kú aɛ́wū, nāa géē lɔfú yá anɔ̄ ŋmá anú nāa géē le bī ipɔ́ɔnú kú uwɔ mɛ́mla ācocɛ̄hɔ̄ kú ɔlɛ́ uwɔ glá.