Read idoma AÍITA 28 Bible Online

AÍITA 28 - idoma bible

AÍITA 28

¹Ɔ̄cobɔ̄bíipú gē kwinya eko nɛ̄ ɔ̄cɛ dúúmā í nū ɔ̄ inya ŋ́ mā. Amáŋ ācɛ okpaakpa lɛ ɔtū lé ká bɛ̄ɛka ágábá ā.

²Eko nɛ̄ éwo dúúmā le íne bīya, ó gē lɛ ɔcɛ́ éyi ga ɔcɛ́ ɔhá lɛɛlɛwa. Amáŋ ɔ́dāŋ nā ācɛ ojéeyī mɛ́mla ācɛ olɔhi, mɛ́mla ācɛ ojɔ́dā gāá cɔcɛ́, éwo ā géē lɔfú, klla í háyi kpaakpa ipú ɛbɔ́ gbojī.

³Olɛhɔ́cɛ dúúmā nōo gē le abɔ̄ da aólɛhɔ́cɛ ɛyí tāajɛ ī pīya uwá tū ā, lɛbɛ̄ɛka ɔwɔ nōo yā gē tá owu nɛ̄hi nōo gē da aɔ́dɛ̄hɔ̄ tāajɛ ī kpó uwā ŋmó ā.

⁴Ācɛ dúúmā nēé gē lɛ íne tū ŋ́, wɛ ācɛ nēe gē lɛ ɔkwu yá ékpó mla ācobɔ̄bíipú. Amáŋ ɔ́dāŋ ka a gē lɛ íne tū, ayíka á cɛ̄ tɔ̄há mla uwá ŋ́.

⁵Ācɛ obɔ̄bí ā í jé ɔdā nɛ̄ ɛpɔ̄ okpaakpa wɛ ā ŋ́, amáŋ ācɛ nōo gē yɛce Óndú ā jɛ́yí nū lɔɔlɔhi.

⁶Olɛɛhá nōo bī ɔkwɛ̄yí mɛ́mla okpaakpa kú nū ā, lɔhi fíyɛ́ olɔdu nɛ̄ ó lɛ ɛlā ɔkwɛ̄yí mɛ́mla ucē okpaakpa ŋ́ mā á.

⁷Ɔyí dúú nōo gē lɛ íne tū, wɛ ɔyí ojéeyī nɛ̄, amáŋ ɔyí dúú nōo gē yá oklóbīya mla ācɛ ɛfulɛ́ɛfu wɛ uwēyī lɛ ádā nū.

⁸Ɔ́dāŋ ka ɔ̄cɛ dúúmā gē lɛ agbénú kú nū ŋmá ije o kplá ācɛ kéē lɛ ije nɛ̄hi tū ɔ̄ ɔkwu, agbénú nɛ̄ ó lɛ ɔ́ɔmā géē je pīya ákú ɔ̄cɛ nōo ī gbonɛnɛ lɛ aógbɛhá ā.

⁹Ɔkɔ ō gbā kú ɔ̄cɛ nɛ̄ ó gē lɛyítáajɛ lɛ Ɔwɔicō ŋ́ mā, gē wú ɔ̄ ɔtū ō pó ahɔ̄.

¹⁰Ɔ́dāŋ́ ka a lɛ ɔ̄cɛ olɔhi bī nyíleyí nɛ̄ ó nyɔ̄ í lɛ ɔdōbɔ̄bí yá, awɔ piíí ā gáā gwō tū ipú ukpa nāa je ɔ́ɔmā á. Amáŋ ɔ̄cɛ okpaakpa ā géē mīyɛ ulé ɔlɔhi kú nū.

¹¹Olɔdu jééyī tū īyī nū, amáŋ ogbɛhá nōo jɔdā klla tōhílīpú ā kē í je ɔkwu nū tɛ́ɛcɛ.

¹²Eko nɛ̄ ɔ̄cɛ olɔhi lɛ ɔcɛ́ lé, odúúdú ācɛ gē gwéeyē. Amáŋ eko nɛ̄ ɔ̄cɛ obɔ̄bíipú lɛ ɔcɛ́ lé, ācɛ kwú pɛ́ kwu tayínū.

¹³Ɔ́dāŋ́ ka, a kwú ínoōbīya kú uwɔ í tayínū, á gáā jɛ̄ gɔbū ipú ɔdā dúúmā nāa lɛ abɔ̄ kwu ɔ́ ā glá ŋ́. Amáŋ ɔ̄cɛ nōo lɛ íne nɛ̄ ó bīya ā ka tɛ́ɛcɛ, klla kwú igbīhi í cē kwu ɔ́, Ɔwɔicō kē í ményinyi nū.

¹⁴Óndú ā í hɔ́hā ce ɔ̄cɛ dúúmā nōo lɛyítáajɛ lɛ ɔ́ klla ī yúufi nū. Amáŋ, ācɛ o yīkpɛ̄yí olɔfú ā géē ga ipú unwalu klla í je kpó yíífi.

¹⁵Ɔ̄cobɔ̄bíipú nɛ̄ ō gē gbō aógbɛhá ā, lɛbɛ̄ɛka ágábá, ámāŋ ka ɛbɛ́ obɔ̄bí nōo yɔ̄ ī tōōji kóō kwú ɛbɛ́ lé ā.

¹⁶Ɔcɛ́ dúúmā nɛ̄ ó ī ményīnyinyi ɔ̄cɛ ŋ́, wɛ olíla nōo bɔ̄bíipú nɛ̄hi. Amáŋ ɔ̄cɛ dúúmā nɛ̄ itene ō lé ɔwɛ o pīya ācɛ tū icííci í he ɔ́ ɔtū ŋ́, géē lɛ́ɛcɛ nɛ̄hi.

¹⁷Ɔ̄cɛ dúúmā nōo lɛ ɔ̄cɛ ŋmó, yɔ̄ ī bū ɔ̄gɔ̄ ikwū kú iyī nū nɛ. Aá ma ɔ̄ tá, ɔ̄cɛ dúúmā kóō tá ɔ̄ abɔ̄ ŋ́.

¹⁸É gē nya ɔ̄cɛ olɔhi, ɔ̄cɛ ɔkwɛ̄yi mɛ́mla ɔ̄cɛ okpaakpa tá, amáŋ ɔ̄cobɔ̄bíipú ā géē je yíífi acígilí.

¹⁹Ɔgɛ́ɛjí nōo cēyītīkwū nɛ̄hi, géē má ɔdōlé lé. Amáŋ ɔ̄cɛ nōo yɔ̄ ī kpó eko bónū nɛ̄ ó yá ɔdā dúúmā ŋ́ mā, ɛmiyɛ géē ŋmó ɔ̄, ɛhá klla í kwú ɔ̄.

²⁰É géē hɔ́hā ce ɔ̄cɛ ɔkwɛ̄yi, ó klla í jɔ́ɔnyɛ kú oyēeyī nɛ̄hi. Amáŋ é géē yá ɔ̄cɛ ō hágágā kú ije ō lɛ italā piíí.

²¹O má eyīgoo je ɔ̄cɛ éyi fíyɛ́ ɔ̄cɛ ɔhá ā í lɔhi ŋ́. Amáŋ aɔ́cɛ́ ōhɛpɔ̄ ōhī gē má eyīgoo ohígbū ómíci lígíí nēé je lɛ uwá lé ā.

²²Ācɛ o lɛ ɛlá kwu iyī uwā ōfōōfū uwā ā, gē hágágā kú ije ō lɛ mla agbénú, amáŋ é kē jé eko nɛ̄ ɛhá í wā gáā klá uwá ā ŋ́.

²³Ɔ̄cɛ nōo gē nā ɔ̄cɛ ɔhá tá ɔwɛ ā, géē mīyɛ ahínyá ŋmá ɛgiyí ɔ̄cɛ ɔ́ɔmā fíyɛ́ ɔ̄cɛ nōo yɔ̄ ī yá ɔ̄ ɛbɛ́ icííci ā.

²⁴Ɔ̄cɛ dúúmā nōo gbɛlá ka uwī ōwī ɛ́nɛ́ mɛ́mla ádā ɔ́ɔ bɔ̄bí ŋ́, ayíka anú mɛ́mla uwī ɔlamu ā wɛ ɔdā ékpónú á.

²⁵O cē olɔhi klá iyī ɔ̄cɛ ōfōofū nū gē kpó unwalu wā, amáŋ ɔ̄cɛ nōo lɔtūce Óndú ā géē jāgbénú.

²⁶Ɔ̄cɛ dúúmā nōo kwú ɔtū ú ce odo kú iyī nū wɛ olíla. Amáŋ ɔ̄cɛ nōo gē bī íjééyī yá ɔdā dóódu kú nū géē nyatá.

²⁷Ɔ̄cɛ dúúmā nōo gē je odée lɛ aógbɛhá, ɔdā dúúmā í gáā kbla anú ɛhá ŋ́. Amáŋ, ɔ̄cɛ nōo leyī gwō unwalu kú aógbɛhá bónū ā, ācɛ alɛwa géē cá ɔ̄ ɛcá.

²⁸Eko dúúmā nɛ̄ ācobɔ̄bíipú gaá cɔcɛ́, ācɛ gē kpó iyī uwā tayínū, amáŋ eko dúúmā nēé gekwú, ācɛ okpaakpa ā géē bá ī jɛ̄ tōōtɔ̄ɔ̄ gɔbū.