Read idoma AÍITA 29 Bible Online

AÍITA 29 - idoma bible

AÍITA 29

¹Ɔ̄cɛ dúúmā nōo tá kéē híī nā anúɔ tɔ́ɔwɛ ŋ́, ɛ̄cī éyi ó géē je hábɔ̄ nɛ̄ ɔ̄cɛ dúúmā í gáā nā ɔ̄ tɔ́ɔwɛ glá gɛ ŋ́.

²Eko dúúmā nɛ̄ ɔ̄cɛ olɔhi mɛ́mla ɔ̄cɛ okpaakpa cɔcɛ́, ācɛ gē gwéeyē. Amáŋ eko nɛ̄ ɔ̄cɛ obɔ̄bíipú gaá cɔcɛ́, ācɛ gē móōwē í tíifu.

³Ɔyí dúú nɛ̄ íjééyī hi ɔ́ ɔtū, gē je ɔtū nɛ̄hɛ́ lɛ ádā nū. Ɔyí dúú nōo gē cikpó akwuna, gē kpó ije bónū ā, wɛ olíla.

⁴Ɔcɛ́ dúúmā nɛ̄ ɔdā okpaakpa he ɔ́ ɔtū, éwo kú ɔlɛ́ nū gē háyi lɔfú. Amáŋ ɔcɛ́ dúúmā nɛ̄ ómíci ō mīyɛ lé he ɔ́ ɔtū, éwo nōo gē gbō í je yíífi.

⁵Ɔ̄cɛ dúúmā nōo gē yá oklóbīya nū ɛbɛ́, gē jē ukpa lɛ ɔ́ nɛ̄ n.

⁶Ínoōbīya kú ācobɔ̄bíipú ā gē kwú uwā ɛ́gɛ́nɛ̄ ukpa gē kwú odée ā. Amáŋ ɔtū kú ācɛ okpaakpa wɛ ɛnɛ̄hɛ́, é klla géē yɔ̄ ī gwéeyē eko dóódu.

⁷Ɔ̄cɛ okpaakpa ā jé ɔdā nōo wɛ ukpɛ̄ kú aógbɛhá. Amáŋ ɔ̄cɛ obɔ̄bíipú ā í tútū ō jé ɔdā ɛ́gɔ́ɔmā ŋ́.

⁸Ācɛ nɛ̄ ó lɛ ɛlá wu ɔ̄cɛ dúúmā ŋ́ mā, lɔfú je odúúdú igelī nɛ̄hi tá ipú unwalu glá. Amáŋ ācɛ ojéeyī ā, gē tá unwalu mla ákanya gɛcɛ ŋmá ɔlɛ́.

⁹Eko dúú nɛ̄ ojéeyī mla olíla lɛ ɛpɔ̄ nɛɛ, olíla ā gē yɛhɛ, klla yɔ̄ ī cɛ́cá ōfōōfū nū.

¹⁰Ɛlā kú ācɛ okpaakpa ā gē wú ācɛ o ŋmó ɔ̄cɛ ā ɔtū nɛ̄hi, amáŋ ācɛ okpaakpa ā gē tíne kéē gbō ɛdɔ ɔ̄cɛ ɔ́ɔmā ɛyí.

¹¹Olíla gē cɔ̄nū tɛ́ɛcɛ ipú ɛwa, amáŋ ojéeyī ā ī kwú iyī nū cíí.

¹²Ɔ́dāŋ́ ka ɔcɛ́ gē jāhɔ̄ lɛ ɛ̄kɛ̄mgbɛ̄, odúúdú aígabɔ̄ kú nū, géē wɛ ācɛ okɛ̄mgbɛ̄.

¹³Ɔdā ékpónú nɛ̄ ogbɛhá mɛ́mla ɔ̄cɛ nōo gē pīya anú tū ā lɛ tɔ̄há ā, wɛ ka, Óndú ā je īkpēyī lɛ uwá ɛplɛ́ɛpa kéē mɛ́ɛbɛ.

¹⁴Ɔ́dāŋ́ ka ɔcɛ́ dúúmā í nyí aógbɛhá ukpɛ̄ kú uwā ŋ́, ó géē cɔcɛ́ gbojī ajɛ.

¹⁵Ɛlā nēé gē nwū ayípɛ̄ mɛ́mla ahɔ̄ nēé gē pi uwá anú ā lɔhi lɛ uwá. Ɔ́dāŋ ka é habɔ̄ ɔyí dúúmā tá kóō kwú ɔwɛ kú abɔ̄yī nū ú, ó gē kpó uwēyī tū ɛ́nɛ́ nū ɛyí.

¹⁶Eko dúúmā nɛ̄ ɔ̄cɛ obɔ̄bíipú lɛ ɔcɛ́ lé, obɔ̄bí gē nyīla. Amáŋ ācɛ olɔhi mɛ́mla ɔ̄cɛ okpaakpa géē yēeyī jāā gbéeko nēé lɛ ōgwōnū kú ɔcɛ́ obɔ̄bí ɔ́ɔmā má.

¹⁷Lɛ abɔ̄ pi ɔyí uwɔ ahɔ̄, ó kē í je omlɛ́nyɔ́ gā uwɔ. Ó klla gáā yá ɔdā dúúmā nōo gē wɛ uwēyī ga uwɔ gɛ ŋ́.

¹⁸Éwo dúúmā nɛ̄ Óndú ā í gē ma ɔdā nōo géē bī ācɛ jé ɔwɛ ā, fú lɛ uwá ŋ́, ācɛ géē bá ī hábɔ̄ ga ɛga dúú nōo he uwá ɔtū. Amáŋ ɔhā yɔ̄ lɛ ɔ̄cɛ dóódu nōo lɛ íne kú Óndú ā tū.

¹⁹Ɛlā okónu áncā í gáā nwū ɔ̄cocɛ̄hɔ̄ ɛlā ŋ́. Ó pó ɛlā kú uwɔ ā dúú nɛ, amáŋ ó gáā bī ɔ̄ yúklɔ́ ŋ́.

²⁰Olíla lɛ eyīyōce fíyɛ́ ɔ̄cɛ̄ dúúmā nōo gē hágágā ɛlā ō ka á.

²¹Ɔ́dāŋ nāa gē je ɔdā dúúmā nɛ̄ ɔ̄cocɛ̄hɔ̄ kú uwɔ tíne ā lɛ ɔ́ ŋmá ajaajɛ, ɛ̄cī éyi ó géē mīyɛ odúúdú agbénú kú uwɔ ŋmá ɛgiyí uwɔ.

²²Ācɛ o lɛ ánya nɛ̄hi gē hɛ́ unwalu mɛ́mla ikpɛ́lā nɛ̄hi tá ajɛ.

²³Ɔbɔ́ɔ̄cɛ kú ɔ̄cɛ gē bī ɔ̄ wā ajɛ á. Amáŋ ɔ̄cɛ otá īyī nū wāajɛ gē lɛ ojīlīmā ŋmá ɛgiyí ācɛ dóódu.

²⁴Oklóbīya kú uwī, wɛ olɛlā kú iyī nū fíyɛ́ dúú á. É géē yá ɔ̄ italā ɔ́dāŋ ka ó lɛ ɛlā ɔkwɛ̄yi ka tɛ́ɛcɛ únɛ́pɔ̄, Ɔwɔicō géē tókónu lɛ ɔ́ ɔ́dāŋ ka ó kɛlā ɔkwɛ̄yi ŋ́.

²⁵Ufi kú ɔdā nɛ̄ alɛɛcɛ í gbɛlá lɛyíkwu uwɔ, ámāŋ ɛ̄nɛ̄ é ī ka lɛyíkwu ā, wɛ ɔdōbɔ̄bí bɛ̄ɛka ukpa ā. Amáŋ ɔ̄cɛ nōo lɔtūce Óndú ā, ɔdōbɔ̄bí dúúmā í gáā yá ɔ̄ ŋ́.

²⁶Ācɛ alɛwa gē tíne kéē téeyī olɔhi kú ɔcɛ́. Amáŋ ɛpɔ̄ okpaakpa kú ɔ̄cɛ gē ŋmá ɛgiyí Óndú ā.

²⁷Ɔ̄cɛ okpaakpa mla ɔ̄colɔhi ā gē wɔ́tū ɔ̄cɛ obɔ̄bíipú ā. Ɔ̄cobɔ̄bíipú ā kē ī wɔ́tū ɔ̄cɛ okpaakpa ā.