Read idoma AÍITA 30 Bible Online

AÍITA 30 - idoma bible

AÍITA 30

¹Ɛ̄nyā wɛ ɛlā kú Águr, ɔyí kú Ujáke, nōo ŋmá umása. Ó kahíníī, “N jé ka Ɔwɔicō í yɔ̄ mla um ŋ́, Ɔwɔicō í yɔ̄ mla um ŋ́.

²N wɛ ɔdāhá fíyɛ́ ɔdā nēé ī je um ka ɔlɛɛcɛ. Ń kē lɛ ohílīpú nɛ̄ ɔlɛɛcɛ gē lɛ ā ŋ́.

³Ń kllɔcɛ́ kú íjééyī jéjéē ɛ́ɛ́ ŋ́, ɛ́ɛ́ nɛ̄ n gē jé ɔdā dúúmā lɛyíkwu Ɔwɔicō ŋ́.

⁴Ɔ̄nyɛ ga ɔkpáncō wā ajɛ jéjéē ɛɛ́? Ɔ̄nyɛ kwú owu tū ipú abɔ̄ kú nū jéjéē ɛɛ́? Ɔ̄nyɛ gbō éŋkpɔ̄ ipú īlī kú nū jéjéē ɛɛ́? Ɔ̄nyɛ yá odúúdú oŋmɛ́yí kú ɛcɛ ā? Ɔ́dāŋ́ ka a jé ɔ̄, ɔ̄nyɛ nɛ̄ ó wɛ ā? Iyē kú ɔyí nū kē lé ka ɔ̄nyɛ?

⁵Ɛlā kú Ɔwɔicō dóódu gē cɛ̄ ɔkwɛ̄yi. Anú lɛbɛ̄ɛka ɔ́kplɛ́fú kú ācɛ nēe nyɔ̄ í kwu tayínū ɛgiyí nū á.

⁶Ā híī pīya ɛlā nɛ̄ Ɔwɔicō ka ā abɔ̄ ŋ́. Ohígbū nɛ̄ ó géē pi uwɔ ahɔ̄, cɛ́ɛ́ kóō mafú gā awɔ ka a wɛ ɔ̄cɛ o kɛ̄mgbɛ̄.

⁷Óndú, ó lɛ ɔdā ɛpa nɛ̄ n dɔɔ̄kā kú ā yá gā um ɛ́ɛ́ kú n̄ kwú.

⁸Kwú ɛlā ɛ̄kɛ̄mgbɛ̄ mɛ́mla ɛ̄kɛ̄mgbɛ̄ ō kā ú ŋmá okónu kú um. Ā cɛ̄ gā um lɛ ije nɛ̄ɛ̄nɛ̄hi ámāŋ ka o kwɛ́há nɛ̄ɛ̄nɛ̄hi ŋ́. Je ukpɛ̄ kú ɔdōlé nōo géē jɛ̄ um ā gā um.

⁹Ohígbū nɛ̄ n géē lɛ ɔdōlé lɛ nɛ̄hi, nɛ̄ n géē ka ka á ce um ɛgbá gɛ ŋ́. Amáŋ ɔ́dāŋ ka n lɛ gbɛhá, n lɔfú nyɔ̄ í lɛ uwi wī, cɛ́ɛ́ n kē lɛ uwēyī kpó tū awɔ nɛ̄ wɛ Ɔwɔicō kú um ā ɛyí.

¹⁰Ā híla ɔfiyɛ iyɔ̄bū ɔkpani nū ŋ́, ohígbū nɛ̄ ó gē tá okónu gā uwɔ, nōo géē cɛ̄ gā awɔ móōwē.

¹¹Ācɛ ōhī bá abɔ́ɔ nēe gē tókónu lɛ ádā uwā, nɛ̄ e klla ī tókónu lɛ ɛ́nɛ́ uwā dúú.

¹²Ācɛ ōhī bá abɔ́ɔ nēe gbɛlá ka aá í gē yá ɔdōōbɔ̄bí dúúmā ŋ́, amáŋ ínoōbīya le hɛ́ kwu úwé kú uwā ɛ́gɛ́nɛ̄ anɔ̄ ō lé gē hɛ́kwú īlī ā. Ohígbū ɔ́ɔmā, é le yēŋēe ipéyī kú Ɔwɔicō ŋ́.

¹³Ācɛ ōhī kē gbɛlá ka aá lɔhi íbí, ɛ̄nyā í cɛ̄ lɛ uwá je ācɛ ɔhá ɔdā dúúmā ŋ́.

¹⁴Ācɛ ōhī bá abɔ́ɔ nēe bī ɔ́bíipú dóódu gē le pīya aógbɛhá tū cɛ́ɛ́ kéē lɛ agbénú.

¹⁵Oyúnwū odée, ma ayí nɔ̄nyā ɛpa. Iyē kú uwā ɛplɛ́ɛpa lé ka. “Je gā um.” Aɔ́dā ɛtá ámāŋ ka ɛnɛ bá ipú ɛcɛ nyā, nɛ̄ ɛ̄jɛ̄ ɔdā ō lɛ í jɛ̄ uwā ŋ́. Uwá kē bá yɔ̄ á:

¹⁶ɔlékwū, ɔnyā nɛ̄ ó ma ɔyí ŋ́, ajɛ ō ŋmíkpākplā nōo gē cɛgbá ɔwɔ, mla ɔlá nōo yɔ̄ ī yi piyóó.

¹⁷Ɔ̄cɛ dúúmā nōo gē yá ádā nū ɛbɛ́, nɛ̄ ó klla gē lɛyítáajɛ lɛ ɛ́nɛ́ nū ŋ́, ɔtagláma cíkā ō lɛ ɔ́ īkpēyī kpó nwúla, cɛ́ɛ́ epu kwú ɛbɛ́ kú nū ohile ú lé.

¹⁸Ɔdā ɛtá ámāŋ ka ɛnɛ nēe bá ā, yá um eyījii nɛ̄ ń jɛ́yí nū ŋ́.

¹⁹Ɛ́gɛ́nɛ̄ okpé gē wu licō licō lɛ glá ā, ɛ́gɛ́nɛ̄ ɛgwā gē pi ɛyí ápátɛ́cɔ̄ glá ā, ɛ́gɛ́nɛ̄ úgbéenyi gē jé ɔwɛ ipú itekwú glá ā, mɛ́mla ɛ́gɛ́nɛ̄ ɔ̄cɛnyā mɛ́mla ɔ̄cɛnyīlɔ gē yíihɔtū tá iyī uwā lɛ glá ā.

²⁰Ɔdā nɛ̄ ɔnyā ōgbajā mɛ́mla ɔnyā ɔdāhá gē yá ā yɔ̄ á, ó nyɔ̄ í le ajā gbo, le iyē gwá, cɛ́ɛ́ ó kwú híhó ka anúɔ í yá ɔdōbɔ̄bí dúúmā ŋ́.

²¹Ó lɛ ɔdā ɛtá ámāŋ ka ɛnɛ nēe gē tū ācɛ kú ɛcɛ íwɔ́tū, nēé cībū uwā glá ŋ́. Uwá kē bá yɔ̄ á:

²²Ɔfiyɛ nōo kwú pīyɛ ɔcɛ́ kú ajɛ. Olíla nōo lɛ ɔdā dúúmā nɛ̄ ó tíne ā.

²³Ɔnyā nɛ̄ ācɛ gē wɔ́tū nū, nōo gaá lɛ ɔbá lɛ. Ɔyí ɔlɛ́ nɔ̄nyā nōo mīyɛ ɛ́nɛ́ ɔlɛ́ nū ɔbá.

²⁴Aɛ́bɛ́ ɛnɛ bá ipú ɛcɛ nyā nēe nyɛ́ nɛ̄hi, amáŋ nēé jééyī nɛ̄hi. Uwá kē bá yɔ̄ á:

²⁵Ɛyilɔ, é lɔfú ŋ́, amáŋ é gē kpó ɔdōlé kú uwá tū ɔnɔ̄

²⁶Ogbo ábū ō lā ipú ápɛ́tɛ́cɔ̄, é lɔfú ŋ́ dúúmā ŋ́, amáŋ é kē ī gwó ɔlɛ́ uwā wu ɛplá ápátɛ́cɔ̄ ɛyí ɛfu.

²⁷Efūma, é lɛ ɔcɛ́ nōo gē gbɔbū lɛ uwá ŋ́, amáŋ é kē ī kpɔ́ iyī uwā kwu ɔgbā ī yɛ tɔ̄há yíílí.

²⁸Apa, ɔ̄cɛ lɔfú bī abɔ̄ lɛ kwú éyi kú uwā glá. Amáŋ ɔ̄cɛ gē má uwā agbla kú ɔlɛ́ ɔcɛ́.

²⁹Aɛ́bɛ́ ɛnɛ bá nɛ̄ iyāwu kú uwā lɔhi ō má eyī.

³⁰Ágábá nōo lɔfú fíyɛ́ odúúdú aɛ́bɛ kpɛ́mm, nɛ̄ ó ī yúufi ɔdā dúúmā ŋ́ mā.

³¹Opī, obúgwū, mɛ́mla aɔ́cɛ́ nēe gē yāwu iyɔ̄bū ācɛ ɔlɛ́ uwā.

³²Ɔ́dāŋ́ ka a húmáyī gwō bɛ̄ɛka olíla, klla ī yá ojuju kú ɔdōbɔ̄bí nɛɛ, háyi cíí, cɛ́ɛ́ kú ā gbɛlá.

³³Ɔ́dāŋ ka a lɛ enyi amɛ̄ wīya lɔfú, a géē má anɔ̄ ŋmá anú. Ɔ́dāŋ ka ɔ̄cɛ lɛ enyi amɛ̄ wīya lɔfú lɔfú anɔ̄ gē bɛ̄ɛcɛ ŋmá anú. Ɔ́dāŋ nāa lɛ akwū tū ɔ̄cɛ ɛnwū, ó gē pɛ́ oyī, ó klla i lɔnɔ tū ɔ̄cɛ. Ɔ́dāŋ nāa lɛ ɔ̄cɛ yá cɔ̄nū, ikpɛ́lá mɛ́mla unwalu géē yɔ̄.