Read idoma AÍITA 31 Bible Online

AÍITA 31 - idoma bible

AÍITA 31

¹Ɛlā ōcɛgbá nēe bá nyā wɛ ɛlā kú Ulémūwɛ̄lu, ɔcɛ́ kú Umása, nɛ̄ ɛ́nɛ́ nū nwū ɔ̄ ā.

²Ɛ́nɛ́ ā kahíníī, “Awɔ, ɔyí um, ɔyí ō bá ɔtū kú um, ɔyí kú ohi kú ɔkɔ nɛ̄ n gbā lɛ Óndú ā. Jāhɔ̄ lɛ ɛlā nɛ̄ n gáā da uwɔ ā.

³Ā híī je odúúdú ɔfú kú uwɔ cikpɔ́nyā ŋ́. Ɛ́ɛ́ nɛ̄ a gē je odúúdú ije kú uwɔ ŋmó tū anyā ŋ́. É le aɔ́cɛ́ alɛwa kpó yíífi ŋmá ɛcɛ nyā dúú ɛɛ́.

⁴Jāhɔ̄ Ulémūwɛ̄lu, aɔ́cɛ́ í gē gwá ejé ŋ́, ɛ́ɛ́ nēé gē yá unwū ejé ŋ́, ɛ́ɛ́ nōó kōō ī gwá ejé olɔfú ŋ́.

⁵Ohígbū ka eko nēé le ejé gwá, é lɔfú je mlanyī íne nēé tū ā, cɛ́ɛ́ é nyí aógbɛhá ɔdā nōo wɛ ukpɛ̄ kú uwā ā.

⁶Je ejé olɔfú lɛ ɔ̄cɛ nōo gáā kwú ɛɛ́ mā, mɛ́mla ācɛ nōo yɔ̄ ipú ɔtū nōbí nɛ̄hi ā.

⁷Kéē gwá ejé, cɛ́ɛ́ kéē mlanyī ɛhá mɛ́mla ɔtūnōbí kú uwā.

⁸Gbō ācɛ nēé lɛ ɔ̄cɛ o tá uwā abɔ̄ ŋ́ mɛ́mla ācɛ nēé leyīce ɔdā dúúmā gɛ ŋ́ mā ɛyí. Kɛlā kwɛyí uwā dúú.

⁹Kɛlā kwɛyí uwā, ká ā hɛ́pɔ̄ okpaakpa. Lɛlá kwu ɔ́ ká ā je ukpɛ̄ kú aógbɛhá lɛ uwá.

¹⁰Ɔ̄nyɛ lɔfú má ɔnyā ɔ̄kwɛ̄yi lɛ glá ā? Anú gbɔɔ́lá fíyɛ́ ayīnu adāgbá mɛ́mla ɔtāngbédē dóódu á.

¹¹Ɔbá nū lɔ̄tu ce ɔ́ dúúdú, ɛhá í kē gáā kwú ɔbá nū ŋ́.

¹²Ipú odúúdú oyēeyī kú nū, ó gē yá ɔbá nū lɔhi, ó gē yá ɔ̄ ɔdōbɔ̄bí ŋ́.

¹³Ó gē pi owú, klla gē bī abɔ̄ kú nū le tá īlī.

¹⁴Ó gē nyɔ̄ ī dɔ̄ɔka ɔdōlé kóō bī wā ɔlɛ́ ŋmá ɛga oligbó, bɛ̄ɛka ācɛ o tá ɔ́hí nēe gē kpó iyó tū ipú úgbéenyi ŋmá ɛga oligbó wā ɔlɛ́ ā.

¹⁵Ó gē cāŋjɛ ofúlɔ̄cī, kóō tá ɔdōlé kú ācɛ ɔlɛ́ nū tū. Ó gē kɔ̄ úklɔ́ lɛ ācocɛ̄hɔ̄ nɔ̄nyā kú ɔlɛ́ nū.

¹⁶Ó gē ga ɛcɛ nyɔ̄ ī jila ajɛ nōo lɔhi, cɛ́ɛ́ ó bī ije kú abɔ̄yīnū lɛ ajɛ ā lá. Ó klla gē bī ije nɛ̄ ó yá le hí ɛhɔ̄ kú ucí ufáyin.

¹⁷Ó lɔfú, klla ī yúklɔ́ nɛ̄hi. Ó klla jé ɔ̄ yá óbé ije nɛ̄hi.

¹⁸Ó jé ile kú ɔdā dóódu nɛ̄ ó gē yá ā, ó kē ī yúklɔ́ jāā gbó otú.

¹⁹Ó gē pi owu kú nū, klla gē tá īlī kú nū abɔ̄yī nū.

²⁰Ó kē ī nwūla abɔ̄ lɛ ogbɛhá mɛ́mla ācɛ nɛ̄ ɛgbá ce uwá ā.

²¹Ó gē yúufi ofū nōo í ŋmó ācɛ ɔlɛ́ nū eko owu ā ŋ́, ohígbū ka ó le īlī ká ofū tá lɛ ācɛ ɔlɛ́ nū tɛtɛ ɛɛ́.

²²Anú gē gɔ̄ īlī kú iyī nū abɔ̄yīnū nū á. Īlī kú nū wɛ ɔnɔ̄wā mɛ́mla ɔgalula mɛ́mla odo mɛ́mla odufā hilóhiló ā.

²³Ācɛ jé ɔbá nū ā lɔɔlɔhi, ɛga dóódu, ó klla kē wɛ éyi kú aótrɛ̄yí kú ipú igelī nɛ̄hi ā nɛ̄ ācɛ gē lɛ ojīlīmā ce ɔ́.

²⁴Ó gē tá īlī klla ī kpó lá. Ó klla ī kpó ɔdōgbɛ̄ɛ́nyɔ́ lá lɛ ācotɔ́hí dúú.

²⁵Ó lɔfú iyē nɛ̄hi, klla lɛ ojīlīmā. Ɛlā kú ɛ̄cɔ̄bū í tū ɔ̄ ufi ŋ́.

²⁶Ɛlā nōo ī ŋmá okónu kú nū ā wɛ ɛlā ogbonɛnɛ kú íjééyī. Anú nɛ̄ ó gē bī lɛ nwū ācɛ ɛlā á.

²⁷Ó gē yúklɔ́ gē lɛ ɛlá kwu ɛgbá kú ācɛ ɔlɛ́ nū dóódu. Ó kē ī yúú julu ŋ́.

²⁸Ayí nū gē cɛ̄tra anú, ɔbá nū kē ī cɛ̄tra anú dúú.

²⁹Ɔbá nū gē ka kahíníī, “Anyā olɔhi alɛwa bá nɛ̄hi dúú ɛ́ɛ́, amáŋ awɔ fíyɛ́ odúúdú uwā á”

³⁰Ohéyīfuú kú ɔ̄cɛnyā lɔfú plla ɔ̄cɛ glá, ɔhi kē lɔfú céyī glá. Amáŋ ācɛ cíkā ō cɛ̄tra ɔnyā nōo gē lɛ ojīlīmā ce Óndú ā.

³¹Aá cɛ̄tra ɔnyā ā, ohígbū odúúdú ɔdā nɛ̄ ó yá ā. Ó cɛgbá kú odúúdú ācɛ kéē lɛ ojīlīmā ce ɔ́.