Read idoma AÍITA 4 Bible Online

AÍITA 4 - idoma bible

AÍITA 4

¹Ayí um, aá jāhɔ̄ ká aá lɛ ɔdā nɛ̄ ádā aá gē nwū aá ā pó. Cɛ́ɛ́ ká aá lɛ ohílīpú ō bī jɛ́yí ɔdā lɛ.

²Ɔdā nɛ̄ n yɔ̄ ī nwū ā lɔhi nɛ̄hi, ohígbū ɔ́ɔmā, aá híī tá ɔ̄ tónū ŋmá ipú ɔtū kú aá ŋ́.

³Eko nɛ̄ n wɛ ɔyípɛ̄ nɛ̄ n yɔ̄ mla ádā um ā, nɛ̄ n kē wɛ ɔyí ékpónú kú ɛ́nɛ́ mɛ́mla ádā um ā,

⁴ádā um gē nwū um ɛlā. Anɔ́ɔ ó gē ka kahíníī, “Lɛ ɛlá kwu ɛlā nɛ̄ n ka gā uwɔ ā, ā híī mlanyī nū ŋ́. Yá ɔdā nɛ̄ n da uwɔ ā, cɛ́ɛ́ a géē yéeyī ipú ɛcɛ nyā.

⁵Ā mlanyī ɛlā nɛ̄ n nwū uwɔ ā ŋ́, ɛ́ɛ́ nāa gē kwúcē ŋmá anú ŋ́. Jéeyī ká ā klla jɛ́yí kú ɔdā.

⁶Ā híī je mlanyi íjééyī ŋ́, ó gē gbō uwɔ ɛbɔ́. Lɛ abɔ̄ bī íjééyī ká, kóō gbō uwɔ ɛbɔ́.

⁷Íjéeyī ō lɛ ā wɛ ɔdā ō cɛgbá fíyɛ́ dúú á. Ɔdā dóódu nāa lɛ nááná, má ka a lɛ ohílīpú ō jɛ́yí odée lɛ.

⁸Íjéeyī kóō he uwɔ ɔtū. Ó géē je uwɔ gicō nɛ̄hi. Lɛ ɔ́ kwú bɔ́tū, ó klla í bī ojīlīmā gé lɛ uwɔ.

⁹Anú gáā wɛ ukata kú ojīlīma mɛ́mla ɛgahi klá uwɔ ɛyí á.

¹⁰Jāhɔ̄, ɔyí um, pó ɛlā kú um, cɛ́ɛ́ ká ā géē lɛ oyēeyī ōlīkpó ipú ɛcɛ nyā.

¹¹N lɛ ɔwɛ kú íjééyī nwū uwɔ ɛɛ́. N lɛ uwɔ bī bū ɔwɛ oyēŋēē mɛ́mla okpaakpa ɛɛ́.

¹²Eko dúúmā nāa yɛ mla íjééyī, ɔdā dúúmā í gáā háyi ɔwɛ kú uwɔ glá ŋ́. Ɔ́dāŋ ka a kōō yɔ̄ ī kwinya, á gáā lɛ ikpó gbo ɛcɔ̄ ŋ́.

¹³Blakwu ɔdā nāa jé ā eko dóódu. Ɔdā nāa jé ā, wɛ oyēeyī kú uwɔ á. Ohígbū ɔ́ɔmā gbō ɔ̄ gɛɛ.

¹⁴Ā ga ɛga nɛ̄ ācobɔ̄bíipú ā gē nyɔ̄ ā ŋ́. Ā kē híī gbla ucē kú ācɛ o yá ɔdōbɔ̄bí ā ŋ́.

¹⁵Le kwu ŋmá ucē ɔ́ɔmā tá. Le nyā ŋmá anú, ká ā je ɔwɛ kú abɔ̄yī uwɔ.

¹⁶Ohígbū ka ācobɔ̄bíipú í gáā gbiyɔ̄lā glá ŋ́, jāā gbéeko nēé lɛ ɔdōbɔ̄bí éyi yá ámāŋ kēé lɛ odée yá ɔ̄cɛ éyi piíí.

¹⁷Ɔ́bíipú mɛ́mla ucē kú ɔ́bíipú dóódu lɛbɛ̄ɛka ɔdōlé ā lɛ uwá.

¹⁸Ɔwɛ kú ɔ̄cɛ okpaakpa, lɛbɛ̄ɛka ɛnɔ oŋmá-ajɛ ā, ó yɔ̄ i fíyajɛ tōōtɔ̄ɔ̄ jāā gbéeko nɛ̄ ó gā ɛyí.

¹⁹Amáŋ ɔwɛ kú ācobɔ̄bíipú mɛ́mla ācɛ o yá ɔ̄dōbɔ̄bí ā dobū fiyuu bɛ̄ɛka otú ā. É gē gwōnū, amáŋ é jé ɔdā nōo hɛ́ uwā gwōnū ā ŋ́.

²⁰Ɔyí um, jāhɔ̄ lɛ ɛlā kú um, ká ā pó ɛlā nɛ̄ n gē ka ā.

²¹Kwú ɛlā kú um ā ú kpó tū ipú ɔtū kú uwɔ, ā cɛ̄ lɛ ɔ́ kwu hɛ̄ uwɔ tá ŋ́.

²²Ohígbū keé gē je oyēeyī mɛ́mla ɔbɔ́lā lɛ ɔ̄cɛ dúúmā nōo lɛyí nū jé.

²³Leyī kwɛcɛ lɛyíkwu ɛ́gɛ́nɛ̄ ā gē gbɛlá lɛ ā, ohígbū ka ɔdā nɛ̄ a gē gbɛlá nū ā gē mīya ɛ́gɛ́nɛ̄ oyēeyī kú uwɔ gē lɛ á.

²⁴Ā híī ka ɔdā dúúmā nɛ̄ ó wɛ ɔkwɛ̄yi ŋ́ nɛɛ ŋ́. Ā lɛ ɔdā dúúmā ō yá mla ɛ̄kɛ̄mgbɛ̄ mɛ́mla ɛlā ō plla ɔ̄cɛ ŋ́.

²⁵Lɛ eyī kwu iyɔ̄bū kú uwɔ mɛ́mla ɛlā ɔ̄kwɛ̄yī mɛ́mla okpaakpa. Ā cɛ̄ lɛ uwēyī kwú uwɔ ká ā lɛyí plaajɛ ŋ́.

²⁶ Lɛ ɛlá kwu ɔ́ ká ā lɛ ojuju yá lɔɔlɔhi lɛyíkwu ɔdā dóódu nāa gáā yá ā. Le má ka ɔdā ɔ́ɔmā le yá lɔɔlɔhi.

²⁷Le kwu ŋmá ɔdōbɔ̄bí, yāwu kú uwɔ ɔwɛ okpaakpa. Ikpó kú uwɔ kóō nyā ga amu ga anú ŋ́, ŋmá ɔwɛ kú okpaakpa ā ŋ́.