Read idoma AÍITA 5 Bible Online

AÍITA 5 - idoma bible

AÍITA 5

¹Ɔyí um, jāhɔ̄, ká ā pó ɛlā kú íjééyī mɛ́mla ɛyí odée ō jé kú um.

²Cɛ́ɛ́ ā gē jé ɛ́gɛ́nɛ̄ ā gē yá ucē kpaakpa lɛ, cɛ́ɛ́ ɛlā nāa í ka ā, géē máfú ka a jɔ́dā.

³Akpókónu kú ɔnyā ɔ̄cɛ ɔhá lɔfú lɔnyɛ bɛ̄ɛka ɛnwú ā glá, okónu ō kwu ɔ̄cɛ okónu kú nū lɔfú lɔnyɛ dúú,

⁴amáŋ, igbīhāajɛ kú nū ā hɔ́ɔnɔ fíyɛ́ ɛ́lɛ á. Ó klla í lɔnɔ tū ɔ̄cɛ fíyɛ́ ɔkpacaŋ́gelī ō le gwū ɔ̄cɛ.

⁵Ɔ́daŋ ka a cɛ̄ɛ̄lā kú nū, ó géē bī uwɔ ga ɔlékwū. Ɔwɛ kú nū gē bī ɔ̄cɛ ga ɔlékwū.

⁶Ó lɛ ɛlá wu ɔwɛ kú oyēeyī oyēŋēē ā ɛ́ɛ́, nɛ̄ ó gē yɛ anú ŋ́. Ó le nyā ŋmá ɔwɛ kú oyēeyī, ámāŋ ó jé ŋ́.

⁷Ɔyí um, jāhɔ̄ gā um, ká ā híī mlanyī ɛlā nɛ̄ n yɔ̄ ī ka gā awɔ nyā ŋ́.

⁸Lɛ kwu ŋmá ɛgiyí ɔnyā ōgbajā ā. Ā kōō híī túbla okómpíinu kú ɔlɛ́ nū ŋ́.

⁹Ɔ́dāŋ ka a le yɛ ga ɛgiyí ɔnyā ɛ́gɔ́ɔmā, ācɛ ɔhá géē mīyɛ uwɔ ojīlīmā. Ācɛ nēé gē ményinyinyi ācɛ ŋ́ mā géē ŋmó uwɔ agbaagbɔ.

¹⁰Cɛ́ɛ́ aúgbɔga géē kpó odúúdú agbénú kú uwɔ, cɛ́ɛ́ ɔdā nāa húmáyī ī yúklɔ́ nū ā kwú pīya ákú ɔ̄cɛ ɔhá.

¹¹Igbīhāajɛ, a géē gwutá agōdō ikwū kú uwɔ yɔ̄ ī tíifu. Eko nɛ̄ ɔkpíyē mɛ́mla iyē kú uwɔ gē yɔ̄ ī je wa ŋmáajɛ ā.

¹²A géē yɔ̄ ī dɛ̄ ka, “Ɔdíyá ɛ́ɛ́ nɛ̄ ń gē jé ɛlā ŋ́ mā? Ɔdíyá ɛ́ɛ́ nɛ̄ ń gē cɛ̄ lɛ ɔ̄cɛ dúúmā nwū um ɛlā, cɛ́ɛ́ kóō klla pi um ahɔ̄ kóō ma ɔwɛ fú gā um ŋ́ mā?

¹³Ń jāhɔ̄ lɛ ɔkɔ kú ācɛ nēe nwū um ɛlā ŋ́, ɛ́ɛ́ nɛ̄ n gē pó klla ī lɛ ɛlá wu ɛlā nɛ̄ ācɛ o nwū um odée ā, nwū um ā ŋ́ mā.

¹⁴Eko nyā, n kwú pīya ɔdā uwēyī ipú ójīla ɛɛ́. Ń klla wɛ ɔdā dúúmā gɛ ŋ́.

¹⁵Ɔyí um, ɔnyā awɔ ōfōōfū nū nāa géē yíihɔtū tú ɔ̄ klla í cikpó nū á.

¹⁶Ayí obībá nēe ŋmá ɛgiyí anyā ɔhá ā í tīile lɛ uwɔ glá ŋ́.

¹⁷Ayí abɔ̄yī uwɔ ā kéē jɛ̄, kéē tá uwɔ abɔ̄, ó híī wɛ ayí kú anyā ɔhá nēe bá mla uwɔ ā ŋ́.

¹⁸Ɔnyā nāa lɛ eko nāa wɛ ɔyípōklóbiya ā, kóō he uwɔ ɔtū.

¹⁹Ɔnyā uwɔ ɔ́ɔmā jɔ̄ɔ̄ncɛ́nyā kwajɛ kputúkputú, mamlamaa gblɔgɔdɔɔ lɔɔlɔhi bɛ̄ɛka īkpɛ̄ɛnū ā. O jɔ́nyā nɛ̄hi kú ɔnyā uwɔ ā kóō he uwɔ ɔtū, kóō klla jɛ̄ uwɔ eko dóódu. Cɛ́ɛ́ ká ā jɔ́nyɛ kú ihɔtū kú nū eko dóódu.

²⁰Ɔyí um, ɔdíyá nāa gē yɔ̄ ī je ihɔtū kú uwɔ lɛ ɔnyā ɔhá ā? Ɔdíyá nɛ̄ ɔnyā ɔhá gē lɔnyɛ tū uwɔ fíyɛ́ ɔnyā uwɔ ā?

²¹Ɛga dúúmā nāa gē yɛ ā, mɛ́mla ɔdā dúúmā nāa gē yá ā, Óndú ā, gē má uwɔ.

²²Ucē obɔ̄bí kú ɔ̄cobɔ̄bíipú wɛ ukpa nōo gē kwú ɔ̄ á. Ukpa kú ɔbíipú nēé gē bī piíí ā gē kwú uwā á.

²³Ɔ̄cɛ ɔ́ɔmā gē kwú ga ɔlékwū, ohígbū ka ó kwú iyī nū tū glá ŋ́. Íla kú nū géē bī ɔ̄ ga ipú únóji piíí.