Read idoma AÍITA 6 Bible Online

AÍITA 6 - idoma bible

AÍITA 6

¹Ɔyí um, ɔ́dāŋ́ ka a mīyɛ abɔ̄ ɔ̄cɛ dúúmā, ka anúɔ géē gbɛfiyɛ kú ulé kú nū,

²ó lɛ ā, ɛlā nāa ka wɛɛcɛ mɛ́mla okónu nāa ce ā, lɛbɛ̄ɛka ukpa nāa jē tá ajɛ lɛ iyī uwɔ ā.

³Ó lɛ ā, ɔyí um, ɛ́mba a lɛ ɛfiyɛ kú ɔ̄cɛ ɔ́ɔmā hɛ́ ɛɛ́, amáŋ ɔwɛ nāa í bɛ̄cɛ ŋmá anú ā yɔ̄ á. Páápá nyɔ̄ ga ɛgiyí ɔ̄cɛ ɔ́ɔmā, cɛ́ɛ́ ká ā lɛ ɔkɔ gbā lɛ ɔ́, cɛ́ɛ́ ká ā kwú okónu nāa ce gbɔbū ɔ́ɔmā ú ŋmónyí.

⁴Ā híī nyɔ̄ í gbiyɔ̄lā ce ɔ́ bá ajɛ ŋ́, ámāŋ ká o nyɔ̄ í cīce ce ɔ́ bá ajɛ yɔ̄ ī mlɛ́nyɔ́ ŋ́.

⁵Le bɛ̄cɛ ŋmá ipú ukpa nyā ā bɛ̄ɛka ígbáanɔ ámāŋ ka īkpɛ̄ɛnū nōo hɛ́ ofitɛ́ abɔ̄ ā.

⁶Ācɛ o yújulu mɛ́mla ācɛ o kwáahi cíkā ō kllɔcɛ́ ɔwɛ nɛ̄ aɛ́yilɔ gē yá odée kú uwā lɛ ā, cɛ́ɛ́ kú aá jéeyī.

⁷É lɛ ɔcɛ́ ŋ́ ámāŋ ka aótrɛ̄yí dúúmā ŋ́,

⁸amáŋ, é ī tá ɔdōlé kú uwā tū, eko ɔnɔ̄, gbēyī eko ogwā.

⁹Eko nyá nāa géē gwutá bobóó gaá kwu ā, oyújulu? Eko nyá nɛ̄ aá géē héyī ŋmá iyɔ̄lā ā?

¹⁰A kahíníī, “N̄ gwutá lígíí ɛ́ɛ́, n̄ dē nākpaa ɛ́ɛ́, n̄ dē lɛ abɔ̄ gwɛ́kā cɛyí ká n̄ mlɛ́nyɔ́ lígíí ɛɛ́.

¹¹Amáŋ eko nāa klá yɔ̄ ī gbiyɔ̄lā ā, ɛhá wā í klá uwɔ, ɛ́gɛ́nɛ̄ ācohéjulúgwu gē ca ɔwɛ klá ɔ̄cɛ ā. Úkpa géē wā ī kwú uwɔ abɔ̄fú bɛ̄ɛka ācɛ o kwāajɛ kéē mīyɛ odée ŋmá ɛgiyí ācɛ abɔ̄fú ā.

¹²Ɔ̄cɛ ɛfulɛ́ɛfu, ɔ̄cobɔ̄bíipú, yɔ̄ ī kɛ̄mgbɛ̄ ī yɛ.

¹³É gē yéeyī, klla gē yá abɔ̄ lɛ ācɛ, ō yá ɛ́ɛ́ kéē plla ācɛ ɔhá.

¹⁴É bī ɔtū obɔ̄bí kú uwā ɔ́ɔmā gē yá ojuju kéē nyɔ̄ í yá ɔdōbɔ̄bí eko dóódu. Ɛga dúúmā nēé nyɔ̄, é bá ī hɛ́ unwalu táajɛ.

¹⁵Ohígbū ɔ́ɔmā, ífi, mɛ́mla ámíyā, mɛ́mla ákanya géē yá uwā eko nēé leyīce ŋ́ mā. Ágbe nɛ̄ ó gáā jé ŋ́ mā, géē je uwá kpó yííji ŋmá ajɛ.

¹⁶Óndú ā géē wɔ́tū ɔdā ɛhīlī, ɔ́mahāapa ā wɛ ɔdēelihɔ ɛgiyí nū.

¹⁷Ācɛ o yɔ́bɔ́ɔ̄cɛ, ācɛ o kɛ̄mgbɛ̄ mɛ́mla ācɛ nēe gē ŋmó ɔ̄cɛ tónū icííci ā.

¹⁸Ācɛ o yá ojuju kú ɔdōbɔ̄bí, ámāŋ ka ācɛ o hápáápá nyɔ̄ í yá ɔdōbɔ̄bí,

¹⁹ācɛ o cē ijáalí nōo yɔ̄ ī kɛ̄mgbɛ̄ eko dóódu, mɛ́mla ācɛ nōo gē hɛ́ ikpɛ́lā tá ajɛ ɔtāhɛ̄ ayínɛ́ ɛpa.

²⁰Ɔyí um, yá ɔdā nɛ̄ ádā uwɔ da uwɔ ā. Ā kē mlanyī ɛlā nɛ̄ ɛ́nɛ́ uwɔ nwū uwɔ ā ŋ́.

²¹Kwú ɛlā kú uwā ú kpó tū ipú ɔtū kú uwɔ, ká ā híī je uwá mlanyī ŋ́.

²²Ɛlā nēé nwū uwɔ ā kóō gbō uwɔ eko dúúmā nāa gē yāwu. Eko dúúmā nāa gwutá, ó géē gbō uwɔ bɛ̄ɛka ācogbāajɛ ā ɛyí ā eko nāa ī gbiyɔ̄lā otú. Eko dúúmā nāa le héyī, ó géē kɛlā mla awɔ bɛ̄ɛka oklóbīya uwɔ ā.

²³Ohígbū ka íne kú Óndú ā lɛbɛ̄ɛka agege ā, ɔdā nɛ̄ ó gē nwū ā kē lɛbɛ̄ɛka ɔlá ofíyajɛ ā. O nā tá ɔwɛ kú nū gē nwū uwɔ ɛ́gɛ́nɛ̄ a géē yēeyī lɛ ā.

²⁴Ukɔ́ nēé gē tū ā mɛ́mla aɔ́dā nēé gē nwū ā, géē gbō uwɔ ŋmá ɛgiyí anyā obɔ́bí ā, mɛ́mla ɛlā o pi ɔ̄cɛ ga ipú unwalu kú anyā ācɛ ɔhá.

²⁵Ɔhi kú ɔnyā ɔ̄cɛ ɔhá kóō híī jé uwɔ má ŋ́. Eyī ɔ̄hi ō yá kú ɔnyā ɛ́gɔ́ɔmā kóō híī jé uwɔ tū ɔ̄ ŋ́.

²⁶Ohígbū ka ɔ̄cɛ lɔfú bī ije nēé ī le lá ámú kú igbō ékpónú ā, le cikpó akwuna glá. Amáŋ, ikpó ɔnyā ɔ̄cɛ ɔhá ō ce, gē je odúúdú agbénú mɛ́mla oyēeyī kú ɔ̄cɛ yíífi ŋmáajɛ.

²⁷A lɔfú je ɔlá bɔ́tū kú uwɔ, nɛ̄ ó gáā je uwɔ īlī yɔɔlá ŋ́ glá ā?

²⁸Ɔ̄cɛ lɔfú yāwu ɛyí ahɔ̄lá nɛ̄ ó gāa yi ɔ́ ikpó ɔlá ŋ́ glá ā?

²⁹Ɛ́gɔ́ɔmā nɛ̄ ó lɛ lɛ ɔ̄cɛ dúúmā nōo gáā cikpɔ́nyā ɔ̄cɛ ɔhá á. Ɔ̄cɛ dúúmā nōo gaá lɛ abɔ̄ kwu ɔnyā ɔ̄cɛ, í gáā nyɔ̄ áncā ŋ́, amáŋ ó géē móōwē nū piíí.

³⁰Eko nɛ̄ ɛmiyɛ yɔ̄ ī ŋmó uwī, nɛ̄ ó gāa lɛ uwī wī, cɛ́ɛ́ kóō géē le má lé, nɛ̄ ācɛ lɛ ɔ́ kwú, é géē mā ɔ̄ tá nyɔ̄ áncā glá āa?

³¹Eko dúúmā nēé lɛ ɔ́ kwú, ó géē cílá ulé kú ɔdā nɛ̄ ó yá ā ɛga ahāapa. Ó géē je odúúdú iyó kú ɔlɛ́ nū kpó cílá ulé ɔ́ɔmā.

³²Ɔnyīlɔ dúúmā nōo gē cikpó ɔnyā ɔ̄cɛ ɔhá í lɛ ohílīpú ŋ́. Iyī nū nɛ̄ ó gē je yíífi ŋmá ajɛ á.

³³É géē ŋmó ɔ̄ ijē, cɛ́ɛ́ uwēyī lɛ ɔ́ kwú piyóó ipú ɛcɛ nyā.

³⁴Ɔbɔ́nyā ō yá, géē yá ká ɔbá ɔnyā kóō cɔ̄nū nɛ̄hi, ó gáā mā ɔdā dúú tá ajɛ, eko nɛ̄ ó gē gwɔ̄ ɔ́ci ŋ́.

³⁵Ó gáā mīyɛ ije, ámāŋ ka ɔdā kú ɛ̄gbā dúúmā ŋmá ɛgiyí uwɔ nōo ī tá ɔ̄ ɔtū wāajɛ ŋ́.