Read idoma AÍITA 7 Bible Online

AÍITA 7 - idoma bible

AÍITA 7

¹Ɔyí um, blakwu ɛlā nɛ̄ n ka gā uwɔ ā. Ā híī mlanyī ɔdā nɛ̄ n da uwɔ ká ā yá ā ŋ́. Lɛ ɛlā nɛ̄ n nwū uwɔ ā, pīya agbénú kú uwɔ.

²Lɛ íne kú um tū ká ā yēeyī. Lɛ eyī kwu ɔdā nɛ̄ n nwū ɔ ā gɛɛ bɛ̄ɛka ɛ́gɛ́nɛ̄ a gē leyīkwu īkpēyī kú uwɔ gɛɛ ā.

³Bī ɛlā nɛ̄ n nwū uwɔ ā ipú ɔtū kú uwɔ eko dóódu. Lɛ ɔ́ tá tū ipú ɔtū kú uwɔ.

⁴Kwú íjééyī ú bɛ̄ɛka ɔyínɛ́ uwɔ nɔ̄nyā ā. Ká ɛyí ɔdā ōjé kóō lɛbɛ̄ɛka oklóbīya uwɔ ā.

⁵Kóō géē gbō uwɔ ŋmá ɛgiyí ɔnyā ɔ̄cɛ ɔhá, ŋmá ɛga ɔnyā nōo ī bī ɛlā okónu kú nū le plla ɔ̄cɛ ā.

⁶Ɛ̄cī éyi, n lɛ eyī bū uwíndo kú inu ɔlɛ́ um yɔ̄ ī mɛ́ɛbɛ.

⁷Anɔ́ɔ n le ayípōklóbīya alɛwa nēé jé ɔdā dúúmā lɛyíkwu oyēeyī ŋ́ mā má. Amáŋ n má éyi nōo wɛ olíla abɔ̄yī nū ipú uwā.

⁸Ó yɔ̄ ī yɛ úláyi, pī ɛga nɛ̄ ɔnyā éyi lā ā. Ó yɔ̄ ī yɛ pī inu ɔlɛ́ ɔnyā ā

⁹ɔ̄nɔ̄ɔ̄nɛ̄ eko nɛ̄ otú le bī ā.

¹⁰Anɔ́ɔ ɔ̄nyā ā gāá jīla anú ɔwɛ. Ɔnyā ā le ifa kú akwuna yá. Ɔdā ékpónú kē kwu ɔ́ ɔtū ō yá á.

¹¹Ó wɛ ɔnyā nɛ̄ ó ī lɛ ɔkwu kwu ajɛ ŋ́. Ɔnyā o bá ɔlɔɔ́lɛ́ yɔ̄ ī yɛ.

¹²Ó klla ī háyi ɔwɛ, úláyi, ōlīhī mɛ́mla ɛga dóódu, gē gbēyī ācɛnyīlɔ.

¹³Ó lɛ abɔ̄ kú nū nāadaa ce ɔyípōklóbīya ā ɔkɔ gbaala. Ó klla le ɔ́ kwú bɔ́tū, lɛ okónu kwu ɔ̄ okónu, leyīkwu ɔ́ eyī, da ɔ́ ka,

¹⁴“N le ɛya kú olétɔ̄há gwó kú ícɛ. N klla le okónu nɛ̄ n ce ā yá jīla. Ɛbɛ́ kú ucɛ ā hile ɔlɛ́ um.

¹⁵Ohígbū ɔ́ɔmā yá nɛ̄ n wɛ̄ɛcɛ yɔ̄ ī tíne uwɔ á. N kē lɛ uwɔ má ɛɛ́.

¹⁶N le īlī agōdo kú ulínin o lɛ ukɔ́lɔ olɔhi kú Íjīpiti kpó nā klá agōdo kú um ɛɛ́.

¹⁷N lɛ ɛdɔ kú ɔtulalī okpócu dóódu nāa jé ā mī klá agōdō kú um ā ɛɛ́.

¹⁸Wā kú ā gaá gwutá mla um ícɛ gbɔ́ɔ̄cī. Ɔtū géē he alɔ ɛplɛ́ɛpa gbéēyī ōnyā.

¹⁹Ɔbá um í yɔ̄ ɔlɛ́ ŋ́. Ó le yɛ tá iyāwu.

²⁰Ó bī ije nɛ̄hi ga iyāwu ā, ó gáā wā ɔlɛ́ ŋ́ jāā ga aláadi ɛpa.”

²¹Anɔ́ɔ ó lɛ ɔyípōklobīya ā plla mla ɔhi kú nū á. Anɔ́ɔ ɔyípōklobīya ā klla cɛ̄ ɛlā olɔnyɛ kú ɔnyā ā, nɛ̄ ó ka ā.

²²Anɔ́ɔ, ɔkwɔɔkwu ɔ́ɔmā, ó gbɔɔ́ ō nyɔ̄ mla ɔnyā ā bɛ̄ɛka, álá nēé bī gáā ŋmó ā. Bɛ̄ɛka īkpɛ̄ɛnū nōo gē tómbli ga ipú ukpa kú ofītɛ́ igbledū ā.

²³Ɛga nēé géē tá ɔyī cɛ̄ ɔ̄, bū ipú odo kú nū bēhé. Ó klla lɛbɛ̄ɛka ɛ́gɛ́nɛ̄ āpāana gē ga ipú ukpa, nɛ̄ ó jé ŋ́ mā, ɔ̄cɛ ā í jé ka ɔ́ɔ gáā ŋmó anúɔ ŋ́.

²⁴Ɔyí um, jāhɔ̄ gā um, ká ā pó ɛlā nɛ̄ n gē ka ā.

²⁵Ā híī cɛ̄ lɛ ɛdɔ kú ɔnyā ɛ́gɔ́ɔmā bī odo kú uwɔ ga ɔwɛ kú nū ŋ́. Ā híī yɛce ɔ́, ɛ́ɛ́ nāa ī tá ɔ̄ ɔkwu tɔlɔ́tɔlɔ́ ŋ́.

²⁶Anú húmáyī wɛ ɔkwu kú ífi kú ācɛ alɛwa á. Ó klla wɛ ɔkwu kú ikwū nōo ŋmó ācɛ alɛwa, nēé lɛ ō gbaáluka ŋ́ mā ā.

²⁷Ɔ́dāŋ́ ka, a le yɛ tá ɔlɛ́ nū, ayíka a yɔ̄ ī yɛ ɔwɛ kú ɔlékwū ɛɛ́. Ɔnyā ā wɛ ɔwɛ kpíí nōo gē bī ɔ̄cɛ ga ɔlékwū.