Read idoma AÍITA 8 Bible Online

AÍITA 8 - idoma bible

AÍITA 8

¹Aá jāhɔ̄, íjééyī lɛbɛ̄ɛka ɔ̄cɛnyā nōo yɔ̄ ī dɛ̄gba ipú úláyi gbōō ā. Ɔdōōjé klla yɔ̄ ī hīgwú gbōmgbōm bɛ̄ɛka ɔ̄cɛnyā ā dúú.

²Íjéeyī gē háyi ɛga ogēdēē mɛ́mla ɔnyɛ̄ɛpa kú ɔwɛ bɛ̄ɛka ɔ̄cɛnyā ā.

³Okónu ɔwɛ kú igá nōo yɛ ga igelī nɛ̄hi ā piíí ā, ó yɔ̄ ī hīgwú gbōmgbōm kpɔ́ kahíníī,

⁴“N lɛ abɔ̄ tɛ́ɛyīpɛ̄ lɛ odúúdú aá. N kē yɔ̄ ī hī ɛjɛ̄ɛ̄jī ɔlɛɛcɛ dóódu igwú.

⁵Aá ogwuda, aá kllɔcɛ́ kú aá jɔ́dā. Aólíla, aá jāhɔ̄ kú aá jíjééyī.

⁶Aá jāhɔ̄ lɛ ɛ́nɛ́nɛ̄ ɛlā ɔkwɛ̄yí kú um, ɛlā ɔlamu mɛ́mla ɔkwɛ̄yí gē bɛ̄cɛ ŋmá okónu kú um á.

⁷Ɔdā nɛ̄ n gē ka ā, wɛ ɔkwɛ̄yi, ɛ̄kɛ̄mgbɛ̄ wɛ ɔdā nōo ī wú um ɔtū.

⁸Ɛjɛ̄ɛ̄jī ɛlā nɛ̄ n gē ka kpɛ́mm ā wɛ ɔkwɛ̄yi. Ɔdā dúúmā í wɛ ɛ̄kɛ̄mgbɛ̄ ámāŋ ka o bī ācɛ nyíleyī ipú nū ŋ́, ɛ́ɛ́ nɛ̄ ó gē lɛ ɔdā ogbájí ŋ́.

⁹Ó le kpaakpa lɛ ācɛ nēe jɛ́yí odée ā. Ó klla tá péee lɛ ācɛ nēe jé odée ā.

¹⁰Kwú ukɔ́ nɛ̄ n gē tū uwɔ ā ú fíyɛ́ agbénú kú oje nɛ̄hɛ́. Kwú ɔdōojé kú um ā ú, ikɔkɔ ugóolu (oje ɔdɔ) nōo lɔhi fíyɛ́ dúú ā.

¹¹Ohígbū ka íjééyī ā fíyɛ́ ɛdɔ ɔtángbédē dóódu á. Odúúdú agbénú nɛ̄ ɔtū kú uwɔ tíne ā, í gáā lɛbɛ̄ɛka, íjééyī ā glá ŋ́.

¹²Ami nōo wɛ íjééyī ā lɛbɛ̄ɛka ɔ̄cɛ o lɛ ohílīpú kú ɛyí ɔdā ō jé. N klla lɛ ɔdā ō jé mɛ́mla eyī ō yɛ ɛlā lɔɔlɔhi.

¹³Ɔ́dāŋ nāa lɛ ojīlīmā ce Óndú, ayíka a í wɔ́tū ɔdōbɔ̄bí, ɔbɔ́ɔ̄cɛ mɛ́mla oōgɔ̄, mɛ́mla ɛlā ɛ̄kɛ̄mgbɛ̄.

¹⁴N gē yá ojuju, klla ī yá ɔdā nɛ̄ n miya ka n gē yá ā. N lɛ ohílīpú kú ɛyí odée ō jé. N kē klla lɔfú.

¹⁵N gē tá aɔ́cɛ́ abɔ̄ kéē gbō ajɔ̄ɔ̄cɛ́ kú uwā. N klla kē ī tá aógbāajɛ abɔ̄ kē tū aíne olɔhi.

¹⁶Odúúdú aɔ́cɛ́ mɛ́mla aótrɛ̄yí kú ipú ɛcɛ nyā gē kpó ācɛ trɛ̄yí ŋmá lɛ otábɔ̄ kú um.

¹⁷N yíihɔtū tá ācɛ nēe yíihɔtū tá um ā. Ɔ̄cɛ dóódu nōo gē tíne um ā, gē má um.

¹⁸N lɛ agbénú, ojīlīmā mɛ́mla oōjɛ̄ gɔbū.

¹⁹Ɔdā nāa géē lɛ ŋmá ɛgiyí um ā fíyɛ́ ugóolu (oje ɔdɔ) dóódu á. Anú klla í fíyɛ́ oje nɛ̄hɛ́ nōo tɛɛ́hɛ́ fíyɛ́ dúú á.

²⁰N gē yá ɔdā nōo le okpaakpa, n klla ī yá ɔdā nōo wɛ ɔkwɛ̄yi.

²¹N gē je agbénú lɛ ācɛ nēe yíihɔtū tá um ā. N klla gē tū inu ɔlɛ́ uwā mu mla ɛ́nɛ́nɛ̄ agbénú.

²²Ami nɛ̄ Óndú ā yá aflɛ́yí á, ami wɛ aflɛ́yí kú úklɔ́ kú abɔ̄ kú nū ŋmá íkée á.

²³Íjéeyī lɛbɛ̄ɛka ɔ̄cɛ ā, ó yɔ̄ ī kɛlā kpɔ́ kahíníī, “Ó le um yá aflɛ́yí, ɛ́ɛ́ nɛ̄ ó gbɔɔ́ ō yá ɛcɛ á.

²⁴Ami yɔ̄ gbɔbū lɛ ísu á. Eko nɛ̄ ó yá um ā, éŋkpɔ̄ ī yɔ̄ ŋ́.

²⁵Ami gbɔbū lɛ ɛfu á, n yɔ̄ ɛ́ɛ́ nɛ̄ ó kpó aɛ́fu kwú ɛgiyí uwā á.

²⁶Ɛ́ɛ́ ká Ɔwɔicō kóō yá ɛcɛ mɛ́mla ajɛ mɛ́mla ácí ā, n yɔ̄.

²⁷N yɔ̄ abɔ́ɔ eko nɛ̄ ó yá ɔkpáncō klla je ɔ́ nāndaa ā klá ɛga nōo kwu nyā á. Ɛ́ɛ́ kóō kpó aínyílɔ́wɔ kwu ɔkpáncō ā, n yɔ̄.

²⁸Eko nɛ̄ ó gē je ojuja bá ɔkpáncō, ɛ́ɛ́ nɛ̄ ó gē nwūla ɔ̄gɔ̄ kú ísu kóō pɛ́ ā, n yɔ̄.

²⁹N yɔ̄ eko nɛ̄ ó tū ɛjī lɛ ísu, o yá ɛ́ɛ́ kóō lɛyítáajɛ lɛ ɔ́da kú nū ā. N klla yɔ̄ eko nɛ̄ ó le etikpa nōo bī ɛcɛ háyi ā táajɛ ā.

³⁰N yɔ̄ igbīhi nū bɛ̄ɛka, ɔ̄cɛ oyúklɔ́ mla anú ā. Ami yá ɛ́ɛ́ nɛ̄ ó gē gwéeye ɛ̄cī dóódu á. Ɔtū gē he um eko dóódu nɛ̄ n yɔ̄ ɛgiyí nū.

³¹Ɛcɛ nɛ̄ ó yá ā kē he um ɔtū. Ɔtū kú ācɛ ɔlɛ́ nū kē he um.

³²Íjéeyī klla yɔ̄ ī kɛlā gɔbū kpɔ́ kahíníī, “Ayípōklóbīya, aá jāhɔ̄ gā um. Aá yá ɛ́gɛ́nɛ̄ n ka ā, cɛ́ɛ́ ɔtū kē í he aá.

³³Aá jāhɔ̄ lɛ ɔdā nēé nwū aá ā. Aá jíjééyī, aá lɛ eyī gwō íjééyī bónū ŋ́.

³⁴Ɔ̄cɛ dúúmā nōo jāhɔ̄ gā um, ɔtū géē he ɔ́. Ɔ̄cɛ dúúmā nōo bayi ɔwɛ kú ɔlɛ́ um eko dóódu, nɛ̄ ó klla ī gbō okómpíinu ɔlɛ́ um géē gwéeyē.

³⁵Ɔ̄cɛ nōo lɛ um pīyɛ, kē lɛ oyēeyī pīyɛ. É kē í he Óndú ā ɔtū.

³⁶Ɔ̄cɛ dúúmā nɛ̄ ó pīyɛ um ŋ́, gē yá iyī nū ágbe nɛ̄ n. Ɔ̄cɛ dúúmā nōo gē wɔ́tū um, ayíka ikwū he ɔ́ ɔtū fíyɛ́ á.”