Read idoma AÍITA 9 Bible Online

AÍITA 9 - idoma bible

AÍITA 9

¹Íjéeyī lɛ lɛbɛ̄ɛka ɔ̄cɛ ā, ó le inu kú nū gwó, le ákanaba ahāapa kpó kwu ɔ́ kwaajɛ.

²Ó le ɛbɛ́ kú ucɛ kú nū ŋmó ɛɛ́. Ó kē le aɔ́dā ō yá ejé lɔnyɛ kpó tū ɔ̄ dúú ɛɛ́. Ó kē le ɔdōlé kú nū tútū báajɛ dúú ɛɛ́.

³Ó le ācocɛ̄hɔ̄ nɔ̄nyā kú nū kpó tɛ̄hɔ̄ gāá hi ācɛ igwú wā. Ɛga nōo licō fíyɛ́ dúú kú eyīpɔ́lɛ́ ā, nēé ce bá ī hī ācɛ igwú ŋmá á. É bá ī kahíníī,

⁴“Ɔ̄cɛ nɛ̄ ó wɛ ogwuda ā kóō wā.” Ó da aólíla ā kahíníī,

⁵“Wā í lé ɔdōlé kú um, ká ā klla gwá ejé kú um nɛ̄ n kpó aɔ́dā alɛwa o le ejé lɔnyɛ tū ɔ̄ ā.

⁶Aá nyɛ̄ɛ̄ ŋmá ipú ígwu kú aógwuda, ká ā géē yēeyī. Wā gāá yɛce ɔwɛ kú ɔdōōjé.”

⁷Ó yɔ̄ ī kɛlā kpɔ́ kahíníī, “Ɔ́dāŋ́ ka, a le ɛlā nwū ɔ̄cɛ nōo gbɛlá ka anúɔ jé ɔdā nɛ̄hi, ɛcá nɛ̄ ó gáā cá uwɔ á. Ɔ́dāŋ ka ɔ̄cɛ le ɔ̄cobɔ̄bíipú nā tá ɔwɛ, ó lɛ odée yá ɔ̄cɛ ɔ́ɔmā.

⁸Ā híī nwū ɔ̄cɛ nōo gbɛlá ka anúɔ jé ɔdā nɛ̄hi ɛlā gbóógbō ŋ́, ohígbū nɛ̄ ó géē wɔ́tū uwɔ. Amáŋ, ɔ́dāŋ ka ɔ̄cɛ le ɛlā nwū ojéeyī, ó géē lɛ ojīlīma ce ɔ̄cɛ ɔ́ɔmā.

⁹Ɔdā dúúmā nēé le nwū ɔ̄cɛ ojéeyī, ó géē cɛ̄ lɛ ɔ́ kóō jéeyī fíyɛ́. Ɔdā dúúmā nēé le nwū ɔ̄cɛ okpaakpa, ó géē cɛ̄ lɛ ɔ́ jé odée fíyɛ́.

¹⁰Ɔ̄cɛ dúúmā nōo gē lɛ ojīlīmā ce Óndú ā klla gē lɛyítáajɛ lɛ ɔ́ ā, gbɔɔ́ ō jéeyī ɛɛ́. Óndú ā lɔhi dúúdú klla le kpaakpa. Ɔ́dāŋ ka ɔ̄cɛ dúúmā jɛ́yí kú ɔdā lɔɔlɔhi, ó géē jé Óndú ā aflɛ́yí.

¹¹Íjéeyī géē cɛ̄ lɛ ɔ̄cɛ ojéeyī kóō lɛ́ɛcɛ.

¹²Ɔ́dāŋ́ ka ɔ̄cɛ jéeyī, íjééyī ā, géē tīile lɛ ɔ́, amáŋ ɔ́dāŋ ka ɔ̄cɛ dúúmā tá íjééyī, anú gáā móōwē nū á.

¹³Íla lɛbɛ̄ɛka ɔnyā nōo wɛ ogwuda o yúuya, nɛ̄ ó jé ɔdā uwēyī ŋ́ mā.

¹⁴Ó gē cīce okómpíinu ɔlɛ́ unū, ámāŋ ka ɛga nōo licō fíyɛ́ kú ipú eyīpɔ́lɛ́,

¹⁵yɔ̄ ī hī ācɛ dóódu nēe gē wā í yɛ ā igwú. Ācɛ nēe bá ī yɛ ɔwɛ kú uwā kpaakpa ī nyɔ̄ ā, nɛ̄ ó gē hīīgwú kahíníī,

¹⁶“Aá le nyā ce ɔlɛ́ aólíla mɛ́mla ogwuda.” Ó gē da aólíla ā kahíníī,

¹⁷“Éŋkpɔ̄ ō gwá nēé hɛ́ uwī ā lɔnyɛ fíyɛ́ á. Igbō nɛ̄ ɔ̄cɛ je uwī ā klla lɔnyɛ fíyɛ́ dúú á.”

¹⁸Ācɛ dóódu nēe cīigwú kú nū ā, í jé ka ikwū ō ŋmó ɔ̄cɛ, ɔ́ɔ yɔ̄ ɔlɛ́ nū ŋ́. O bēhé okómpīinu ga ɔlɛ́ nū ā, mla o bēhé ga ɔlékwū wɛ ɔdā ékpónú.