Read idoma Ɔ̄COKÓĪTÁ 1 Bible Online

Ɔ̄COKÓĪTÁ 1 - idoma bible

Ɔ̄COKÓĪTÁ 1

¹Ɛ̄nyā wɛ ɛlā nɛ̄ ɔ̄cojéeyī, ɔyí Udéfīdi gbafíyóó lɛyíkwu ɔ́ á. Ɔ̄cojéeyī nyā wɛ ɔcɛ́ kú Ujerúsālɛm.

²Ó ka odúúdú ɔdā ɔ́ɔ wɛ áncā! Ó klla ka odúúdú oyēeyī mɛ́mla ɔdā dóódu nēe bá ipú ɛcɛ nyā ɔ́ɔ wɛ áncā.

³Ó ka ɔdí ɔ́ɔ wɛ itene nɛ̄ ɔ̄cɛ gē lɛ ŋmá ipú odúúdú úklɔ́ kú ōwē nɔ́ɔ gē má ipú ɛcɛ ā?

⁴Ó klla kɛlā gɔbū kahíníī, “Aɛ́gɔ́ éyi yɔ̄ ī pɛ́ kwú, é kē yɔ̄ ī ma aɛ́gɔ́ ɔhá, amáŋ, ɛcɛ yɔ̄ ɛ́gɛ́nɛ̄ ó yɔ̄ ā kpɔ́.

⁵Ɛnɔ gē ŋmá ajɛ, klla gē gaajɛ ī pīyɛyi fíyafíya ga ɛga nōó ŋmá wɛ̄ɛcɛ ā.

⁶Owu gē tá ga ɛháajɛ, ó gē tá ga ɛhícō, ó klla gē tá biílí jāā gbéeko nōó kwúcē ga ɛga nōó tá ŋmá ā.

⁷Ísu dóódu gē pɛ́ ga ipú ítekwú, amáŋ ítekwu í kē mu ŋ́. Ó klla gē pé kwúcē ga ɛga nōó ŋmá ā.

⁸Ɔdā dóódu le jɛ̄ ācɛ ɛjɛ̄ nɛ̄ okónu í ka ɔ́ glá ŋ́. Eyī í cɛ́ɛbɛ ŋ́, ɛɛ́ nɛ̄ ahɔ̄ ī tá ɛlā ō pó ŋ́.

⁹Ɔdā nōo tɛtɛ yɔ̄ ā, géē yɔ̄ kpɔ́. Ɔdā nēé le yá ɛɛ́ mā, nēé géē yá igbɔhá kpɔ́ á. Ɔdā dúúmā í wɛ ɛ̄yīpɛ̄ ipú ɛcɛ ɛ́ɛ́ ŋ́.

¹⁰Ó lɛ ɔdā dúúmā yɔ̄ nɛ̄ ācɛ í ka ka, aá má ɔ̄ o, ɔdā ɛ̄yīpɛ̄ yɔ̄ á ā? Ehée, ɔdā ɔ́ɔmā tɛtɛ le yá íkííkée gbɔbū ɛ́ɛ́ nēé ma alɔ á.

¹¹Ɔ̄cɛ dúúmā í gē blakwu ɔdā nōo tɛtɛ le yá ī gla ɛɛ́ mā ŋ́. Ācɛ kú ɛcɔ̄bū í klla gáā blakwu ɔdā nōo yɔ̄ ī yá abālɔbányā ŋ́.

¹²Ami ɔ̄cojéeyī ā, húmáyī wɛ ɔcɛ́ kú Ísrɛ̄lu ipú Ujerúsālɛm.

¹³N bī íjééyī le klɔ́ɔcɛ́ kú odúúdú ɔdā nēé yá ipú ɛcɛ nyā ā. Amáŋ, n le má ka iyó ogbɛnú, mɛ́mla úklɔ́ kú ōwē nɛ̄ Ɔwɔicō je lɛ alɛɛcɛ ipú ɛcɛ á.

¹⁴N le ɔdā dóódu nēé ī yá ipú ɛcɛ nyā ā má ɛɛ́, amáŋ odúúdú uwā wɛ áncā bɛ̄ɛka ɔ̄cɛ nōo yɔ̄ ī nū owu inya kóō lɛ ɔ́ kwú ā.

¹⁵Ɔdā dúúmā nōo le pú ɛɛ́, í tōō nā gɛ ŋ́. Ɔdā dúúmā nōó yɔ̄ ŋ́, í gáā tōō gbaáluka ŋ́.

¹⁶N da iyī um ka, ami jééyī fíyɛ́ odúúdú ācɛ nēe tɛtɛ cɔcɛ́ Ujerúsālɛm gbɔbū gā um ɛ́ɛ́ á. N jééyī klla jɔ́dā nɛ̄hi

¹⁷N le ɔ́ ŋmó tū ipú ɔtū kú um ka n̄ lɛ ɔdā nōo wɛ ɛyɛ́ɛyɛ́yí kú ijééyí mɛ́mla íla ō lá ā jé. Amáŋ, n le má ka odúúdú ɔdā nɛ̄ n tíne ō yá nyā wɛ áncā. Ó lɛbɛ̄ɛka ɔ̄cɛ o nū owu inya, cɛ́ɛ́ kóō lɛ ɔ́ kwú ā.

¹⁸Ohígbū ka, ɛ́gɛ́nɛ̄ nɛ̄ ɔ̄cɛ jééyī nwune lɛ ā, ɛ́gɔ́ɔmā nɛ̄ ɔtū kú nū je unwalu lɛ ɔ́ lɛ á. Ɛ́gɛ́nɛ̄ a jé ɔdā nɛ̄hi lɛ ā, ɛ́gɔ́ɔmā nāa lɛ ɔtūnɔ̄bí lɛ á.