Read idoma Ɔ̄COKÓĪTÁ 10 Bible Online

Ɔ̄COKÓĪTÁ 10 - idoma bible

Ɔ̄COKÓĪTÁ 10

¹Ɛ́gɛ́nɛ̄ okwū kú iju gē yá ká anɔ̄ ō kpóocu nɛ̄hi ā kóō nípī glá ā, ɛ́gɔ́ɔmā nɛ̄ ucē íla lígíí ī bīya iyē kú ɔ̄cojééyī mɛ́mla ɔ̄cɛ o lɛ ojīlīmā nɛ̄hi glá á.

²Ɔtū kú ɔ̄cɛ ojéeyī gē cɛ̄ lɛ ɔ́ yá ɔdōōlɔhi, Amáŋ ɔtū kú olíla gē cɛ̄ lɛ ɔ́ ī yá ɔdōbɔ̄bí.

³Iyāwu o yɛ bɔ́lɔ́ɔ́lɛ́ kú olíla, gē mafú lɛ odúúdú ācɛ nēe má ɔ̄ ā ka ɔ́ɔ wɛ olíla á.

⁴Ɔ́dāŋ ká ɔcɛ́ yɔ̄ ī cɔ̄nū tū uwɔ, á cāŋjɛ ŋmá iyɔ̄bū nū ŋ́, ohígbū ka o yɔ̄ cíí kú uwɔ iyɔ̄bū nū ā gē tá ɔ̄ ɔtū wā ajɛ.

⁵Ɔdōbɔ̄bí éyi nɛ̄ n má ipú ɛcɛ ā, wɛ onyíleyī kú aɔ́cɛ́ ā.

⁶É kwú aólíla ú kpó ce ɛga kú ojīlīma nɛ̄hi, klla kwú aólɔdu ú kpó bá ɛháajɛ kú uwā.

⁷N má aɔ́fíyɛ́ bá ī ce ɔnya, ɛ́ɛ́ nɛ̄ ayí kú ɔcɛ́ kē bá ī yɛ ikpó bɛ̄ɛka ɔfiyɛ ā.

⁸Ɔ̄cɛ dúúmā nōo ge bū ɔ̄gɔ̄ tá ajɛ ā, gē je míya tū ɔ̄. Ɛgwā kē í kwú ɔ̄cɛ nōo lɛ ɔdɔ ca kpló ā.

⁹Ɔ̄cɛ dúúmā nōo gē ca ɛcɔ̄ ā, ɛcɔ̄ ā lɔfú yá ɔ̄ ágbe glá. Ɔ̄cɛ nōo kē í yíla ɛfú ā, ɛfú lɔfú yá ɔ̄ ágbe glá.

¹⁰Ɔ́dāŋ ka agá í lé ulé ŋ́, nēé kē tū ɔ̄ ulé ŋ́, ɔ̄cɛ í lɔfú tīīyē nɛ̄hi ɛ́ɛ́ nōó géē bī ɔ̄ yíla ɛfú glá á. Amáŋ, íjééyī gē cɛ̄ lɛ odée kwú ɔ̄ lɛ ɔ̄cɛ.

¹¹Ɔ́dāŋ ká ɛgwā lɛ ɔ̄cɛ kwú ɛɛ́, o tá ɛgwā ā ɔtū wāajɛ kú ɔ̄cɛ kóō lɛ abɔ̄ kwú ɔ̄ glá ā, í tīile lɛ ɔ̄cɛ nɛ̄ ɛgwā kwú ā ɔwɛ dúúmā ŋ́.

¹²Ɛlā nɛ̄ ɔ̄cɛ o jéeyī gē ka ā, gē bī ojīlīmā gé lɛ ɔ́, Amáŋ, ɛlā nɛ̄ olíla gē ka ā, ī bī ikwū gē lɛ ɔ́.

¹³Olíla gē bī ɛlā ɛfulɛ́ɛfu le gbo ɛlā kú nū ŋmáajɛ. Ó kē í ŋmó ɛlā ɔ́ɔmā ɛyí mla ɛlā ɛ́lɛ́ ɛdɔ obɔ̄bí ā.

¹⁴Olíla gē kɛlā alɛwa nááná nɛ̄ ɔ̄cɛ í jé ɔdā nōo gáā yá igbɔhá ŋ́ mā. Ɔnyɛ lɔfú jé ɔdā nōo í yá ɔ̄ igbīhi ikwū kú nū ā?

¹⁵Ɛ̄jɛ̄ kū úklɔ́ o lígíí nɛ̄ olíla yá ā gē jɛ̄ ɔ̄ nɛ̄hi, cɛ́ɛ́ kóō jé ɔwɛ o yɛ ga ɔlɛ́ ŋ́.

¹⁶Ohóō yɔ̄ lɛ ewo dóódu nɛ̄ ɔcɛ́ kú nū wɛ ɔyípɛ̄ nɛ̄ aígabɔ̄ kú nū bá ɛyí ucɛ ō lé otú gbɔ́ɔ̄cī ɛ̄cī dóódu.

¹⁷Ɔhā yɔ̄ lɛ ewo dóódu nɛ̄ ɔcɛ́ kú nū wɛ ɔ̄cɛ abɔ̄yīnū nōo ī yá ɔdā okpaakpa, nɛ̄ aígabɔ̄ kú nū gē lé, gē gwá eko nōo cíkā, nēé gáā wīyā ejé ŋ́, cɛ́ɛ́ kéē lɔfú iyē.

¹⁸Ɔ́dāŋ nɛ̄ ɔ̄cɛ le kwáhi nɛ̄ɛ̄nɛ̄hi, klla ī yúújulu nɛ̄ ó glá ɛyí inu kú nū yá glá ŋ́. Inu ɔlɛ́ nū géē nu klá anú, cɛ́ɛ́ inu ā kwú wúla tāajɛ.

¹⁹Ucɛ oōlé gē cɛ̄ lɛ ɔ̄cɛ ī gwéeyē ī yɛhɛ. Ejé oōgwá kē í je éeyē lɛ ɔ̄cɛ, amáŋ á gáā lɛ odóódu ūwā glá ɔ́dāŋ ka á lɛ ije ŋ́. Ohígbū ka ije kē ī yá ɔdā dóódu á.

²⁰A híī ŋmó ɔcɛ́ okónu ŋ́, ó kōō ipú ɛlā nɛ̄ a ī gbo, ɛ́ɛ́ nāa ī ŋmó ɔ̄cɛ ojīlīma okónu ipú inu eyīpú, ɛga ō gbɔlā kú uwɔ ŋ́. Ohígbū ka ɛyilɔ éyi, ámāŋ ka ɔdɔ lɔfú je ɛlā nāa ka ā, nyɔ̄ í ka lɛ uwá glá.