Read idoma Ɔ̄COKÓĪTÁ 12 Bible Online

Ɔ̄COKÓĪTÁ 12 - idoma bible

Ɔ̄COKÓĪTÁ 12

¹Aá blakwu ɔ̄cɛ nōo yá ɔ́na kú aá ā, eko nɛ̄ aá wɛ ɛdrɔ́ ā. Gbɔ̄bū ɛ́ɛ́ kú eko unwalu kú ókplícī kóō wā, nɛ̄ aá géē ka ka, aá í jɔ́ɔnyɛ kú oyēeyī gɛ ŋ́.

²Eko nɛ̄, ɛnɔ, ɔyā mɛ́mla aínyílɔ́wɔ géē je dobū tū aá, nɛ̄ aá klla má uwá lɔhi gɛ ŋ́ mā. Nɛ̄ ɔwɔ gē wɛ oōtū ipú eyī kú aá juu, eko dóódu ā.

³Eko ɔ́ɔmā, abɔ̄ kú uwɔ, [6] nōo gē gbō uwɔ ā gbɔɔ́ ō fīyégbúlú, ikpo kú uwɔ nōo lɔfú abālɔbányā géē gbɔɔ́ ō gɔ́ gbeegbe. Ayīnu kú uwɔ géē je kpó fu lé ŋmá okónu, nɛ̄ á gáā má ayīnu o bī lɛ lé ɔdōlé gɛ ŋ́. Eyī kú uwɔ kwu dobū nɛ̄ á klla mɛ́ɛbɛ lɔhi glá gɛ ŋ́.

⁴Eko nɛ̄ á gáā pɔ́ ahɔ̄ lɔhi ɛɛ́ nāa gē pó uya nōo ī yá úláyi ā glá ɛ́ɛ́ gɛ ŋ́, ɛ́ɛ́ nāa gē pó uya kú ɔdɛ̄gɔ̄ nɛ̄ anyā yɔ̄ ī gbā ā glá gɛ ŋ́, ɛ́ɛ́ nāa gē pó ijē kú anyā o gbɔ̄dā ɛgɔ̄ ā glá gɛ ŋ́. [7] Uya kú aígbáanɔ géē yɔ̄ ī hɛ́ uwɔ eyī ŋmá īyɔ̄lā.

⁵A géē yɔ̄ í yúufi kú ɛga o licó, á klá gáā yāwu lɔhi glá gɛ ŋ́. Īnyīlɛyí kú uwɔ géē je pīya ɛnɛ̄hɛ́ dúúdú. Á gáā lɔfú yɔ̄ ī pi iyī uwɔ yɔ̄ ī yɛ glá gɛ ŋ́. Eko ɔ́ɔmā, unwū kú ɔdā dóódu kú uwɔ géē mɛ. Ohígbū ka ɔ̄cɛ gē nyɔ̄ ɔlɛ́ nū kóō nyɔ̄ í mlɛ́nyɔ́ ɛɛ́, cɛ́ɛ́ ācɛ oyɔ́tūnōbí ā, géē bá ipú úláyi, bá ī jikwū, klla í yɔ̄ ipú ɔ́tūnōbí.

⁶Aá gbɛlá kwu ɔ̄cɛ nōo yá aá ā abālɔbányā nɛ̄ aá wɛ ɛdrɔ́ kpɔ́ ā, gbɔbū kéē je oyēeyī kú aá nōo cɛgbá bɛ̄ɛka agbá kú oje nɛ̄hɛ́ ā hɛ́, ámāŋ ka o je oyēeyī kú aá nōo cɛgbá bɛ̄ɛka ocíbú kú ugóolu (oje ɔdɔ) ō hɛ́ éŋkpɔ̄ ā ca.

⁷Ɔkpíyē kú ācɛ géē kwúcē ga ipú ajɛ ɛga nōó ŋmá ā. Owu kú ɔ̄cɛ kē í kwúcē ga ɛgiyí Ɔwɔicō nōo je owu ā lɛ ɔ̄cɛ ā.

⁸Ɔ̄cojéeyī ā ka odúúdú ɔdā dóódu ɔ́ɔ wɛ áncā! Ó klla ka odúúdú oyēeyī mɛ́mla ɔdā dóódu ipú ɛcɛ nyā ɔ́ɔ wɛ áncā.

⁹Abɔ̄ ɔ̄cojéeyī nōo klla jɔ́dā nɛ̄hi ā, yɔ̄ ī nwū ācɛ ɔdā nōó jé ā. Ó kllɔcɛ́ kú ita alɛwa, klla le jé ka aíta ā wɛ ɔkwɛ̄yi nɛ̄hi.

¹⁰Ɔ̄cojéeyī ā tíne ɛlá ō tɔ́tūlé, amáŋ ɛlā nōó tá tāajɛ ā wɛ ɛlā ɔwɛ dóódu.

¹¹Ɛlā kú ācojééyī ā lɛbɛ̄ɛka ɔcí nɛ̄ ogbāálá gē bī le pīya álá kú nū ɛyí ā. Ita nēé le túbá tɔ̄há gē yɔ̄ piyóó bɛ̄ɛka, oje nēé ge hɛ́ tū ɔcí ā. É ŋmá ɛgiyí Ɔwɔicō nōo wɛ ɔ̄cogbāálá kú odúúdú alɔ ā.

¹²Ɔyí um, odée yɔ̄ abɔ́ɔ nāa géē lɛ ɛlá kwu ɔ́ kpɔ́ ɛ́ɛ́. Ɔkpá nɛ̄ ɔ̄cɛ ī tá ā í lɛ oŋmɛ́yí ŋ́. Ɔkpá oōjé nɛ̄hi gē jɛ̄ɛ̄jɛ̄, klla ī je ɔ̄cɛ híla.

¹³Abālɔbányā ā, n le ɛlā dóódu ka mɛ ɛɛ́. Oŋmɛ́yí kú ɛlā a yɔ̄ mɛ́ɛ́ á. Aá yúufi Ɔwɔicō, cɛ́ɛ́ kú aá lɛ íne kú nū tū, ohígbū ka ɛ̄nyā wɛ odúúdú úklɔ́ kú ɔ̄cɛ á.

¹⁴Ɔwɔicō géē kɛpɔ̄ kú ɔdā dóódu nɛ̄ alɔ yá ā. Kwu ɔdā nɛ̄ alɔ yá tayínū, mɛ́mla ɛ̄nɛ̄ alɔ yá tɛ́ɛcɛ, kwu aɔ́dā obɔ̄bí mɛ́mla ɔdā olɔhi. Ɔwɔicō gáā kɛpɔ̄ kú ɔdā dóódu á.