Read idoma Ɔ̄COKÓĪTÁ 2 Bible Online

Ɔ̄COKÓĪTÁ 2 - idoma bible

Ɔ̄COKÓĪTÁ 2

¹N gbɛlá ipú ɔtū kú um, ka n̄ géē jɔ́nyɛ klla má abahi kú ɛcɛ mɛ́mla agbénú kú ɛcɛ ā, cɛ́ɛ́ ká n̄ má ɔdā nōo lɔhi ipu oyēeyī ā, amáŋ n má ka ɔ́ɔmā wɛ áncā dúú.

²Ɛhɛ ō yɛ̄ wɛ íla oōlá. Abahi oōmá í yá ɔ̄cɛ dúúmā ɔdā olɔhi ŋ́.

³Abɔ̄ n yɔ̄ ī tíne íjééyī ipú ɔtū kú um ā, n ka ejé nɛ̄ n géē gwá ga ɛ̄jīla kú olíla á, cɛ́ɛ́ kóō lɛ um ɔtū yá yēŋēē. Nááná nɛ̄ n yɔ̄ ī gbɛla kwu ɔwɛ kú ijééyī kpɔ́ ā. N tíne ō le má ɔ́dāŋ ka ɛ̄nyā wɛ ɔdā olɔhi lɛ ācɛ kéē yá ipú oyēeyī kpií kú ūwā ipú ɛcɛ nyā ā.

⁴N yá ɔdā alɛwa nɛ̄hi. N gwó inu alɛwa klla hɛ́hɔ̄ kú ɔcí ufáyin nɛ̄hi.

⁵N lɛ ɛhɔ̄ nɛ̄hi alɛwa, klla tū ɔcí ɛyɛ́ɛyɛ́yí tū ipú ajɛ ā.

⁶N lɛ ɔ̄gɔ̄ kú éŋkpɔ̄ bu tá ipú nū, cɛ́ɛ́ kéē bī lɛ kpó éŋkpɔ̄ tū ɛhɔ̄ ā.

⁷N lɛ aɔ́fiyɛ nɔ̄nyā, mɛ́mla aɔ́fiyɛ nɔ̄nyīlɔ, é kllá ma ayí ɔfiyɛ alɛwa ɔlɛ́ um. N lɛ agbénú kú ɔdāajɛ fíyɛ́ odúúdú ācɛ nēe tɛtɛ bá gbɔbū gā um Ujerúsālɛm ā.

⁸N lɛ ugóolu (oje ɔdɔ) mɛ́mla oje nɛ̄hɛ́ tīīkwū bá lɛ īyī um, mɛ́mla ɛdɔ kú agbénú kú aɔ́cɛ́ mɛ́mla aígabɔ̄ kú aéwo nēe bá ɛháajɛ um ā. N lɛ ācɛ alɛwa kpó bá gē gwíijē gā um, ācɛnyā mɛ́mla ācɛnyīlɔ. N lɛ anyā nɛ̄ n gē ciikpó ūwā alɛwa nēe lɛwa fíyɛ́ ɛ́gɛ́nɛ̄ ɔ̄cɛnyīlɔ dúú lɔfú tíne.

⁹Īī, n gbagbénú nɛ̄hi, klla lɛ íkwu fíyɛ́ odúúdú ācɛ nēe tɛtɛ bá Ujerúsālɛm gbɔbū gā um ā. N lɔtūce íjééyī kú um dúúdú

¹⁰Ɔdā dóódu nɛ̄ n tíne ā, n lɛ. Ɛhá kú ɔdā dúúmā í kwú um ŋ́. N le ɔnyɛ kú ɔdā dóódu nɛ̄ n tíne ā jé. Ɔtū klla he um nɛ̄ɛ̄nɛ̄hi kú odúúdú úklɔ́ nɛ̄ n yá ā.

¹¹N gbɛlá kú odúúdú ɔdā nɛ̄ n yá ā, mla ɛ́gɛ́nɛ̄ n cēyītīkwū klla yá uwá lɔfú lɛ ā. Amáŋ odúúdú nū wɛ áncā, mla owu oōnū inya nɛ. Ó lɛ ɛyí ŋ́.

¹²N gbɛlá kwu íjééyī mɛ́mla íla kú alɛɛcɛ. Ɔdí nɛ̄ ɔcɛ́ éyi géē yá fíyɛ́ nɛ̄ ɔcɛ́ ɔhá nōo gbɔbū lɛ ɔ̄ ā, í tɛtɛ yá ŋ́ mā a?

¹³N má ka íjééyī lɔhi fíyɛ́ íla á, ɛ́gɛ́nɛ̄ ɔlá ofíyajɛ lɔhi fíyɛ́ obū ā.

¹⁴Ojéeyī gē má ɛga nēé gē nyɔ̄ ā, amáŋ olíla í kē jé ɔ́ lɛ ā ŋ́. Amáŋ, ɔdā ékpónú gē yá ūwā á.

¹⁵Anɔ́ɔ n da īyī um ka, ɔdā nōo yá olíla ā gáā yá um dúú á. Ó lɛ ā, ɔdí wɛ ile kú íjééyī nɛ̄hi kú um ā? N tá īyī um ohi ka, íle dúúmā í yɔ̄ ipú íjééyī kú um ā ŋ́. Odúúdú nū wɛ áncā nɛ.”

¹⁶Ɔ̄cɛ dúúmā í gē bla kwu ācɛ ojéeyī ɛ́ɛ́ nōó kōō ī bla kwu aólíla ŋ́. Eko kpií nēé géē je mlanyī odúúdú ūwā á. Ɛ́gɛ́nɛ̄ ojéeyī gē kwú ā, ɛ́gɔ́ɔmā nɛ̄ olíla gē kwú dúú á.

¹⁷Ohígbū ɛ̄nyā ā, oyēeyī le wú um ɔtū. Odúúdú ɔdā nēe yɔ̄ ipu ɛcɛ ā gē bī unwalu gé um. Odúúdú ūwā wɛ áncā, mɛ́mla owu oōnū inya nɛ.

¹⁸Odúúdú ɔdā nɛ̄ n yúklɔ́ nū ipú ɛcɛ, klla móōwɛ̄ nū ā, í tīile dóódu gā um ɛ́ɛ́ gɛ ŋ́, ohígbū ká n géē kwú hɛ ūwā tá lɛ ɔ̄cɛ nōo í mīyɛ ɔkwu um ā.

¹⁹Ɔ̄nyɛ jé, ɔ́dáŋ́ ka ɔ̄cɛ nōo géē mīyɛ ɔkwu um ā géē wɛ ojéeyi, amáŋ ka olíla ā? Nááná, anú gáā wɛ óndú kú odúúdú ɔdā nɛ̄ n móōwē nū klla yúklɔ́ nú ipú íjééyī kú um ipu ɛcɛ á. Odúúdú nū wɛ áncā mla owu oōnū inya nɛ.

²⁰Anɔ́ɔ n gbɔɔ́ ō hīíjéma ohígbū úklɔ́ nɛ̄hi dóódu nɛ̄ n yá ā.

²¹Ohígbū ka, ekōhī, odúúdú úklɔ́ nɛ̄ ɔ̄cɛ bī íjééyī mla ohílīpú kú nū yá ipú ɛcɛ ā, ɔ̄cɛ géē mā ɔ̄ tá lɛ aólúgwū mɛ́mla ācɛ nēé yúklɔ́ nū ŋ́ mā, kéē jɔ́ɔnyɛ nū. Odúúdú nū wɛ áncā mla ɔdā obɔ̄bī nɛ̄hi.

²²Ile nyá nɛ̄ ɔ̄cɛ lɛ ŋmá ipú odúúdú úklɔ́ mɛ́mla ákanya kú úklɔ́ nɛ̄ ó gē má ipú ɛcɛ āa?

²³Ohígbū ka, odúúdú ɛ̄cī kú nū ā le mu mla ákanya mɛ́mla ɔtūnōbí, klla mla íwɔ́tū. Otú nááná, ɔtū kú nū í mlɛ́nyɔ́ ŋ́. Ɛ̄nyā dúú ā wɛ áncā.

²⁴Ɔdā ɔhá dúúmā í yɔ̄ nōo lɔhi lɛ ɔ̄cɛ fíyɛ́ o yɔ̄ ī lé, klla í gwá, yɔ̄ í jɔ́ɔnyɛ kú ɔdā nɛ̄ ó yúkɔ́ nū ā ŋ́. Ohígbū ka n má ka ɛhi ɛ̄nyā ŋmá abɔ̄ kú Ɔwɔicō

²⁵Ohígbū ka, ɔ́dáŋ ka, ó wɛ Ɔwɔicɔ̄ ŋ́ nɛɛ, ɔ̄cɛ géē yɔ̄ ī lé, klla ī gwá, klla yɔ̄ ī jɔ́ɔnyɛ glá āa?

²⁶Ɔ̄cɛ nōo he Ɔwɔicɔ̄ ɔtū ā nɛ̄ ó gé je íjééyī mɛ́mla ɔdōōjé mɛ́mla éeyē lɛ ɔ́ á. Amáŋ, ācɛ o bīyííne ā, ó ge je úklɔ́ lɛ uwá kéē yá cɛ́ɛ́ kéē kpó ije mɛ́mla agbénú tū, cɛ́ɛ́ kú, Ɔwɔicɔ̄ kóō géē je kpó lɛ ācɛ nēe gē yá ɔdā nōo he ɔ́ ɔtū ā. Odúúdú nū wɛ áncā klla wɛ owu oōnū inya nɛ.