Read idoma Ɔ̄COKÓĪTÁ 3 Bible Online

Ɔ̄COKÓĪTÁ 3 - idoma bible

Ɔ̄COKÓĪTÁ 3

¹Ɔdā dóódu nōo gē yá ipú ɛcɛ nyā, gē yá eko nɛ̄ Ɔwɔicō ka kóō yá ā. Eko kú ɔdā dóódu nēe yā ipú ɛcɛ nya ā yɔ̄.

²Ó le eko o ma ɔyí tū, anɔ́ɔ ó kē le eko nɛ̄ ɔ̄cɛ í kwú ā tū dúú. Eko nēé nyi ɔdɛ̄hɔ̄ yɔ̄ mɛ́mla eko nēé gē cē ɔdɛ̄hɔ̄ nēé nyi ā kē yɔ̄.

³Eko nēé ī ŋmó odée yɔ̄, eko nēé ī nya odée tá kē yɔ̄. Eko kú ɔdā ō ca tāajɛ yɔ̄, eko kú ɔdā ō gwó gicō yɔ̄.

⁴Eko nɛ̄ ɔ̄cɛ gē jikwū yɔ̄, eko nɛ̄ ɔ̄cɛ gē yɛɛhɛ ā kē yɔ̄. Eko kú ɔtūnóbī yɔ̄, eko kú ɔtūnɛ̄hɛ́ kē yɔ̄. Eko nɛ̄ ɔ̄cɛ gē yɔ́tūnōbí yɔ̄, eko nɛ̄ ācɛ gē jīījē kē yɔ̄ dúú.

⁵Eko nɛ̄ ɔ̄cɛ ī pa ɛcɔ̄ hīla yɔ̄, eko nɛ̄ ɔ̄cɛ ī tú ɛcɔ̄ bá kē yɔ̄. Eko nɛ̄ ācɛ gē lɛ ɔtū má ācɛ ɔtū yɔ̄, eko nɛ̄ ācɛ gē tá ɔtū gɛcɛ hɛ̄ īyī ɔ̄cɛ ɔhá tá kē yɔ̄.

⁶Ó le eko nɛ̄ ɔ̄cɛ í tíne odée ā tū, ó kē le eko kú ɔdā ō bí tū dúú. Eko kú ɔdā ō le tū yɔ̄, eko kú ɔdā ō je tónū kē yɔ.

⁷Eko nɛ̄ ɔ̄cɛ ī híla ɔdā yɔ̄, eko nɛ̄ ɔ̄cɛ ī gɔ́ ɔdā kwɔhá kē yɔ̄. Eko nɛ̄ ɔ̄cɛ ī lɛ okónu klá cíí yɔ̄, eko nɛ̄ ɔ̄cɛ ī kɛlā kē yɔ̄.

⁸Ó le eko nɛ̄ ɔ̄cɛ ī yíihɔtū tū, ó le eko nɛ̄ ɔ̄cɛ kē ī wɔ́tu ɔ̄cɛ tū dúú. Eko nɛ̄ ācɛ gē kpɛ́fú yɔ̄, eko kú ɛbɔ́ ō yá kē yɔ̄.

⁹Ile nyá nɛ̄ ɔ̄cɛ oyúklɔ́ ī lɛ ŋmá odúúdú úklɔ́ kú nū ā?

¹⁰N má úklɔ́ olɔfú nɛ̄hi nɛ̄ Ɔwɔicɔ̄ je lɛ ayí kú ācɛ kéē yá ā.

¹¹Ɔwɔicō le ɔdā dóódu yá lɔhi tá eko okpaakpa kú nū. Ó kwú ɛlá kú ɔdā ō yɔ̄ piyóó í tá ipú ɔtū kú alɛɛcɛ, nááná é lɔfú jé ɛjī kú úklɔ́ kú Ɔwɔicō o ŋmá ohútū ga oŋmɛ́yí kú nū glá ŋ́.

¹²N le jé ka ɔdā ɔhá dúúmā í yɔ̄ nōo lɔhi lɛ alɛɛcɛ fíyɛ́ o bá ī má abahi kú oyēeyī mɛ́mla o bá ī gwéeye, klla bá ī yá ɔdā nēé yá glá eko nēé yēeyī kpɔ́ ā ŋ́.

¹³Ɛhi ɔhá nɛ̄ Ɔwɔicō yá alɛɛcɛ ā, wɛ o bá ī lé, mɛ́mla o klla bá ī gwá, klla bā ī jɔ́ɔnyɛ kú oyēeyī ipú odúúdú úklɔ́ kú ūwā nēé yá ā.

¹⁴N jé ka ɔdā dóódu nɛ̄ Ɔwɔicɔ̄ yá ā géē yɔ̄ piyóó. Ɔ̄cɛ dúúmā í je ɔdā dúúmā tá ɔ̄ glá gɛ ŋ́, ɛ́ɛ́ nōó kōō je ŋmá anú glá ŋ́ má. Ɔwɔicō yá uwá ɛ́gɔ́ɔmā cɛ́ɛ́ ká ācɛ ká é yúufi nū.

¹⁵Ɔdā dúúmā nōo yɔ̄ abālɔbányā, tɛtɛ yɔ̄ dúú ɛɛ́. Ɔdā nōo lɔfú yɔ̄ glá ā, kē tɛtɛ le yɔ̄ gbɔbū ɛɛ́. Ɔwɔicō ī yá kú ɔdā nōo tɛtɛ yɔ̄ ā kóō le yɔ̄ kpɔ́.

¹⁶N klla le má ipú ɛcɛ nyā ka ikɔkɔ nɛ̄ ɛpɔ̄ okpaakpa géē yɔ̄ ā, ɛlá ocēbá mɛ́mla ɛpɔ̄ újí gē yɔ̄ á. Ɛga nɛ̄ ɛlā okpaakpa gē yɔ̄ ā, abɔ́ɔ nɛ̄ obíípū mɛ́mla alācī bá á.

¹⁷N ka ipú ɔtū kú um kahíníī, “Ɔwɔicō géē kɛpɔ̄ tū ācɛ okpaakpa mɛ́mla ācobɔ̄bíipú ā. Ohígbū ka, ó lɛ eko kú ɛpɔ̄ tū lɛ ɔdā dóódu, mɛ́mla úklɔ́ dóódu kú ɔ̄cɛ.”

¹⁸N gbɛlá ipú ɔtū um, ka Ɔwɔicō yɔ̄ ī jé ayí kú alɛɛcɛ má, cɛ́ɛ́ kóō má ka, ɔ̄cɛ í klla lɔhi fíyɛ́ aɛ́bɛ́ kú ipácí ŋ́.

¹⁹Ohígbū ka ɔdā nōo gē yá alɛɛcɛ ā, gē yá aɛ́bɛ́ dúú á. Ācɛ gē kwú, aɛ́bɛ́ kē ī kwú dúú. Odúúdú ūwā gē fu owu ékpónú, éyi í olɔhi fíyɛ́ ɔhá ŋ́. Ohígbū ka oyēeyī wɛ áncā lɛ odúúdú ūwā.

²⁰Odúúdú uwā gē ga ɛga ékpónú. Úmúlá nɛ̄ odúúdú ūwā ŋmá á, ipú úmúlá ɔ́ɔmā nɛ̄ odúúdú ūwā gē nyɔ̄ á. Odúúdú ūwā kē í je pīya úmúlá igbɔhá kpɔ́ ɛɛ́.

²¹Ɔnyɛ jé ɔ́dāŋ́ ka odo kú ɔ̄cɛ gē gicō nɛ̄ ákú ɛbɛ́ gē gaajɛ á ā?

²²Ohígbū ɔ́ɔmā ā, n le má ka, ɔdā dúúmā í yɔ̄ nōo lɔhi lɛ ɔ̄cɛ fíyɛ́ o yɔ̄ ī jɔ́ɔnyɛ klla má abahi kú úklɔ́ kú nū ŋ́, ohígbū ka ɔ́ɔmā wɛ ukpɛ̄ kú ɔ̄cɛ á. Ɔ̄nyɛ klla géē bī ɔ̄cɛ ŋmá ɔlékwū wɛ̄ɛcɛ kóō má ɔdā nōo géē yá eko nɛ̄ ó gekwú ā?