Read idoma Ɔ̄COKÓĪTÁ 4 Bible Online

Ɔ̄COKÓĪTÁ 4 - idoma bible

Ɔ̄COKÓĪTÁ 4

¹N má ɛdɔ kú opīyatū dóódu nōo yɔ̄ ipú ɛcɛ ā. Ācɛ nēé gē pīyatū ā bá ī jikwū. Amáŋ, é má ɔ̄cɛ o tá uwá ɔtūlé nōo klla í tá uwá abɔ̄ ŋ́. Ɔ̄cɛ o tá uwā abɔ̄ dúúmā í yɔ̄ ŋ́, ohígbū ka ācɛ nēe bá ī pīya uwá tū ā lɔfú nɛ̄hi.

²N gbɛlá ka ācɛ nēe gekwú ɛɛ́ mā, nɛ̄ ó lɔhi lɛ uwá fíyɛ́ alɔ nēe yēeyī ā mɛ́ɛ̄ á.

³Amáŋ, ayí nēé ma ɛ́ɛ́ ŋ́ má nōó lɔhi lɛ uwá fíyɛ́ ācɛ nēe kwú mɛ́mla ācɛ nēe yēeyī á. Ohígbū ka uwá nēé wā ipú ɛcɛ nyā ɛ́ɛ́ ŋ́ mā, í má ɔdōbɔ̄bī nōo yɔ̄ ipú ɛcɛ nyā ā ɛ́ɛ́ ŋ́.

⁴N kllá le má ka ɔdā nōo yá ɛ́ɛ́ nɛ̄ ācɛ gē cēyītīkwū gē yúklɔ́ kóō le lɔhi lɛ uwá ā, wɛ ohígbū ímálānyī kú aɔ́mpa uwá nɛ. Ɛ̄nyā dúú ā wɛ áncā, mɛ́mla owu oōnū inya nɛ.

⁵É ka olíla nōo gē kpó abɔ̄ wu agada, í gē yá ɔdā dúúmā ŋ́, gē kwú ɛmiyɛ á.

⁶Ó lɔhi fíyɛ́ kú ɔ̄cɛ kóō lɛ uklɔ́ lígíí, nɛ̄ ó géē yɔ̄ ī yá nōo í je ɛbɔ́ lɛ ɔ́, ikɔkɔ ō kpó abɔ̄ ɛpɛplɛ́ɛpa tū ipú uklɔ́ ō yá nōo lɛbɛ̄ɛka inya oōnū owu ā.

⁷N le ɔdā ɔhá má ipú oyēeyī nyā nōo wɛ áncā ɛɛ́.

⁸Ɔ̄cɛ nɛ̄ ó lɛ ɔyí ŋ́, ámāŋ ka ɔyínɛ́ dúúmā ŋ́ mā, náaná ɛ̄jɛ̄ kú úklɔ́ ɔdā ō tíne í kē jɛ̄ ɔ̄ ŋ́. Eyī kú nū kwu agbénú ō tíne eko dóódu. Ó kē ī da īyīnū ɔ̄kā ka, ɔ̄nyɛ nɛ̄ anúɔ gē yúklɔ́ nyá bá lɛ ɔ́ ā, nɛ̄ anúɔ í jɔ́ɔnyɛ kú īyī anúɔ glá ŋ́ mā ŋ́. Ɛ̄nyā dúú ā wɛ áncā mɛ́mla úklɔ́ kū ōwē.

⁹Ācɛ ɛpa lɔhi fíyɛ́ ɔ̄cɛ ékpónú á, ohígbū ka é gē yúklɔ́ tɔ̄há lɔhi fíyɛ́.

¹⁰Ɔ́dāŋ ka ɔ̄cɛ éyi kú ūwā má gwōnū, ɔ̄mpa nū kē ī je ɔ́ ŋmá ajɛ. Amáŋ ɔ́dāŋ ka ɔ̄cɛ éyi yɔ̄ ōfōōfūnū, anɔ́ɔ ó má gwōnū, ó í bɔ̄bí lɛ ɔ́ nɛ̄hi, ohígbū ka ɔ̄cɛ nōo í tá ɔ̄ abɔ̄ í kē yɔ̄ ŋ́.

¹¹Ɔ́dāŋ ka ācɛ ɛpa gwutá agōdō tɔ̄há, iyē géē kwɔ́lá tū iyī uwā iyē. Amáŋ, abɔ̄ ɔ̄cɛ ékpónú géē gwutá lɛ nɛ̄ iyē géē kwɔ́lá lɛ ɔ́ lɛ glá ā?

¹²Ɔ̄cɛ gē nuunu tá ɔ̄cɛ ékpónú, yá ɔ̄ lé glá, amáŋ ó gáā yá ācɛ ɛpa lé glá ŋ́. Ɔ́ngbá ɛtá nēé le jíla tɔ̄há í gáā hɛ́ fíyaa glá ŋ́.

¹³Ɔyípōklóbīya nōo wɛ olɛhá, klla jééyī, lɔhi fíyɛ́ ɔcɛ́ nōo wɛ olíla nōó gē mīyɛ ɛlā nēé gē nwū ɔ̄ ŋ́ mā,

¹⁴nááná nɛ̄ ɔyípōklóbīya ā kōō ŋmá agbá gaá ce akpa kú ɔcɛ́ ipú ajɛ kú ɔlɛ́ nū, ámāŋ nɛ̄ ó kōō tɛtɛ wɛ olɛhá.

¹⁵N má odúúdú ācɛ nēe lá ipú ɛcɛ ā, n le má ká ipú ayípōklóbīya kú ɛcɛ ā, ɔ̄cɛ éyi yɔ̄ ipú uwā nōo géē mīyɛ ɔkwu ɔcɛ́ ā.

¹⁶Ācɛ nɛ̄ ɔcɛ́ gē gbō ā lɛwa nɛ̄hi, amáŋ eko nɛ̄ ɔcɛ́ ī yɔ̄ gɛ ŋ́, ɔ̄cɛ dúúmā í gáā tá ɔ̄ ahínyá kú úklɔ́ nōó yá ā ŋ́. Odúúdú nū wɛ áncā, mɛ́mla owu ō nū inya nɛ.