Read idoma Ɔ̄COKÓĪTÁ 5 Bible Online

Ɔ̄COKÓĪTÁ 5 - idoma bible

Ɔ̄COKÓĪTÁ 5

¹Lɛ ɛlá kwu ɔ̄ eko nāa gē ga Agblīihɔ-nɛ̄hi kú Ɔwɔicō ā. Ó lɔhi ká ā ga abɔ́ɔ gaá jāhɔ̄ kú ā kē kllɔcɛ́ fíyɛ́ ó ga abɔ́ɔ gaá gwɛ́ɛya bɛ̄ɛka aólíla, nēé jé ka ɔdā nɛ̄ aá yɔ̄ ī yá ā, ɔ́ɔ wɛ ɔdōbɔ̄bí ŋ́ mā á.

²Okónu kú uwɔ kóō híī hágágā ɛlā ō ka ŋ́, ɛ́ɛ́ nɛ̄ ɔtū kú uwɔ gē ŋmúleyīkwū okónu ō ce lɛ Ɔwɔicō ŋ́. Ɔwɔicō yɔ̄ ɔkpáncō, a kē yɔ̄ ɛcɛ. Ohígbū ɔ́ɔmā, ɔdā nɛ̄ á gáā yá glá ŋ́, ā híī ka ŋ́.

³Ɛlá alɛwa ō gbo gē cɛ̄ lɛ ɔ̄cɛ ī nɔ̄ɔ̄na ɔbɔ̄bí, ɛ́gɔ́ɔmā nɛ̄ ɛlā alɛwa ō ka gē bī ɛlā kú íla wɛ̄ɛcɛ á.

⁴Eko dúúmā nāa lɛ okónu ce lɛ Ɔwɔicō, a híī kpéeko bónū ō yá okónu nāa ce ɔ́ɔmá jīla ŋ́. Ohígbū ka, okónu ō ce kú olíla í he Ɔwɔicō ɔtū ŋ́. Lɛ ɔdā nāa cokónu nū ā yá.

⁵Ó géē lɔhi fíyɛ́, ɔ́dāŋ ka á cokónu ŋ́, fíyɛ́ o le okónu ce, nɛ̄ á yá ɔdā nāa cokónu nū ɔ́ɔmā ŋ́ mā a.

⁶A híī cɛ̄ kú okónu kú uwɔ kóō cɛ̄ gā uwɔ bīyíne ŋ́, ɛ́ɛ́ nāa gē da ɔ̄cogwɛ́ɛya kú Ɔwɔicō ā, ka anúɔ yɔ̄ ī hiijā nɛ̄ ŋ́. Ɔdíyá nāa yá ka Ɔwɔicō kóō cɔ̄nū mla awɔ ā? Ɔdíyá nāa ī yá ká Ɔwɔicō, kóō je ɔdā nāa yúklɔ́ nū ā yíífi ā?

⁷Ɛ́gɛ́ dúúmā nāa nɔ̄ɔ̄na lɛ, mla ɛ́gɛ́ dúúmā nāa yúklɔ́ áncā lɛ, mɛ́mla ɛ́gɛ́ dúúmā nāa jé ō kɛlā lɛ, a cíkā ō yúufi Ɔwɔicō piíí.

⁸Ó híī hɛ́ aá idáagó ŋ́, eko nɛ̄ aá má ka aígabɔ̄ kú ipɔ́lɛ́ gē pīya aólɛhɔ́cɛ tū, klla nyá uwā ɛpɔ̄ okpaakpa, klla í gē yá uwá ɔdā olɔhi ŋ́. Igabɔ̄ dóódu lɛ igabɔ̄ ɔhá nōo yɔ̄ ɛhícō gē gbō ɔ̄, ɔhá kē yɔ̄ nōo kē wɛ otrɛ̄yí kú odúúdú aígabɔ̄ nōo gē gbō odúúdú uwā.

⁹Ɔcɛ́ nááná gē gbolóce ɔdɛ̄hɔ̄ nēé gē cē ā[1]

¹⁰Ije í gáā jɛ̄ ɔ̄cɛ dúúmā nōo gē yá unwū kú ije ŋ́. Ɔ̄cɛ dúúmā nɛ̄ agbénú mla itene he ɔ́ ɔtū, ó gáā jē ɔ̄ glá ŋ́ dúú. Odúúdú nū wɛ áncā nɛ.

¹¹Ɛ́gɛ́nɛ̄ a lɛ agbénú lɛ ā, ɛ́gɔ́ɔmā nāa gē je ɔdōlé lɛ okónu alɛwa lɛ á. Ile nāa lɛ ŋmá anú ōfōōfūnū ā wɛ o yɔ̄ ī má agbénú ā fōōfūnū.

¹²Ācɛ o yúklɔ́ lɔfú ā gē gbiyɔ̄lā lɔhi otú glá, nááná nēé lɔfú má ɔdōlé lé nīipú glá, ámāŋ ka é lɔfú má lé nīipú glá ŋ mā. Amáŋ agbénú kú ɔ̄cɛ nōo lɛ ɔdu ā, í cɛ̄ lɛ ɔ́ gbiyɔ̄lā otū glá ŋ́. Ó yɔ̄ ī junwalu lɛ ɔ́.

¹³Ɔdōōbɔ̄bí nɛ̄hi éyi nɛ̄ n má ipú ɛcɛ ā yɔ̄ á, ācɛ gē kpó ije kú uwá tū gbēyī eko kú ɛgbá kú uwā,

¹⁴amáŋ, eko nēé gaá lɛ ɛyí olɔnɔ lɛ ipú ɔ́hí obɔ̄bí éyi nēé tá ā, cɛ́ɛ́ agbénú ɔ́ɔmā kwú kpó yíífi, nēé klla má ɔdā dúúmā ō le tá ajɛ lɛ ayí uwā gɛ ŋ́.

¹⁵Ācɛ tábɔ̄ áncā ŋmá ipú kú ɛ́nɛ́ uwā wā ipú ɛcɛ nyā, ɛ́gɔ́ɔmā nēé gáā kwúcē nyɔ̄ lɛ dúú á. Ɛdɔ úklɔ́ dóódu nɛ̄ ācɛ yá nááná, é gáā má ɔdā dúúmā je ŋmá ɛcɛ glá ŋ́.

¹⁶Ɔ́ɔmā ī le kpaakpa ŋ́. Ācɛ gēe nyɔ̄ ɛ́gɛ́nɛ̄ é wā lɛ ā. Úklɔ́ ō yá bónū áncā ā lɛbɛ̄ɛka ācɛ o yúklɔ́ bónū lɛ owu, cɛ́ɛ́ kōó owu kóō je ɔ́ mu bónū áncā nɛ.

¹⁷Ācɛ yēeyī kú uwā ipú obū, ā,[2] ákanya, ícɔ̄nū mɛ́mla ōcē.

¹⁸N má ka ɔdā nōo lɔhi ipú ɛcɛ nyā nōo cíkā lɛ ɔ̄cɛ ā, wɛ o yɔ̄ ī lé mɛ́mla o yɔ̄ ī gwá, cɛ́ɛ́ kú ɔ̄cɛ kóō jɔ́ɔnyɛ kú odúúdú úklɔ́ nōó gē yá ipú ɛcɛ ā, eko kú oyēeyī kpii nɛ̄ Ɔwɔicō je lɛ ɔ́ ipú ɛcɛ ā. Ohígbū ka, ɔ́ɔmā wɛ ukpɛ̄ kú ɔ̄cɛ á.

¹⁹Ɔ́dāŋ ka Ɔwɔicō kwú agbénú mɛ́mla ɔdu ú lɛ ɔ̄cɛ, nōó cɛ̄ lɛ ɔ́ lɛ ɔnyɛ nū jé, ɔ̄cɛ ɔ́ɔmā cíkā ō tá ɔ̄ ahínyá, kóō klla jɔ́ɔnyɛ ɔdā nōó yúklɔ́ nū ā. Ɛ̄nyā wɛ ɛhi nɛ̄ Ɔwɔicō yá ɔ̄ á.

²⁰Abɔ̄ Ɔwɔicō le ɛga je lɛ ɔ́ kóō gwéeyē ā, ó gáā lɛ ɔtū plicō kú ɛ́gɛ́nɛ̄ oyēeyī le kpíí lɛ ā gɛ ŋ́.